Bu gün paytaxtda daha bir körpü-tunel kompleksinin açılış mərasimi olub Körpüdə qış aylarında donmanın qarşısını almaq üçün xüsusi isitmə sistemi quraşdırılıb Bu gün Bakının Xətai rayonunda Heydər Əliyev, Babək və Şah İsmayıl Xətai prospektlərinin kəsişməsində tikilən körpü-tunel kompleksinin açılış mərasimi olub. Tikintisinə 2006-cı il avqustun 4-dən başlanmış körpü “Akkord” Şirkətlər Qrupu Respublika Nəqliyyat Nazirliyinin sifarişi ilə inşa edilib. Mərasimdə Respublika Prezidenti İlham Əliyev iştirak edib. Bünövrəsi prezident İlham Əliyev tərəfindən qoyulan bu kompleksdə 4 yolötürücü ilə bərabər 2 tunelin tikintisi, eyni zamanda həmin ərazidən keçən dəmiryol körpüsünün yeni dəmiryol körpüsü ilə əvəz edilməsi nəzərdə tutulurdu. Qeyd edək ki, bu il iyul ayının 10-da Təbriz küçəsi ilə Heydər Əliyev prospekti istiqamətində 4 saylı yolötürücü (uzunluğu 340 metr, eni 11,7 metr) və “Excelsior” mehmanxanası yanında yerləşən 2 saylı tunel (uzunluğu 220 metr, eni 9,5 metrdir) istifadəyə verilib. Ölkə başçısı İlham Əliyev açılış mərasimində iştirak edib. Bundan sonra körpü-tunel kompleksinin digər hissələrində işlər davam etdirilib. Yanaşma yollarla birlikdə uzunluğu 439 metr olan 1 saylı, 512 metr olan 2 saylı və 390 metr olan 3 saylı yolötürücülər (yolötürücülərin ümumi uzunluğu 1341 metr), 428 metr uzunluğu və 9 metr eni olan 1 saylı tunelin tikintisi yekunlaşıb. Bundan başqa layihədən kənar olaraq burada Yusif Səfərov küçəsindən Xocalı küçəsinə qədər olan yol hissəsi də yenidən qurulub. Körpünün ikinci hissəsinin tikinti işləri zamanı 15 500 kvadrat metr sahədə mərmər, 5000 kvadrat metr sahədə alukobond, 26 700 kvadrat metr sahədə yaşıllaşdırma, 132 000 kvadrat metr sahədə asfaltlama işləri aparılıb. Kompleksdə 11000 metr uzunluğunda paslanmaz materialdan hazırlanmış məhəccər və işıqlandırma dirəkləri, 25 500 kvadrat metr sahədə isitmə sistemi quraşdırılıb. Bundan başqa, ərazidə 63 metr uzunluğu (yanaşma yollarla birlikdə 81 metr) olan dəmiryol körpüsü yenidən qurulub. Qeyd edək ki, artıq körpü kompleksinin digər hissələrinin sınaqdan çıxarılması prosesi də uğurla həyata keçirilib. Rusiyanın “İMİDİS İnstitutu” QSC tərəfindən həyata keçirilən sınaq prosedurları zamanı körpü kompleksinin layihə və icra sənədlərinin öyrənilməsi, bütün əlçatan konstruksiyaların dəqiq şəkildə müayinəsi, kompleksin ayrı-ayrı hissələrinin statik və dinamik xüsusiyyətləri-yükgötürmə, dayanıqlılıq, hərəkətin rahatlığı və s. keyfiyyətləri yoxlanılıb. Mütəxəssislər bütün sınaqların nəticəsini uğurlu hesab edərək körpü-tunel komplesinin bütün standartlara cavab verdiyini və istifadəyə tam yararlı olduğunu bildiriblər. Bu körpü kompleksi respublikada ilk dəfə olaraq tətbiq olunan texnologiya əsasında xüsusi isitmə sistemi ilə təchiz edilib və bu da onun sərt qış aylarında donmasının qarşısını almaq məqsədi daşıyır. Yeni sistem havanın temperaturu 0-4 dərəcə arasında dəyişdikdə avtomatik olaraq işə düşür, temperatur yüksəldikdə isə, öz funksiyasını dayandırır. Tikintidə təmiz qranitdən istifadə olunub. /ANS PRESS/