TÜRKİYƏDƏ İNDİ DƏ KÜRDLƏRDƏN DƏ ÜZR İSTƏMƏK ÇAĞIRIŞLARI EŞİDİLİR Azərbaycanın İstanbuldakı konsulu isə ermənilərdən üzr istəyənləri pislədi Azərbaycanın İstanbuldakı baş konsulu Səyyad Aran Türkiyədə özlərini ziyalı kimi təqdim edən bir qrupun başlatdıqları ermənilərdən üzr istəmə kampaniyasına etiraz edib. Türkiyə mənbələrinin məlumatlarına görə, S.Aran deyib ki, bu kampaniya Azərbaycanda təəccüblə qarşılanıb. Konsul deyib ki, ermənilərin türklərə qarşı tarix boyu təşkil etdikləri kütləvi qırğınlar haqda uzun müddətdir danışılmırdı. “Erməni terorçularının qətl etdikləri türk diplomatlarından kim üzr istəyəcək? Bu təşəbbüsü türkün öz-özünü bıçaqlaması hesab edirəm. Bu, düşmən dəyirmanına su tökməkdir. Əgər soyqırımdan danışmaq lazım gəlsə, o zaman Xocalıda ermənilərin törətdikləri göz önünə gəlməlidir. Orada sözün əsl mənasında soyqırım törədilib, özü də bütün dünyanın gözü qarşısında”. Səyyad Aran onu da deyib ki, 1915-ci il hadisələrində ölən ermənilərin sayı on dəfələrlə şişirdilib. Onun sözlərinə görə, 1.5 milyon ermənidən bəhs edilir, ancaq 20-ci əsrin əvvəllərində Türkiyədə bu qədər erməninin yaşadığı təsdiq olunmur: “Əgər bu qədər erməni yaşayıbsa necə oldu ki, hamısı öldü? Bunlar şişirdilmiş rəqəmlərdir. Əgər üzr istəmək lazımdırsa, o zaman Türkiyənin müxtəlif bölgələrində üzə çıxarılmış kütləvi məzarlara görə kim üzr istəyəcək?” Qeyd edək ki, Türkiyənin bir çox kəsimlərindən ermənilərdən üzr istəyənlərə qarşı etirazlar eşidilir. Əksər hallarda bu etirazlarda ermənilərin azərbaycanlılara qarşı törətdiyi vəhşiliklər xatırladılır. Bu baxımdan kampaniyanın Azərbaycanın xeyrinə işlədiyini demək mümkündür. Son illər heç vaxt Türkiyə cəmiyyəti ermənilərin azərbaycanlılara qarşı işğal siyasətini və kütləvi qırğınları bu cür geniş şəkildə müzakirə edib pisləməmişdi. Xəbər verildiyi kimi, kampaniya siyasətdə də gərginliyə səbəb olub və CHP millət vəkili Canan Arıtman prezident Abdullah Gülü ermənilərdən üzr istəyənləri açıq şəkildə pisləmədiyinə görə “erməni əsilli” adlandırıb. Nəticədə Gül Arıtmanı məhkəməyə verib. CHP millət vəkilinin mövqeyini onun öz partiyası da dəstəkləmir. Dünən CHP-nin “ağsaqqalı”, partiyadan ən yaşlı millət vəkili Şükrü Elekdağ Gülün anasından Arıtmanın sözlərinə görə üzr istəyib. Televiziya kanallarından birində canlı yayımda çıxış edən Elekdağ deyib ki, ermənilərdən üzr istəmək kampaniyası ətrafında davam edən mübahisələrdə prezidentin anası incidilib: “Mən birisindən üzr istəyirəm. Bu, bir anadır, prezident Gülün anasıdır. Onun arxa planda bu mübahisələrdən məyus olduğunu bilirəm. Bütün bunlar məni narahat edir və ondan üzr istəyirəm”. Ermənilərdən üzr istəmək kampaniyası ətrafında mübahisələrin davam etdiyi bir vaxtda bu dəfə Türkiyənin kürdlərdən üzr istəməli olduğu haqda təkliflər eşidilir. Belə təklifə Türkiyə İqtisadi və Sosial Etütlər Dərnəyi TESEV kürd məsələsi ilə bağlı hazırladığı hesabatda yer verilib. Hesabatda deyilir ki, Türkiyə dövləti kürd xalqına üzr borcludur. Təşkilat bildirir ki, hesabat Türkiyənin cənub-şərqində fəaliyyət göstərən insan haqları təşkilatları, vətəndaş cəmiyyəti birlikləri və ekspertlərin rəyləri əsasında hazırlanıb. Hesabata görə, Türkiyə bu bölgədə problemin səbəblərini araşdırmalı, kürd xalqı ilə barışıq əldə edilməli və bunun üçün əvvəlcə dövlət kürdlərdən onların hüquqlarının pozulduğuna görə üzr istəməlidir. Hesabatda orta məktəb şagirdlərinin adından “türküm, doğruyum” ifadələrinin çıxarılması, PKK-çılar üçün aministiya verilməsi və digər məsələlər də əksini tapır. F.MƏMMƏDOV MUSAVAT