Serj Sərkisyan Levon Ter-Petrosyanın ideyalarını oğurlayır Ermənistanın sabiq prezidenti Levon Ter-Petrosyan Dağlıq Qarabağ münaqişəsi haqda danışaraq bildirib ki, konflikt həll olunmayanadək Ermənistan-Türkiyə münasibətlərinin normallaşmasını və iki ölkə arasında sərhədlərin açılmasını gözləmək mümkün deyil. Sabiq dövlət başçısı hesab edir ki, İrəvan-Ankara münasibətləri Türkiyənin tutacağı prinsipial və konstruktiv mövqedən, onun Azərbaycana təsir imkanlarından asılı olacaq. Türkiyənin Ermənistanla münasibətlərin normallaşması konteksində qondarma soyqırımın araşdırılması ilə məşğul olacaq tarixçilərdən ibarət komissiyanın yaradılmasının nəzərdə tutulduğunu deyən Levon Ter-Petrosyan buna görə Serj Sərkisyan hakimiyyətini günahlandırıb: "Serj Sərkisyanın yarıtmaz fəaliyyəti nəticəsində bu unudulmuş ideya yenidən gündəmə gətirilib. Tural Düşünürəm ki, birgə komissiyanın yaradılması həm Dağlıq Qarabağ münaqişəsinin həllində, həm də Türkiyə-Ermənistan münasibətlərinin normallaşdırılmasında ciddi maneə rolunu oynaya bilər. Çünki bir yandan Ankara birgə komissiyanın yaradılmasından imtina etməyəcək, digər yandan Serj Sərkisyan hətta istəsə belə, ictimai rəyin təzyiqi altında bu ideyanın gerçəkləşdirilməsində uğur qazana bilməyəcək". Məsələ ilə bağlı fikirlərini öyrəndiyimiz politoloq Leyla Əliyeva deyir ki, eks-prezidentin bu cür çıxışı reallığı əks etdirir. Sabiq dövlət başçısının belə mövqe sərgiləməsi onun müxalif qüvvə olmasından da irəli gəlir. Levon Ter-Petrosyanın Serj Sərkiysandan köklü şəkildə fərqli siyasətçi olduğunu bildirən politoloq eks-prezidenti ermənilərin "siyasi kapitalı" adlandırdı. O, həmişə Türkiyə ilə münasibətlərin yaxşılaşdırılmasının tərəfdarı olub. Levon Ter-Petrosyanın xarici siyasət proqramında Türkiyəyə ayrılmış yer digər prezidentlərin və siyasətçilərin mövqeyindən fərqlənib. Çünki Ermənistanın ikinci prezidenti Robert Köçəryan və onun "varisi" Serj Sərkisyan mühafizəkar və qatı millətçi olan siyasətçilər qrupuna aiddirlər. Serj Sərkisyanın siyasi platformasının Robert Köçəryanın platformasından fərqlənməməsinə baxmayaraq o, birdən-birə xarici siyasətində dəyişikliklərə əl atdı: "Levon Ter-Petrosyan üçün xarakterik olan xarici siyasətdə aktivlik göstərilməsi və mülayimlik prinsiplərini Serj Sərkisyan "oğurlayıb". Ona görə də eks-prezident bu kimi amilləri də nəzər alıb söyləyir ki, süni siyasət təbii nəticələr verməyəcək. Yəni hər şey bu siyasəti yürüdənlərin şəxsi xarakterindən də asılıdır. Serj Sərkisyan zəif siyasətçidirsə, onun müxtəlif yollara əl ataraq xalqı və dövləti irəli aparmaq istəməsi perspektivsiz görünür. Sabiq dövlət başçısı sanki demək istəyir ki, ortada olan diplomatik fəallıqlara baxmayaraq Dağlıq Qarabağ məsələsi yaxın vaxtlarda həll olunmayacaq və ya hansısa güzəştlər olmayacaq". Türkiyə üçün Qarabağ konfliktinin həllinin vacib olduğunu deyən Leyla Əliyeva türk-erməni münasibətlərində yeni "dövrün" başlandığını da vurğuladı: "Rəsmi Ankara onu da anlamağa başlayıb ki, Ermənistanla münasibətlərin yaxşılaşdırılması təkcə Qarabağ probleminin həllindən keçmir. Yəni əgər türklər ermənilər qarşısında Qarabağla bağlı sərt təkliflər qoyub təhdidlər etməsələr, o zaman İrəvandan münasibətlərin qurulması istiqamətində ciddi addımlar gözləmək olar. Düşünürəm ki, bütün bu Ankara-İrəvan yaxınlaşması istiqamətində gedən nikbin olmayan proseslərə baxmayaraq, Türkiyə Qarabağ problemini arxa plana keçirməyəcək".