"Türkiyə NATO standartlarına uyğunlaşmaqda Azərbaycana ciddi dəstək verir" Emin Həsənli: "Münasibətlərin Azərbaycan-Türkiyə-Gürcüstan hərbi birliyi, müttəfiqliyi səviyyəsinədək yüksəlməsi məqsədəuyğundur" Bakıda Azərbaycan və Türkiyə arasında iki gün davam edəcək yüksək səviyyəli hərbi dialoq başlayıb. Türkiyə nümayəndə heyətinə bu ölkənin Silahlı Qüvvələrinin Baş Qərargahının ikinci rəisi, ordu generalı Hasan İğsız rəhbərlik edir. Hərbi dialoqda ölkələr arasında müdafiə sektorunda qarşılıqlı maraq doğuran məsələlərin müzakirə ediləcəyini bildirən Hasan İğsız Türkiyəylə Azərbaycan arasında hərbi əlaqələlərin genişləndiyini söyləyib. O, ölkəsinin Azərbaycan Silahlı Qüvvələrinə bundan sonra da yardımları davam etdirəcəyini vurğulayıb: "Azərbaycan Silahlı Qüvvələri NATO standartlarına uyğunlaşdırılır. Biz bundan məmnunuq. Bu istiqamətdə yardımlarımızı davam etdirəcəyik". Ramiz Mikayıloğlu Bəs Azərbaycan-Türkiyə hərbi danışıqları nə vəd edir? Hər iki ölkə arasında qarşılıqlı hərbi yardım haqqında sazişin imzalanması prespektivini necə qiymətləndirmək olar? Tərxis Olunmuş Hərbçilərin Gəncləri Maarifləndirmə İctimai Birliyinin (TOHGMİB) rəhbəri Emin Həsənli deyir ki, Türkiyə ilə Azərbaycan arasında hərbi əlaqələr 1993-cü ildən genişlənib. Azərbaycan 1994-cü ildə NATO-nun Sülh Naminə Tərəfdaşlıq Proqramına, daha sonra Fərdi Tərəfdaşlıq Proqramına qoşulub. NATO, eləcə də ikili münasibətlər çərçivəsində hərbi əlaqələr qurulub. Onun sözlərinə görə, 1997-ci ildən Azərbaycan ali hərbi məktəblərində NATO stanlartlarına uyğun hərbi kadrlar hazırlanıb və 2001-ci ildə ilk buraxılış olub. Həmin vaxt Türkiyə Silahlı Qüvvələrinin Baş Qərargah rəisi də sabiq prezident Heydər Əliyevlə birgə buraxılış mərasimində iştirak edib. Əfqanıstan və Kosovada sülhyaratma proseslərində Azərbaycanın bir tağımı Türkiyənin taborunun tərkibində və komandanlığı altında fəaliyyət göstərib. Digər tərəfdən, bizim kadrlar həm də Türkiyənin hərbi məktəblərində təhsil alırlar. Gülhanə Hərbi Qospitalında hərbi həkimlərimiz kurs keçirlər. Bir sözlə, qarşılıqlı əlaqələr xüsusən təhsil və səhiyyə sahəsində genişlənib. Emin Həsənli bildirdi ki, əlaqələr ilbəil genişlənir və gələcəkdə də bu əlaqələr daha da dərinləşəcək. TOHGMİB rəhbəri xatırlatdı ki, Türkiyə jandarması ilə Azərbaycanın Daxili Qoşunlar, Sərhəd qoşunları arasında, o cümlədən Fövqəladə Hallar nazirlikləri arasında əlaqələr inkişaf edir. Dünyada terrorizmin baş alıb getdiyi bir vaxtda antiterror əməliyyatının aparılması zəruriyyətə çevrilib. Azərbaycan və Türkiyə də çox həssas bir bölgədə yerləşib. Bu ilin avqustunda hamı Gürcüstanda hansı hadisələrin baş verdiyinin şahidi olub. Azərbaycan-Ermənistan münaqişəsi hələ də həllini tapmayıb, torpaqlarımız işğal altındadır. Nə sülh, nə barış mövcuddur, Ermənistan da atəşkəsi pozur. İşğalçı ölkəylə Rusiyanın çox sıx təması var. Rusiya bu ölkəyə dəstək verir, hərbi bazalarını onun ərazisində yerləşdirib. Hələ 1994-ci ildə Moskva Ermənistana 1 milyard dollar məbləğində silah və texnika verib. O zamandan bəri də belə "yardımlar" olub. Emin Həsənli vurğuladı ki, Azərbaycanla Türkiyə qardaş dövlətlərdir. Həm iqtisadi, həm siyasi, həm mədəni, həm tarixi köklər bu dövlətləri və xalqları bir-birinə bağlayır, bir xalq, iki dövlətik: "Ona görə də hesab edirik ki, hərbi əməkdaşlıq da dərinləşəcək. Bu, Azərbaycan və Türkiyənin maraqlarına tam uyğundur. Avqust hadisələri zamanı Bakı-Tiflis-Ceyhan neft, Bakı-Tiflis-Ərzurum qaz kəmərləri üçün də təhlükə yaranıb. Gürcüstanda körpünün partladılması nəticəsində Azərbaycan iqtisadiyyatına xeyli zərər dəyib. Gələcəkdə Bakı-Tiflis-Qars dəmiryolu tikilərək istifadəyə veriləcək. Bunların hamısının mühafizəsi üçün gələcəkdə münasibətlərin Azərbaycan-Türkiyə-Gürcüstan hərbi birliyi, müttəfiqliyi səviyyəsinə yüksəlməsi məqsədəuyğundur". Emin Həsənli Azərbaycanın müstəqil dövlət olduğunu və bir çox dövlətlərlə ikitərəfli münasibətlər saxladığını söylədi. Türkiyə dövlətiylə hərbi sahədə əlaqələr isə xüsusi önəm daşıyır. Türkiyə və Azərbaycan arasında qarşılıqlı hərbi yardım haqqında sazişin imzalanması prespektivlərinə gəlincə, TOHGMİB rəhbəri dedi ki, xeyli müddətdir bu istiqamətdə müzakirələr aparılır. Ötən dövrdə əməkdaşlıq sazişləri imzalanıb, iş və qarşılıqlı dəstək planları olub. Onun fikrincə, qarşılıqlı hərbi yardım haqqında sazişin imzalanması yəqin ki, bir müddətdən sonra imzalana bilər. Hələlik bu yöndə yaxın prespektiv, gələn ilin əvvəli üçün bir fikir yoxdur: "İstənilən an belə bir zərurət yaranarsa, Azərbaycanın milli maraqlarına uyğun Türkiyəylə belə bir saziş imzalana bilər. Onu da deyim ki, artıq Azərbaycan Türkiyə hərbi münasibətləri yüksək səviyyədədir. Bu, həm Azərbaycanın, həm də Türkiyənin milli maraqlarına cavab verir. Türkiyə və Azərbaycana dünyada münasibət, beynəlxalq aləmdə ikili standartlarla yanaşma demək olar ki, eynidir. Hər iki dövlət erməni terrorundan əziyyət çəkib. Xüsusən Türkiyənin diplomatları və iş adamları erməni terroruyla üzləşib. Türkiyənin son dövrdəki cəhdlərinə baxmayaraq, ermənilər "üzr diləyirəm!" adlı kampaniya başlayıb və onlar nə qədər qeyri-səmimi olduqlarını ortaya qoyurlar. Erməni ziyalıları prezident Abdulla Gülə müraciət edirlər ki, "soyqırımı" tanısın, bunun danışıqlara aidiyyatı olmasın. Böhranda olan təcavüzkar Ermənistana əl uzadılır, amma ermənilər öz xislətlərindən əl çəkmir və çəkəsi də deyil. Ona görə də Azərbaycan və Türkiyə bölgədə bu məsələləri birgə həll etməyə çalışmalı və ikitərəfli əlaqələr genişlənməlidir". Bəs Türkiyənin də dəstəyi nəzərə alınarsa, Azərbaycan Silahlı Qüvvələri ötən dövr ərzində NATO standartlarına nə dərəcədə uyğunlaşıb? Bu sual həm də ona görə ortaya çıxır ki, bu il Silahlı Qüyvvələrlə bağlı müəyyən xoşagəlməz olaylara da təsadüf edilib. TOHGMİB rəhbərinə görə, NATO standtlarına uyğunlaşma yönündə xeyli iş görülüb. Hərbi məktəblərimizin hamısı NATO standartlarına uyğun kadr hazırlayır. İstənilən sistemə keçid üçün də birinci növbədə kadr və maddi-texniki baza lazımdır. Azərbaycanın kadrları da, maddi-texniki öazası da var. Azərbaycan sadəcə, bəzi qonşu dövlətlər kimi hay-küylə NATO-ya sözdə keçid yox, işdə keçid yönündə xeyli işlər görüb: "Bizim iqtisadi əlaqələrimiz əsasən Avropa ölkələriylə qurulub. Bütün qanunlarımız Avropa Şurası, Venesiya Komissiyası və ATƏT-lə əməkdaşlıq sayəsində hazırlanır. Hərbi sahədə də NATO ilə əməkdaşlıq edilir və bu əməkdaşlıq ilbəil artır. Sadəcə, müəyyən zaman keçməlidir. Avqust hadisələri də göstərdi ki, NATO-ya birdən-birə keçid mümkünsüzdür, bunun üçün zaman yetişməlidir. Amma Azərbaycan zamanı gözləmədən öz ordusunu bunun üçün hazırlayır. Bizim NATO standartlarına uyğun çox gözəl təlim-tədris mərkəzlərimiz, təlim poliqonlarımız var. Çavuşlar məktəbindən başlamış ali hərbi məktəblərə qədər hamısı NATO standartlarına uyğundur. Azərbaycanın NATO standartlarına uyğun sülhməramlı hərbi hissəsi var. Bu proses sürətlənir. Ordumuzun bir çox hərbi hissələri NATO standartlarına keçib. Silahlı Qüvvələrimizin bütün ştat strukturu NATO standartlarına keçib ki, bu da çox vacib şərtlərdən biridir. Hər il bu Alyansın tədbirlərində minlərlə hərbçimiz iştirak edir. Eyni zamanda NATO-nun tədbirləri ölkəmizdə keçirilir. Türkiyəylə də bu sahədə ona görə sıx əməkdaşlıq olunur ki, biz eyni dili danışırıq və qardaş ölkə NATO-un çox nüfuzlu dövlətlərindən biridir". Emin Həsənli bildirdi ki, Türkiyənin çox peşəkar və nizami bir ordusu var: "Xüsusən türk ordusunun nizam-intizamı, vətənpərvərliyi digər NATO ölkələrinin orduları üçün örnək olmalıdır. Biz eyni dili danışdığımızdan, bir-birimizi yaxşı anladığımızdan, eyni dünyagörüşə, adət-ənənələrə malik olduğumuzdan Türkiyəylə bu sahədə əməkdaşlıq xüsusi önəm daşıyır. Türkiyə də NATO standartlarına uyğunlaşmaqda Azərbaycana ciddi dəstək verir".