Ermənilərin "Cavaxetiya sevdası" baş tutmayacaq "Onların Bakı-Tiflis-Qars dəmiryoluna qarşı çıxması Azərbaycan-Gürcüstan münasibətlərinin daha da möhkəmlənməsindən irəli gəlir" Qafqazın "qara yarası" sayılan ermənilər neçə illərdir ki, Gürcüstanda siyasi vəziyyəti gərginləşdirməyə çalışırlar. Erməni məkri bu dəfə Cavaxetiyada özünü göstərir. Azərbaycan torpaqlarına gələrək özlərinə dövlət yaradan haylar indi də Gürcüstan torpaqlarına göz dikiblər. Cavaxetiya erməniləri Bakı-Tiflis-Qars dəmiryolunun inşasının dayandırılmasını, onlara muxtariyyət verilməsini tələb edirlər. Bu məqsədlə Gürcüstanda keçirilən aksiyaya İrəvandan gəlmiş ermənilər də qatılıb. "Cavaxetiya Ziyalıları Forumu"nun sədri Azat Şipaktyan bildirib ki, BTQ dəmiryolu xəttinin çəkilişi ermənilərə meydan oxumaqdır: "Buna görə tikinti işlərinin təxirə salınmasını istəyirik". Gürcüstan Elmlər Akademiyasının professoru Anzor Totadze söyləyib ki, hazırda Cavaxetiyada 70 min, Gürcüstanda isə 250 min erməni yaşayır: "Onlar bilməlidir ki, Cavaxetiya Gürcüstan torpağıdır, bu ölkədə hansı tikintinin aparılacağını isə rəsmi Tiflis müəyyənləşdirir, ermənilər yox". Tural Gürcüstandakı ermənilərinin budəfəki fəallığı bir məqamla da diqqəti çəkir. Onların tələblərində Cavaxetiyaya muxtariyyat verilməsilə yanaşı, Gürcüstan hüquq-mühafizə orqanlarıyla qarşıdurmaya gedən və separatçı çıxışlar edən ermənilərin həbsdən azad olunması, Cavaxetiyada daxili yazışmaların və məhəkəmə hökmlərinin erməni dilində olması üçün bu dilə rəsmi status verilməsi kimi iddialar da yer alıb. Gürcüstanda yaşayan ermənilər son vaxtlar gürcü kilsələrinə də yiyələnməyə can atırlar. Bu məsələ ətrafında Tiflisdə yerləşən "Noraşen" kilsəsi isə əsl qalmaqal mənbəyinə çevrilib. Gürcü mətbuatının yaydığı məlumata görə, Cavaxetiyada "erməni kartının" işə salınmasında Ermənistan xüsusi xidmət orqanlarının da əli var. Məsələ ilə bağlı fikirlərini öyrəndiyimiz "Atlas" Araşdırmalar Mərkəzinin rəhbəri Elxan Şahinoğlu Cavaxetiya "oyunlarının" ermənilərin məkrli planlarının tərkib hissəsi olduğunu söylədi. Onun sözlərinə görə, Gürcüstan ərazisində məskunlaşmış ermənilərin Bakı-Tiflis-Qars dəmiryolunun inşasına qarşı çıxması Azərbaycan-Gürcüstan münasibətlərinin daha da möhkəmlənməsi qorxusundan yaranıb. Bakıya səfər edən Gürcüstanın xarici işlər naziri açıq şəkildə bəyanlayıb ki, Azərbaycan Gürcüstanın Qafqazda ən yaxın qonşusudur. Nazir bildirib ki, onlar rəsmi Bakı ilə münasibətləri daha da inkişaf etdirməyə çalışacaqlar və bu mənada beşillik qaz anlaşmasından da məmnundurlar. Tiflisin Bakıya getdikcə daha çox önəm verməsi isə İrəvanın gözündə qara güruh kimi görünür: "Ümumiyyətlə, bizim üçün önəmli olan odur ki, Gürcüstan Azərbaycanla münasibətlərini əvvəlki səviyyədə saxlayır. Rəsmi Tiflis Bakı ilə əməkdaşlığın inkişafına çalışır. Bakı-Tiflis-Qars dəmiryolu isə bu əməkdaşlığın əsas elementlərindən biridir. Azərbaycan Gürcüstana faizsiz kredit verib və yaxın qonşumuz da bu layihənin gerçəkləşməsində maraqlı olduğunu göstərir". Elxan Şahinoğlu erməni icmasının tikintinin dayandırılmasını tələb etməsinin ortaya effektiv nəticə qoymayacağını da vurğuladı. Artıq hər üç dövlət-Azərbaycan, Gürcüstan və Türkiyə bu layihənin həyata keçməsində maraqlı olduğunu göstərib. ABŞ və Avropa Birliyi isə sözügedən layihənin həyata keçməsinə ən yüksək səviyyədə dəstək verirlər. ABŞ-ın Avropa ölkələrinin bu dəmiryolu layihəsinin reallaşmasında ortaq mövqe sərgiləməsi isə Bakı-Tiflis-Qars dəmiryolunun Böyük İpək Yolunun tərkib hissəsi olmasıdır. Politoloqun fikrincə, Rusiyanın da bu layihəni əngəlləməkdə marağı var və yerli erməniləri bu layihəyə qarşı yönəltməyə çalışır. Amma Cavaxetiya bölgəsi nə Abxaziya, nə də Cənubi Osetiyadır. Bu tanınmamış "ölkələrin" Rusiya ilə birbaşa sərhəddi var və Kreml də bu mənada orada destruktiv rol oynaya bilir. Amma Gürcüstanın Axalkələki bölgəsi Rusiya sərhəddindən kənarda olduğunudan rusların birbaşa bura təsir etmək imkanları yoxdur. Ermənistanın da elə bir potensialı yoxdur ki, Gürcüstandakı erməniləri ayağa qaldıraraq bu layihəyə qarşı hücum təşkil edə bilsin. Ermənistanın xüsusi xidmət orqanları bu niyyətə baş vursa belə, bu cür planlar ermənilər üçün pis nəticələnə bilər: "Ermənistan rəsmiləri son vaxtlar rəsmi Tiflislə nəvazişli davranmağa çalışırlar. Rəsmi İrəvan bildirir ki, Gürcüstan onlar üçün "həyat yolu" rolunu oynayır. İrəvanın Gürcüstanla əlaqələri kəsilsə, ermənilərin vəziyyəti aclıq içində yaşayan ölkələrdə yaşayan xalqların durumu ilə bir tutulacaq. Bu mənada Cavaxetiya ermənilərinin səs-küy qoparması adi bir teatr tamaşasına bənzəyir. Gəldilər, öz rollarını oynadılar və getdilər. Bakı-Tiflis-Qars dəmiryolu layihəsi ermənilərin qarşısını ala biləcəyi bir layihə deyil və bu məsələdə böyük maraqlar var. Ermənilərin özbaşınalığı bu layihənin reallaşmamasında ciddi nəticələrə yol açmayacaq".