Üzr kampaniyası gərginliyi artırır Türkiyə prezidenti şəcərəsi ilə bağlı açıqlama yaydı Türkiyədə "Ermənilərdən üzr istəyək" kampaniyası ilə bağlı siyasi gərginlik səngimək bilmir. "Hürriyət" qəzetinin yaydığı məlumata görə, gərginlik artıq Türkiyə Böyük Millət Məclisinə keçib. Parlamentdə gələn ilin büdcə müzakirələri zamanı kürdləri təmsil edən Demokratik Toplum Partiyasından olan deputat Osman Özçelik ermənilərdən üzr istənilməsi kampaniyasına dəstək verib. Hətta kürdcə "erməni qırımı" ifadəsini də səsləndirib: "Nə yazıq ki, ermənilər öldürüldü. Üç qitəyə hakim olan imperiya necə quruldu? Heç xətaya yol verilmədimi, acı çəkdirilmədimi?" O, doğulduğu Mardinin Derik qəsəbəsində yaşayan ermənilərin qətlə yetirildiyini iddia edib: "Mardində erməniləri öldürdülər. Bir hissəsi öldürülərkən bir hissəsi də Suriyaya qaçmaq məcburiyyətində qaldı. Aralarında mənim babamın da olduğu bəzi insanlar erməni ailələrini himayələrin götürərək onları qətllərdən xilas etdi". İclasa sədrlik edən Nevzat Pakdil bu sözlərə sərt reaksiya verib: "Millətə iftira atırsınız. Bu kürsü əziz millətimizə iftira yeri deyil". Milliyyətçi Hərəkat Partiyasının millət vəkilləri ayağa qalxaraq N.Pakdilin bu sözlərini alqışlayıblar. Ancaq DTP üzvü Sırrı Sakık sədrlik edənə müraciətlə "Hörmətli sədr, siz Kahramanmaraş millət vəkilisiniz, qətlləri yaxşı bilirsiniz, adam olun" - deyə qışqırıb. Türkiyə prezidenti Abdulla Gül isə onun anasını erməni adlandıran millət vəkili Canan Arıtmanı məhkəməyə verib. "CNN Türk"ün yaydığı məlumata görə, A.Gül müxalifətçi millət vəkilindən simvolik olaraq bir yeni türk lirəsi mənəvi təzminat tələb edir. Bəlli olduğu kimi, A.Gül ermənilərdən üzr istəməklə bağlı kampaniyanı cəmiyyətdəki fikir plüralizminin təzahürü kimi qiymətləndirdikdən sonra CXP-çi deputat C.Arıtman onun anasının erməni əsilli olduğunu söyləyib. Onu da qeyd edək ki, A.Gül həmçinin CXP-dən olan qadın millət vəkili C.Arıtmanın onun nənəsinin erməni mənşəli olmasına dair iddiasına cavab olaraq mətbuat üçün bəyanat yayıb. Bəyanatda deyilir ki, A.Gül ailəsinin əsrlərə uzanan və qeydə alınmış keçmişi müsəlman və türkdür. Türkiyə dövlətinin başçısının ana tərəfindən mənsub olduğu Satoğlu, ata tərəfindən isə Gül ailəsinin türk mənşəli olduğuna dair şəcərə cədvəli və həmyerlilərinin şahidliyi vardır. Bütün insanların etnik mənşəyinə, dini etiqadına və ailə bağlarına hörmət etdiyini və onların hamısının bərabər hüquqlara malik olduğunu bidirən Türkiyə prezidenti özünün etnik mənşəyi barədə məqsədli şəkildə yayılan yalanların təkzib edilməsinə ehtiyac duyduğunu da vurğulayıb. MHP sədri Dövlət Baxçalı isə bir qrup ziyalının internetdə başlatdığı "Ermənilərdən üzr istəyək" kampaniyasına münasibətini bildirib. Kampaniyanı başlayanlardan utandığını deyən D.Baxçalı qondarma erməni soyqırımı iddialarının uzun müddətdir Türkiyə dövlətini məşğul etdiyini deyib. D.Baxçalı Türkiyə dövlətinin hər zaman bu iddialar qarşısında tab gətirdiyini, ancaq bütün bunlara baxmayaraq, erməni diasporunun xüsusilə ABŞ və Fransada bununla bağlı təbliğatını davam etdirdiyini bildirib: "Bəzi qondarma ziyalılarımız qondarma erməni soyqırımı iddialarına sanki cavab verilməsi lazım imiş kimi üzr kampaniyası başladıblar. Səmimi olaraq deyirəm, bu kampaniyanı başlayanlardan utanıram. Türk milləti olaraq bu kampaniyanı başlayanlardan utanmalıyıq". MHP sədri kampaniyanın yersiz olduğunu və bundan imtina edilməsinin vacibliyini daha öncə də qeyd etdiyini deyərək, cəmiyyətin bütün təbəqələrində bu kampaniyaya qarşı milli ruh nümayiş etdirilməsinin ölkə üçün sevindirici olduğunu bildirib. MHP sədrinin ardınca onun başçılıq etdiyi partiyanın da etiraz bəyanatı yayılıb. Qeyd edilib ki, MHP "Ermənilərdən üzr istəyək" kampaniyasına qarşı hazırladığı bəyanatı imzalamaq üçün açıq elan edir. MHP İdarə Heyətinin üzvləri Mehmet Şandır, Oktay Vural və MHP sədrinin müavini Atilla Qaya parlamentdə keçirdikləri mətbuat konfransında bəyanatı ictimaiyyətə təqdim ediblər: "Türk millətinin şərəfli tarixində utanacağı bir səhifə, üzr istəniləsi bir hadisə yoxdur. Tarixi təhrif edərək əcdadlarımızı ləkələmək, cinayət törətmiş kimi göstərməyə çalışmaq və üzr tələb etmək heç kimin haqqı və həddi deyil. Anadolu coğrafiyasında baş verən erməni vəhşiliyi, şəhid olan diplomatlarımız və ermənilərin Azərbaycandakı qətliamlarının acı izləri yaddaşlardan silinməyib. Türkiyəni ən ağır insanlıq cinayəti törətməkdə məhkum etməyə çalışan və ermənilərin saxta soyqırımı yalanının vəkilliyini edənlərə bu həqiqətləri xatırlatmaq istəyirik". M.Şandır mətbuat konfransında bu kampaniyaya qoşulanları kəskin şəkildə qınadıqlarını və qondarma ziyalılardan utandıqlarını deyib: "Bu bəyanatı bütün millət vəkilləri, imzalamaq istəyən ziyalılar üçün açıq elan edirik". M.Şandır bəyanata ilk imzanı MHP sədrinin çəkdiyini qeyd edib. MHP İdarə Heyətinin üzvü O.Vural bu bəyanatın yalnız partiya ilə bağlı məsələ olmadığını, bunun milli məsələ olduğunu deyib. Bir məsələni də qeyd edək ki, Türkiyədə ermənilərdən üzr istəmək məqsədilə internet kampaniyası təşkil edənlərə etirazlar şiddətlənir. İnternetdə ermənilərdən üzr istəyənlərin siyahısına adları yazılan şəxslərin bir çoxunun bundan xəbərsiz olduğu aşkarlanıb. 1975-ci ildə Parisdə erməni terrorçuları tərəfindən qətlə yetirilmiş Türkiyənin Fransadakı səfiri İsmayıl Erezin adının da siyahıda olması mətbuatda böyük rəzalət kimi qiymətləndirilib. Üzr istəyənlərin siyahısında İ.Erezin vəzifəsi səfir kimi göstərilərək bu kampaniyaya Parisdən qoşulduğu yazılıb. Saytda kampaniyaya 13 mindən çox adamın qoşulduğu qeyd edilib, amma bu adların nə qədərinin saxta, nə qədərinin həqiqi olduğu bəlli deyil. Özlərindən xəbərsiz adları siyahıya salınmış bəzi insanların prokurorluğa müraciətindən sonra saytdakı "Qatılanlar" və "Qatılmaq üçün tıklayın" bölmələri çıxarılıb. Xatırladaq ki, Türkiyənin Fransadakı səfiri İ.Erez Parisdə avtomobili ilə hərəkət edərkən 3-4 erməni terrorçusunun silahlı hücumuna məruz qalıb. İ.Erez ürəyindən və boynundan aldığı güllər yaraları nəticəsində yerindəcə keçinib. Onun sürücüsü Talib Yenər də hadisə yerində həlak olub. Azər NURİYEV