Türkiyədəki üzr istəmə kampaniyası erməni diplomatiyasına kömək edə bilməyəcək Erməni lobbisi Türkiyədəki üzr istəmə kampaniyasından gələcəkdə öz məqsədlərini həyata keçirmək üçün istifadə etməyə çalışsa belə, kampaniya onlara bu məsələdə kömək edə bilməyəcək. «Ermənilər uzun illərdir bütün vasitələrdən istifadə edərək, qondarma soyqırımı dünyada tanıtmağa çalışsalar da, ciddi uğur əldə edə bilməyiblər və bundan sonra da uğur qazanacaqları inandırıcı deyil», - deyə Azərbaycan prezidentinin xarici siyasət məsələlər üzrə keçmiş müşaviri politoloq Vəfa Quluzadə TrendNews - a bildirib. Bir neçə gün əvvəl Türkiyədə yaradılmış bir internet saytında 1915 - ci ildə Osmanlı dövlətinin ermənilərə qarşı cinayətlər törətdiyi iddia edilərək, ermənilərdən üzr istəmə kampaniyası həyata keçirilir. Bu barədə Türkiyə mətbuatı məlumat verib. Ermənistan və dünyadakı erməni lobbisi Türkiyənin sələfi olan Osmanlı dövlətinin 1915 - ci ildə Anadoluda yaşayan ermənilərə qarşı soyqırım həyata keçirdiyini iddia edir. İddialarını dünyada da qəbul etdirmək istəyən ermənilər bir sıra dünya ölkələrində qondarma soyqırım təbliğatını gücləndirərək, bəzi dövlətlərin parlamentlərində «erməni soyqırımı»nın tanınmasına nail olublar. Erməni əsilli avropalı ekspert Nicolas Tavitian hesab edir ki, üzr istəmə kampaniyası zəruri addımdır və gələcək üçün gözəl imkanlar açır. «Ümid edildiyi kimi, ilk addımı türk cəmiyyəti atdı və vaxtı gələndə dövlət rəsmiləri də onların ardınca gedəcəklər», - deyə Belçikadakı İnside Europe adlı erməni araşdırmaları mərkəzinin direktoru Tavitian şənbə günü Brüsseldən elektron poçtla Trend News - a bildirib. Tavitianın fikrincə, üzr istəmə kampaniyası Türkiyədə düzgün istiqamətə doğru atılmış bir addımdır və Türkiyə dövlətinin bu kampaniyanın qarşısını almaq cəhdləri Türkiyə üçün fəlakətə səbəb olacaq. «Kampaniyanın qarşısının alınması Türkiyə dövlət rəsmilərinin söz azadlığına və demokratiyaya inanmadıqlarını göstərəcək», - deyə Tavitian əlavə edib. Türkiyəli ekspert Mahir Kaynak hesab edir ki, üzr istəmə kampaniyası Türkiyənin rəsmi mövqeyinə heç bir təsir göstərməyəcək. «Türkiyə hakimiyyəti hazırda Ermənistanla münasibətləri normallaşdırmağa çalışsa da, soyqırım məsələsində hansısa güzəştə gedəcəyi mümkün deyil», - deyə Kaynak şənbə günü telefonla İstanbuldan TrendNews - a bildirib. Bununla belə, ekspert hesab edir ki, ermənilər xarici ölkələrin parlamentlərində qondarma soyqırımı qəbul etdirməyə çalışarkən üzr istəmə kampaniyasından istifadə etməyə cəhd göstərə bilərlər. «Onlar üzr istəmə kampaniyasını Türkiyədəki ictimai rəy kimi təqdim edərək, özlərinə haqq qazandırmağa çalışa bilərlər», - deyə Kaynak əlavə edib. Azərbaycanlı ekspert Quluzadə üzr istəmə kampaniyasının Türkiyə cəmiyyətində geniş vüsət almasının mümkün olmadığını və bunun nə Türkiyə hakimiyyətinin mövqeyini dəyişdirəcəyini, nə də erməni diplomatiyasının «uğur»una səbəb olacağını vurğulayıb. «Bu kampaniya Türkiyədəki marginal qrupların və ermənilər də daxil olmaqla, kiçik etnik azlıqların təşəbbüsüdür və siyasi təsir imkanları yoxdur», - deyə Quluzadə bildirib. Son günlərdə Türkiyə cəmiyyətində üzr istəmə kampaniyasına kəskin etirazlar bildirilir. Türkiyənin Baş naziri, Parlament sədri və xarici işlər naziri də bu kampaniyaya öz etirazlarını bildiriblər. Eyni zamanda, hazırda Türkiyə cəmiyyətində bu kampaniyaya qarşı böyük aksiyalar həyata keçirilir.trend