HƏBSDƏKİ UNİVERSİTET MÜƏLLİMİ( Abdulla Abbasi) ACLIĞA BAŞLAYIB

SON XƏBƏRLƏR

HƏBSDƏKİ UNİVERSİTET MÜƏLLİMİ( Abdulla Abbasi) ACLIĞA BAŞLAYIB

2021.10.20, 07:36

Gunaz.tv

HƏBSDƏKİ UNİVERSİTET MÜƏLLİMİ ACLIĞA BAŞLAYIB

Təxminən bir ay əvvəl Güney Azərbaycanın milli qəhrəmanı Səttarxanın anım tədbiri zamanı həbs olunan Tehranın Şəhid Rəcai Universitetinin müəllimi Abdulla Abbasi 5 gün əvvəl aclıq aksiyasına başlayıb. “Azad Təbriz” saytının xəbərinə görə, Abbasinin qardaşı, Yədulla Abbasi Tehranın İslam İnqilab Məhkəməsinin 20-ci şöbəsinin Təhlükəsizlik İdarəsinə müraciət edərək, qardaşı ilə görüşə icazə verilməsini xahiş edib. İnqilab Məhkəməsinin rəsmiləri isə Abdulla Abbasinin həbsindən xəbərsiz olduqlarını bildiriblər. Qeyri-rəsmi məlumata görə, cənab Abbasi bundan öncə ailəsinə bir dəfə telefonla zəng edərək, Tehranın “Evin” Həbsxanasının 209 saylı təcridxanasında saxlandığını bildirib. “Evin”dən yenicə azad edilən fəallar da cənab Abbasinin həmin həbsxanada olduğunu və qanunsuz həbsinə qarşı etiraz əlaməti olaraq aclıq aksiyası keçirdiyini təsdiqləyiblər. Bundan başqa cənab Abbasinin həbs olunması zamanı saxlanılmış şəxsi avtomobili qısa müddət sonra ETTELAAT əməkdaşları tərəfindən onun ailə üzvlərinə təhvil verilib. Abbasi ilə birlikdə həbs olunan onun bacısı oğlu, Ərdəbilli fəal Hüseyn Hüseyninin də vəziyəti barədə məlumatsızlıq onların ailə üzvlərinin narahatlığına səbəb olur. “Öyrənci”nin bildirdiyinə görə isə, Abbasinin ailəsi onun həbsi barədə faktın İnqilab Məhkəməsi tərəfindən inkar edilməsini məhbus ailəsinə qarşı əlavə təzyiq və “ psixoloji işgəncə” kimi dəyərləndirir və beynəlxalq insan haqları təşkilatlarından təcili yardım istəyir. Tehranın Şəhid Rəcai Universitetinin müəllimi, Abdulla Abbasi ötən il həbs olunaraq, 3 ay “Evin” həbsxanasında saxlandıqdan sonra müvəqqəti azadlığa buraxılmışdı. Daha sonra isə Tehranın İslam İnqilabı Məhkəməsi onun barəsində bir il şərti olaraq azadlıqdan məhrum etmə qərarı çıxarmışdı. Azərbaycanlı jurnalist Şahnaz Qulamiyə həbsxanada işgəncə verilməsi ilə bağlı xəbərlər yayılıb ki, bu da böyük narahatçılıqlar yaradıb. Jurnalistin müdafiəçiləri və milli hərəkat İran rejimini bu cür antiinsani hərəkətlərdən əl çəkməyə çağırıb. Qeyd edək ki, Ş.Qulami son iki ayda İranda həbs olunan ikinci veb yazarıdır. Təbriz həbsxanasında saxlanılan Şahnaz Qulami, bir müddət öncə İslam İnqilabı Məhkəməsi tərəfindən “Dövlətçiliyə qarşı antitəbliğat”da təqsirli bilinərək, 6 ay müddətinə azadlıqdan məhrum edilib. Onun bir neçə il əvvəl atasını itirən 9 yaşlı qızı Həsna isə yardıma ehtiyacı olan əlil və xəstə nənəsinin ümidinə qalib. Şahnaz Qulaminin Hüquqlarını Müdafiə Komitəsi xanım jurnalistin qeyd-şərtsiz azadlığa buraxılması istiqamətində çalışmalarını davam etdirir. Cavid TURAN

GUNAZ.TV

SON XƏBƏRLƏR