Rusiya hərbi gəmiləri ABŞ-a yaxınlaşır "Medvedyev arxa darvazalarda it oynadır" Sovetlər Birliyi dönəmindən bu yana ilk dəfə olaraq Rusiya hərbi gəmiləri Kubaya baş çəkəcək. Nikaraquaya səfərdən sonra Rusiya Şimal Donanmasının gəmiləri dekabrın 19-da Havana limanına girəcək. "Bu, Sovetlər Birliyi dövründən bəri rus hərbi gəmilərinin Kubaya ilk səfəri olacaq. Səfər dekabrın 23-nədək davam edəcək". Bu barədə Rusiya Federasiyası Hərbi-Dəniz Qüvvələri baş komandanının köməkçisi, kapitan İqor Dıqalo bəyan edib. O vurğulayıb ki, Kubaya səfər iki ölkənin hərbi-dəniz idarələri arasında münasibətlərin möhkəmlənməsi və inkişqafı üçün əhəmiyyətli addım olacaq. Planlaşdırıldığına görə, səfər çərçivəsində gəmi komandanlığı Kubu hərbi-dəniz donanmasının komandanlığı, Havana meri, Rusiya səfirliyinin nümayəndələrilə görüşlər keçirəcək. Raifə Kuba əhalisinə Rusiya gəmilərinə baxış keçirmək imkanı yaradılacaq. Səfər zamanı dənizçilər Xose Martinin və sovet hərbçilərinin memorialı önünə əklil qoyacaqlar, həmçinin Kuba paytaxtının tarixi yerləri ilə tanış olacaqlar. Qeyd edək ki, dünən Şimal Donanmasının "Admiral Çabanenko", "SB-406" və "İvan Bubunov" hərbi gəmiləri Nikaraquaya səfər edəcək və Blufilds limanını tərk edəcəklər. Dıqalonun sözlərinə görə, rus hərbi gəmilərinin Nikaraquaya səfəri dost xarakter daşıyır, dünyada qəbul olunan təcrübəyə müvafiqdir və dəniz adət ənənələrinə uyğundur. Məlumat üçün bildirək ki, rus hərbi gəmiləri Nikaraquaya humanitar yük də gətiriblər. Dıqalo deyib: "Rusiya hərbi-dəniz donanması komandanlığının qiymətləndirməsinə görə, rus hərbi gəmilərinin Venesuela, Panama və Nikaraquaya səfəri bu ölkələrin hərbi-dəniz qüvvələri ilə qarşılıqlı münasibətlərin inkişafı sahəsində perspektivin əldə olunmasına imkan yaradacaq. Məqsəd dünya okeanında stabillik və etimadın inkişaf etdirilməsidir". Xatırladaq ki, dekabrın əvvəllərində Karib dənizində Rusiya və Venesuela hərbi-dəniz qüvvələrinin irimiqyaslı "VEHRUS-2008" təlimləri keçirilib. Təlimdə Rusiyanın "Pyotr Velikiy" ağır atom raket kreyseri iştirak edib. Təlimlərdən sonra rus gəmiləri II Dünya müharibəsindən bu yana ilk dəfə Panama kanalını keçərək Nikaraqua limanına istiqamət alıblar. Qərb mətbuatı Rusiyanın ABŞ-ın ənənəvi təsir dairəsində hərəkətlərindən təəccübünü bildirmişdi. Rusiya prezidentinin Latın Amerikasına səfərinə şərh verən mətbuat yazıb ki, Dmitri Medvedyev "Amerikanın arxa darvazalarında it oynadır". Dərgilərin məlumatına görə, Rusiya soyuq müharibə zamanlarının situasiyalarına qayıtmaq istəyir. Eyni zamanda, vurğulanırdı ki, Medvedyevin səfəri və hərbi-dəniz təlimləri heç də yeni Karib böhranı deyil. İqor Dıqalo onu da xəbər verib ki, Sakit okean donanmasının hərbi gəmiləri hazırda Cənubi-Çin dənizinin şimalında Hind okeanına və Ərəbistan dənizinə giriş vəzifəsini icra edirlər: "Məqsəd Andreyev bayrağının nümayişi və okean, dəniz rayonlarında vacib operativ problemləri həll etməkdir". Onun sözlərinə görə, bu təlimlərdə "Admiral Vinoqradov", "Boris Butoma" və "Peçenqa" gəmiləri iştirak edir. Təlimlər bir neçə ay davam edəcək. Plana əsasən, hərbi gəmilər bir neçə xarici ölkəyə səfər edəcək və Şimal donanmasının "Pyotr Velikiy" ağır atom raket kreyseri ilə birgə Rusiya-Hindistan hərbi-dəniz təlimlərində iştirak edəcəklər.