Parlamentdə bir şəxsin iki dəfədən artıq prezident seçilməsi barədə məsələ qaldırılıb

SON XƏBƏRLƏR

Parlamentdə bir şəxsin iki dəfədən artıq prezident seçilməsi barədə məsələ qaldırılıb - YENİLƏNİB

2021.10.20, 07:36

Gunaz.tv

Parlamentdə bir şəxsin iki dəfədən artıq prezident seçilməsi barədə məsələ qaldırılıb - YENİLƏNİB

Bu gün Azərbaycan Mili Məclisinin növbəti iclası keçirilir. APA-nın xəbərinə görə, iclas başlayan kimi millət vəkili, Yeni Azərbaycan Partiyasının sədr müavini, partiyanın icra katibi Əli Əhmədov prezidentin səlahiyyət müddəti ilə bağlı təklif səsləndirib: “Mən bu gün Milli Məclisdə prezidentin səlahiyyət müddəti ilə bağlı məsələ qaldırmaq istəyirəm. Artıq bu məsələ uzun müddətdir ki, ictimaiyyət tərəfindən müzakirə olunur. Söhbət ondan gedir ki, bir şəxsin iki dəfədən artıq prezident seçilmək hüququna məhdudiyyət qoyulması seçicilərin hüququnun pozulmasıdır. Bu variant seçicilərin öz mövqeyini ifadə etmələrinə imkan vermir”. Ə. Əhmədov deyib ki, xalqın prezident görmək istədiyi şəxsin seçilməsinə imkan yaradılmazsa, insanlar arzulamadıqları şəxsə səs verməyə məcbur olarlar: “YAP-ın parlamentdəki çoxluğunun rəyini nəzərə alaraq təklif edirəm ki, Konstitusiyaya dəyişiklik edilməsi ilə bağlı referendum keçirilməsi məsələsi Mili Məclisin gündəliyinə daxil edilsin. Mən əminəm ki, təklifimə baxılacaq və Milli Məclisin növbəti iclaslarından birində bu məsələ gündəliyə salınacaq”. O, mövqeyinin dəstəklənəcəyinə inandığını da deyib. Sonra deputatlar təklifə münasibətlərinin açıqlayıblar. Deputatlardan Fəzail İbrahimli, Zahid Oruc, Sabir Hacıyev, Həvva Məmmədova, Mübariz Qurbanlı, Siyavuş Novruzov və Qənirə Paşayeva təklifi dəstəkləyiblər. S. Novruzov deyib ki, bu məsələ ilin sonuna kimi həllini tapmalıdır. M. Qurbanlı cəmiyyətdə Konstitusiya islahatlarının aparılması ilə bağlı təkliflərin olduğunu xatırladıb. Millət vəkili Sabir Rüstəmxanlı isə bildirib ki, ehtiyac yaranacağı təqdirdə, məsələyə 2010-cu ildə baxıla bilər: “Ehtiyac olarsa, bu məsələyə 2010-cu ilin parlament seçkiləri ilə eyni vaxtda baxıla bilər”. Deputat Fazil Mustafa proporsional seçki sistemi ilə bağlı təklifin də gündəmə gəlməli olduğunu bildirib. Təklifin əleyhinə çıxan Müsavat deputat qrupunun üzvü Arzu Səmədbəyli isə YAP-ın bu təklifi ortaya atmasını ölkədəki problemlərdən diqqəti yayındırmaq cəhdi kimi qiymətləndirib, bunun demokratiyaya zidd olduğunu deyib. Spiker Oqtay Əsədov isə müzakirələrə yekun vuraraq, səsləndirilən bütün təkliflərin müvafiq komissiyaya təqdim olunmasının vacibliyini qeyd edib: “Bundan sonra məsələyə baxıla bilər”. LENT.AZ

GUNAZ.TV

SON XƏBƏRLƏR