“Əli Kərimli ilə görüşmək istəsəm, xəlvət görüşmərəm” Qulamhüseyn Əlibəyli: “Aydınlar Partiyasının 6-7 rayon təşkilatında keçmiş cəbhəçilər fəaliyyət göstərir” Azərbaycan Aydınlar Partiyasının sədri Qulamhüseyn Əlibəylinin Lent.az-a müsahibəsi - Sədri olduğunuz partiya Azərbaycanın durğunluq dövrünü yaşayan siyasi həyatına nə isə gətirəcəkmi? - Gətirəcəyinə ümid edirik. Azərbaycanın siyasi həyatında olan durğunluq, iqtidarla müxalifətin bir hissəsinin faktiki olaraq bir-birini qəbul etməməsi, bir-birinə düşmən kimi baxması Azərbaycanın siyasi həyatında bir növ durğunluq, ümidsizlik yaradıb. Aydınlar Partiyası olaraq hesab etdik ki, bu vəziyyətdən çıxış yolu tapmaq lazımdır. Cəmiyyətə elə bir qüvvə, güc təklif olunmalıdır ki, o nə ənənəvi iqtidar siyasəti, nə də ənənəvi müxalifət siyasəti yeritmiş olsun. Sadəcə, cəmiyyətdə düşmənçilikdən bir-birini başa düşmək, bir-birini qəbul etmək siyasəti istiqamətində dönüş yaratmaq istəyirik. Buna nə dərəcədə nail olacağımızı gələcək göstərəcək. - Yəni partiya bolluğunda olan Azərbaycana yenilik gətirdiyinizi düşünürsünüz... - Yox, gətirmək istəyirik. Gətirmək istədiyimiz ondan ibarətdir ki, hakimiyyət-müxalifət münasibətlərində düşmənçiliyi, şəxsi barışmazlığı aradan qaldıraq. Şəxsi münasibətlərdə olan prinsiplərin siyasətə keçməsini aradan qaldırmaq istəyirik. Nə dərəcədə nail olacağımızı zaman göstərəcək. Hələ partiya təzə yaranıb. - İqtidar-müxalifət münasibətlərindəki “düşmənçilikdən” söz düşmüşkən, mətbuatda Sizin “Nar çiçəyi” restoranında AXCP sədri Əli Kərimli ilə gizli görüşdüyünüz iddia olunurdu... - Vallah, o restoranın – “Nar çiçəyi”nin harada olduğunu bilmirəm. Ancaq yerini desəydilər, gedib orada oturub çörək yeyərdim. - Yəni Əli Kərimli ilə heç bir gizli görüş olmayıb? - Mən Əli Kərimli ilə görüşmək istəsəm, açıq görüşəcəyəm, hansısa xəlvəti yerdə yox. Ümumiyyətlə, Azərbaycan jurnalistikasında çox qəribə bir meyl var. Guya restoranda gizli görüş keçirilib. Restoranda da gizli görüş olar? Restoran camaatın gəldiyi yerdir, hamı görür ki, kim gəlir, kim gedir. Elə bir yerdə gizli görüş olmaz. Gizli görüş başqa yerdə olar. - Azərbaycanda xüsusən son illərdə təşkilatlanma problemi var. İnsanlar müxtəlif səbəblərdən partiyalara qoşulmaq istəmir. Aydınlar Partiyası belə bir problem yaşamayıb ki? - Bəli, Azərbaycanda bu problem var. Deməzdim ki, bizdə hər şey yüksək səviyyədə olub. 30 rayonda təşkilat yaratmağa müvəffəq ola bilmişik. 3 ay üçün bu, uğurlu göstərici sayıla bilər. Eyni zamanda, hesab edirəm ki, bu, zəif fəaliyyətdir. Azərbaycan insanının siyasilərə ümidinin itməsi də bunda rol oynayıb. Hər halda, 30 rayon təşkilatına müəyyən qədər adam toplaya bilmişik. Qurultayda da onların hamısı iştirak etdi. Azərbaycan cəmiyyətində ola bilsin ki, ənənəvi iqtidar-müxalifət münasibətlərindən, söyüş və təhqirlərdən bezən insanlar bizim ətrafımıza toplaşıblar. - Hansısa partiyadan kütləvi axın olubmu? - İndiyə qədər topladığımız adamlar arasında əvvəllər siyasi partiya mənsubiyyəti olanlar da var. Yəni partiyasını dəyişib biz tərəfə üz tutanlar var. Daha çox vaxtilə Xalq Hərəkatında iştirak edən, sonradan aktiv siyasətdə iştirak etməyən şəxslər, yaxud ümumiyyətlə indiyə qədər siyasi fəaliyyətlə məşğul olmayan gənc insanlardır. Proses ləng getsə də, məndə olan məlumata görə, cəmiyyətdə bizim partiyaya ümid, inam var. Bu inamı nə qədər doğruldacağımızı zaman göstərəcək. Bu, partiyanın sonrakı fəaliyyətindən asılı olacaq. - Partiya üzvlərindən təxminən neçə faizini əvvəllər başqa siyasi təşkilatlarda olan şəxslər təşkil edir? - Sözün düzü, bunu saymamışam. Ancaq haradasa 6-7 rayon təşkilatında keçmiş cəbhəçilər fəaliyyət göstərir. Bir neçə rayon təşkilatında isə vaxtilə Xalq Hərəkatının iştirakçısı olmuş, lakin siyasətdən uzaqlaşmış şəxslərdir. Ancaq üzvlərimizin yarıdan çoxu yeni adamlardır. Yəni onlar indiyədək siyasi fəaliyyətlə məşğul olmayıblar. - Ətrafınıza təxminən neçə nəfər yığa bilmisiniz? - Dünənki qurultayda verilən məlumata görə, 1500-dən çox partiya üzvü, 30 rayon təşkilatı. Həmçinin ayrıca gənclər təşkilatı və qadınlar təşkilatı var. Artıq 5 rayonda bizim təşəbbüs qrupu formalaşıb. Yaxın zamanlarda onlarla konfrans keçiriləcək. - Yəqin ki, partiyanın dövlət qeydiyyatına alınması üçün Ədliyyə Nazirliyinə, daha sonra qərargah üçün müvafiq quruma müraciət etməyə hazırlaşırsınız. - Partiyanın təsis qurultayı dünən keçirilib. Qeydiyyat üçün protokol və digər sənədləri hazırlamaq lazımdır. Ən azı 1000 nəfərin imzası lazımdır ki, artıq bizdə ondan da artıq imza var. İnşallah, sağlıq olsun, texniki məsələlər həll olunandan sonra, həftənin axarınadək müraciət edəcəyik. Hazırda bir neçə QHT var ki, onların ofisindən qərargah kimi istifadə edirik. Ancaq bu, daimi xarakter daşımır. Partiya qeydiyyatdan keçəndən sonra “Siyasi partiyalar haqqında” qanuna uyğun olaraq müvafiq dövlət qurumundan qərargah da tələb edəcəyik. - Bəziləri deyir ki, “Qulamhüseyn Əlibəyliyə qurultay keçirmək üçün yaxşı bir otel ayrıldı, ancaq eləsi var, heç bir toplantı keçirməyə yer tapmır”... - Təsis qurultayını keçirmək üçün “Ambassador” otelinə müraciət etdik. Bu otelin həm qiymətləri, həm də xidmətləri bizi təmin etdi. Kənarda oturub “bizə yer vermirlər” bəyanatını vermək düz deyil. Əvvəlcə gərək müraciət etsinlər. - Siz həm də ona işarə edirsiniz ki, hakimiyyət Aydınlar Partiyası ilə digər partiyalar arasında fərq qoymur? - Hələ ki, hansısa fərq hiss etmirəm. İndi müəyyən partiyaların qərargahı var, bizimki yoxdur, müəyyən partiyaların qərargahı oxdur, ancaq bizim dostlarımızın qərargahı var. Hesab edirəm ki, hakimiyyət bizim aramızdakı münasibətlər digər müxalifət partiyaları ilə olan münasibətlərlə təxminən eynilik təşkil edir. Pərvin ABBASOV LENT.AZ