Dazbaşlar azğınlaşdı "Moskvanın Mojaysk rayon rəhbərliyinin binasının yanında Orta Asiyadan olan işğalçının kəsilmiş başı qoyulub. Moskva məmuolarına sürprizi doğma şəhərimizə yadlarla gəlmələrin axışmasından bezən və yaranımş vəziyyətə laqeyd qalmayan ruslar hazırlayıblar". "Rusiyalı Millətçilərin Döyüş Təşkilatının üzvləri" adından imzalanan və Rusiya İnsan Hüquqları Bürosunun ofisinə elektron poçtlla göndərilən məktubda ölkədəki "dazbaş"larla millətçilərin miqrantlara qarşı yeni "mübarizə yolu" tutmalarından bəhs olunurdu. Moskvanın Tolbuxin küçəsində yerləşən ev 6, korpus 2 ünvanda polietilen paketə bükülmüş kəsik baş tapılıb. Aparılan araşdırmalar göstərir ki, həmin kəllə Tacikistandan Moskvaya işləməyə gəlmiş gəncindir. Bu isə Rusiyada həddən artıq gərgin vəziyyətə çatan ksenofobiya, ekstremizm və milli zəmində dözülməzlik təmayüllərinin artıq olduqca təhlükəli həddə çatdığını göstərir. "Millətin təmizliyi" və "ölkənin xilası" uğrunda rus olmayanları, yəni "gəlmələr"i, miqrantları və "qaralar"I qətlə yetirmək anonim, pis təşkilatlanmış marginalların işi səviyyəsindən çıxır. "Dazbaşlar" kimi tanınan, miqrantlara hücumlar edən bu adamlar indiyədək hakimiyyətə qarşı siyasi iddialarla çıxış etmir, ictimai tanınmaya can atmırdılar. Tacik miqrantı vəhşicəsinə qətlə yetirən "Rus Millətçilərin Döyüş Təşkilatı" isə ekstremizmi yeni səviyyəyə yüksəldib. "Bizim belə sərt aksiyamız yalnız gəlmələrə və yadlara olan nifrətimizlə bağlı deyil. Əsas problem xalqın maraqlarına tüpürmək belə, istəməyən, Moskvaya miqrantları gətirməkdə davam edən və qafqazlı alverçiləri dəstəkləyən hakimiyyətdən olan kəskin narazılığımızdır. Buna görə də "qara"ların cinayətlərinə görə məmurlardan da qisas alacağıq", - qruplaşmanın bəyanatında deyilir. Baş verənlər Rusiyadakı ekstremizmin tarixində misli olmayan hadisədir. Moskva İnsan Haqları İnstitutunun direktor müavini Konstantin Qurçev əməkdaşımızla söhbətində dedi ki, ölkədəki ifrat millətçi hərəkat indiyədək iki düşərgəyə bölünmüşdü: "Onlardan birində millətçi və vətənpərvər şüarlarla çıxış edərək leqal və ya qeyri-leqal fəaliyyət göstərən, amma qanunu kobud şəkildə pozmağa və aşkar zorakılığa can atmayan təşkilatlar cəmlənib. Millətçi hərəkatın digər düşərgəsində isə açıq-aşkar şəkildə faşist ideyalarına sadiq olduqlarını göstərərək ən qəddar, vəhşi və cinayətkar vasitələrlə hərəkət edən gizli, qeyri-formal qruplaşmalar var. Lakin indiyədək həmin düşərgələrin yolları kəsişməyib. Milli dözülməzlik zəminində törədilmiş qətl heç vaxt hakimiyyət qarşısında tələblərlə müşayiət olunmayıb. Moskva şəhər milis idarəsi və Rusiyanın Daxili İşlər Nazirliyi törədilmiş cinayəti çox ehtiyatla şərh edir. "Belə bir təşkilatın gerçəkdən də mövcud olduğuna dəlalət edən heç bir fakt hələ yozdur. Bundan başqa, təşkilat olsa belə, qətlin məhz həmin qruplaşma tərəfindən törədildiyini sübut edəcək faktlar əldə olunmayıb", - Moskva şəhər daxili işlər idarəsinin mətbuat xidmətindən əməkdaşımıza bildirdilər. Di gəl, müraciətin müəllifləri cinayəti törətməyə bilərlər: lakin onların qətldən xəbərləri olub. Ötən həftə vücudu Moskva vilayətinin Lenin rayonunda tapılmış tacik miqrant bıçaqlanandan sonra başı kəsilib. Kəsik kəllə isə məhz "Rusiya Millətçilərinin Döyüş Təşkilatı"nın müraciətində göstərdiyi yerdə olub. Bu təşkilatı olub-olmaması, cinayətin mütəşəkkil dəstə və ya bir dəstə narkoman-sərxoş gənc radikal tərəfindən törədilməsi əsla önəmli deyil. Mühüm olan budur ki, Rusiyadakı radikal millətçiliyin ideologiyasında ciddi dəyişiklik var. Rəsmi Moskva isə "dazbaş"larla mübarizədə hələlik ritorikaya üstünlük verir, konkret iş görmürlər. Bu səbəbdən də Moskvadakı soydaşlarımız da dərin narahatlıq içindədir. "Hər birimizin ailəsi, uşaqları, qohumları var. Səhər tezdən işə gələndən sonra bütün günü fikrimiz onların yanında qalır. O tacikin yerinə azərbaycanlı da ola bilərdi. Belə vəhşiliyin azərbaycanlılara qarşı törədilməyəcəyinə isə kimsə zəmanət vermir və verə də bilməz. Ona görə də qorunmaq, müdafiə olunmaq, haq və hüquqlarımızın təminatına nail olmaq qərarına gəlmişik", - Moskvadakı azərbaycanlıların "Vətən" cəmiyyətinin sədr müavini Eldar Qəhrəmanov əməkdaşımıza söylədi. Onun dediyinə görə, Moskva vilayətinin Lenin rayonunun Jabkino kəndi yaxınlığında əvvəlcə travmatik tapança ilə vurulan, sonra dəfələrlə bıçaqlanan, axırda da başı kəsilərək bədənindən ayrılan tacikin faciəsi Rusiya paytaxtındakı bütün miqrantlarla əndişə yaradıb. Moskvadakı soydaşlarımızın 4 diaspor təşkilatı dünən bir araya gələrək şəhər meriyası, hüquq-mühafizə orqanları, Azərabaycanın Rusiyadakı səfirliyi və digər müvafiq strukturlara bəyanat qəbul ediblər. Bəyanatda "dazbaş"ların vəhşilikliklərinə son qoyulması, miqrantların "canlı hədəf"ə çevrilməsi prosesinin dayandırılması tələb olunur. Bu gün isə Rusiya paytaxtındakı azərbaycanlı, tacik, moldovan, ukraynalı və dağıstanlıların 7 icma təşkilatının birgə toplantısı gözlənilir. Onlar da ekstremizmlə millətçiliyin təhlükəli həddə çatmasının vurğulandığı bəyanatla Rusiya rəhbərliyinə müraciət etmək niyyətindədir. Moskva milisi isə şəhərdəki azərbaycanlıların narahatlığına əsas görmür. "Bəli, ağır cinayət hadisəsi törədilib və bunu danmırıq. Lakin bir konkret faktı ümumiləşdirmək və təşvişə düşməyə lüzumi yoxdur. Cinayətkarlar ən tez zamanda tapılaraq cəzalandırılacaq. Azərbaycanlılar isə həmişəki iş və həyat rejimlərini davam etdirə bilərlər. Narahatlıq üçün heç bir əsas yoxdur", - Moskva şəhər daxili işlər idarəsinin mütəşəkkil cinayətkarlıqla mübarizə bölməsinin rəis müavini Qriqori Belov söylədi. Həsən AĞACAN