“ÇIRPINIRDIN, QARA DƏNİZ”in TƏQDİMATI OLDU Klip Türkiyə telekanallarında da nümayiş etdiriləcək Dünən “Park İnn” otelində Azərbaycan Xalq Cümhuriyyətinin və Qafqaz İslam Ordusunun 90 illiyi ilə əlaqədar tədbir keçirildi. Tədbirdə əməkdar artist Azərinin bu yaxınlarda hazırlanan “Çırpınırdın, Qara dəniz” klipinin təqdimatı da keçirildi. Qeyd edək ki, klip Asiya Dialoqu İctimai Birliyi, Qafqaz Media Mərkəzi və Qara Dəniz Qeyri-Hökumət Təşkilatları Konfederasiyasının birgə təşkilatçılığı ilə çəkilib. Qafqaz Media Mərkəzinin rəhbəri Sevil Nuriyeva mərkəzin yarandığı gündən Türkiyə-Azərbaycan əlaqələrinin genişlənməsinə və münasibətlərinin doğmalaşmasına xidmət etdiyini vurğuladı: “Digər bir məqsədimiz Qafqaz İslam Ordusunun Azərbaycanın xilasında göstərdiyi xidmətlər və Nuru Paşanın xalqımız üçün etdiklərini və etmək istədiklərini cəmiyyətimizə çatdırmaqdır. Təəssüf ki, Azərbaycan ictimaiyyəti Nuru Paşa barədə az bilir. Qafqaz İslam Ordusu və Nuru Paşa olmasaydı, Azərbaycanı nələr gözləyərdi? Osmanlı imperiyasının çöküş dövründə, hər şeyin param-parça olduğu bir zamanda Nuru Paşa Ənvər Paşanın çağırışı ilə Azərbaycanı erməni-rus hərbi birləşmələrinin təhlükəsindən qurtarıb. Nuru Paşaya dair tarixi araşdırmalarımızda əlyazmalar da tapmışıq və bunu Azərbaycan dövlətinin 90 illiyinə hədiyyə edəcəyik”. Qeyd edək ki, sözləri 1914-cü ildə Azərbaycan şairi Əhməd Cavad tərəfindən yazılan “Çırpınırdın, Qara dəniz” mahnısının musiqisini 1918-ci ildə Üzeyir Hacıbəyov bəstələyib. Mahnı Nuru Paşa komandanlığı və Osmanlı qoşunlarının Azərbaycan türklərini erməni-rus soyqırımından qurtarmaqda göstərilən qəhrəmanlıqlara ithaf olunub. Əsər şeir şəklində ilk dəfə 1919-cu ildə Əhməd Cavadın ikinci şeir kitabı “Dalğa”da dərc olunub. Şeirin əlyazmasının isə yandırıldığı, yaxud müsadirə olunduğu güman edilir. Əsərin Üzeyir bəyin əlyazması ilə yazılmış notu da mövcud deyil. 1918-ci ildə dahi bəstəkarın evi ermənilər tərəfindən yandırılarkən əsərin məhv olduğu, yaxud Üzeyir bəyin İrana məcburi mühacirəti zamanı itdiyi ehtimal olunur. Hazırda istifadə olunan not 1990-cı ildə İstanbul Texniki Universitetinin professoru Süleyman Şenel tərəfindən Ü.Hacıbəyovun ev-muzeyinə təqdim edilib. Əsər ilk dəfə Azərbaycanda 10 mart 1992-ci ildə Əhməd Cavadın 110 illik yubileyində səslənib. S.Nuriyeva layihənin davamı kimi Nuru Paşanın və türk ordusunun qəhrəmanlığına həsr edilən “İstiqlal” sənədli filminin çəkilişlərinə hazırlıq görüldüyünü də vurğuladı. Tədbirdə Türkiyənin Azərbaycandakı səfiri Hulusi Kılıc, deputatlar Gültəkin Hacıbəyli, Məlahət İbrahimqızı, Jalə Əliyeva, müğənni Azərin, xalq artisti Amaliya Pənahova, Qara Dəniz Qeyri-Hökumət Təşkilatları Konfederasiyasının başqanı Hasan Eksi, “SEPRON” studiyasının rəhbəri Emin Kuzkun, Dilarə Əliyeva adına Qadın Hüquqlarını Müdafiə Cəmiyyətinin sədri Novella Cəfəroğlu, vəkil Aslan İsmayılov, Əhməd Cavadın nəvəsi Anar Axundzadə və başqaları çıxış edərək Qafqaz-İslam Ordusunun qələbəsinin tarixi əhəmiyyətindən danışdılar. Sonra isə “SEPRON Yapım Orqanizsyon”un istehsal etdiyi klip təqdim edildi. Klipin rejissoru Aşkın Sağıroğlu, ssenari müəllifləri Ömər Lütfü Mete və Sevil Nuriyevadır. Layihənin Azərbaycan üzrə koordinatoru Könül Şamilqızı, Türkiyə üzrə əlaqələndiricisi isə Sevgi Güvəlidir. Dünən Türkiyəyə aparılacaq klipin həmin ölkənin müxtəlif telekanallarında nümayiş etdirilməsi də nəzərdə tutulub. NİGAR musavat