Ermənilər İnternetdə əks-hücuma keçdi Özünü "Azerbaijan Defacers" adlandıran bir qrup azərbaycanlı haker Ermənistanın 18 nazirliyi və Baş Prokurluğunun İnternetdəki rəsmi saytlarını dağıdıb. Ermənistan Baş Prokurorluğunun "www.genproc.am" ünvanda yerləşən saytını dağıdan haker veb-resursun əsas səhifəsində Pekinq Olimpiadasının qızıl medalını almış cüdoçu Elnur Məmmədlinin şəkli, habelə "Biz səninlə fəxr edirik, Elnur! Saytınız Ələkbərlə Arif tərəfindən dağıdılıb! Rədd olsun ermənilərlə Rusiya! Hər zaman sizin saytlarınızı terror edərək dağıdacağıq!" yazıları var. Hücum avqustun 12-də, günorta saat 14.20-də başlayıb. Azərbaycanlı hakerlərin dağıtdıqları saytlara qoyduqları xüsusi kod veb-resursa daxil olanları Ermənistan və Rusiyaya qarşı ünvanlanmış təhdidlərlə dolu səhifəyə yönəldib. Ermənistan Baş Prokurorluğunun saytında bütün informasiya və məlumatlar, habelə daxili səhifələr toxunulmaz qalıb. Hakerlər vəd ediblər ki, Azərbaycanın erməni işğalında olan əraziləri azad edilməyincə virtual savaşlarını davam etdirəcəklər. Daxili İşlər, Xarici İşlər, İqtisadi İnkişaf, Səhiyyə və s. nazirliklərin saytlarında da eyni mənzərə müşahidə olunur. İdman və Gənclərlə İş Nazirliyinin saytında da "Ələkbərlə Arif"in yazıları peyda olub, Ədliyyə Nazirliyinin saytı işləmir, Səhiyyə Nazirliyinin saytına daxil olarkən ziyarətçilər "resursun fəaliyyətində ciddi problemlər var" xəbərdaqlığı ilə qarşılaşırlar. Mütəxəssislərin dediklərinə görə, bütün bunlar mərkəzləşdirilmiş və mütəşəkkil şəkildə həyata keçirilmiş "veb-hücum"un həyata keçirilməsinə dəlalət edir. Azərbaycanlı hakerlərin peşəkarlığına gəldikdə isə, bu səviyyəsi yüksək deyil. Belə ki, onlar Ermənistanın dövlət strukturlarının İnternetdəki rəsmi veb-resurslarının yalnız ilk səhifələrinin HTML kodlarını dağıdaraq yönləndirmə kodundan istifadə ediblər, resursun içindəki məlumat və informasiyaları, yəni kontenti məhv edə bilməyiblər. Bu isə iki məqamdan xəbər verir. Əvvəla, müxtəlik İP ünvanlardan eyni vaxtda həyata keçirilən DDos hücum və sonradan kodu sındıran "crack" proqramından yararlanan hakerlər iz qoymamaq və vaxt itirməmək üçün tələsik "geri dönüblər. İkinci məqam isə odur ki, hücum xəbərdarlıq məqsədi daşıyıb. İstənilən halda bunun bir haker və ya kiçik qrup tərəfindən həyata keçirilməsi ağlabatan təsir bağışlamır. Çox yəqin ki, troyan proqramından və rezident viruslardan yararlanan hakerlər onlarla kompüteri yoluxdurandan sonra onlardan hücumlar üçün istifadə ediblər. Ermənilər də bu hücumları cavabsız qoymaq niyyətində deyillər. Dünən "PatAr675@" və "TigForc*88#Hye" adlı iki erməni haker qruplaşması bəyan edilər ki, Azərbaycanın dövlət strukturları və kütləvi informasiya vasitələrinin saytlarına "ciddi cavab veriləcək". Bu "cavab"ın nədən ibarət olduğu isə açıqlanmır, sadəcə, deyilir: "Həmişə olduğu kimi, yenə də azərbaycanlılar İnternet müharibəsinə başlayırlar. Və həmişə olduğu kimi, onlar yenə də uduzacaqlar. Ötən qarşıdurma zamanı Azərbaycan tərəfi vəd etmişdi ki, bir daha belə uşaq əməlləri ilə məşğul olmayacaq. Lakin görünür, onlara verdiyimiz dərslər yetərli olmayıb. Bu dəfə dərs daha ciddi olacaq və balaca uşaqlara nadinclik etməyin pis iş olduğunu göstərəcəyik". Humay express