Layiqli impiçment Pərviz Müşərrəflə bağlı hadisələrin ən müxtəlif məcralarda inkişafı mümkündür Pakistan Milli Assambleyasında prezident Pərviz Müşərrəfə qarşı impiçment prosedurunun başlanması ilə bağlı müzakirələr keçirilir. Parlamentin sessiyasına yalnız iddianın təşəbbüskarları - Asif Əli Zərdarinin rəhbərlik etdiyi Pakistan Xalq Partiyası və Nəvaz Şərifin lideri olduğu Müsəlman Liqasının deputatları təşrif buyurublar. Ötən həftə hər iki partiyanın deputatları parlamentdə prezident barədə impiçment proseduruna başlamaq barədə qərar qəbul ediblər. Həmin iclasın yekununda baş nazir Yusif Rza Gilani bildirib ki, prezidentin impiçmenti proseduru nə qədər çəkəcəksə, sessiya da bir o qədər davam edəcək. "İmpiçment prosedurunu həyata keçirmək üçün deputatlar prezidentin ünvanına bir neçə ittiham irəli sürməlidirlər. Bu qərarı isə deputatların yarıdan çoxu dəstəkləməlidir" - deyə İslamabad Siyasi Tədqiqatlar Mərkəzinin rəhbəri İqbal Çima "Kommersant"a bildirib. Qeyd edək ki, 336 yerlik Pakistan parlamentində Pakistan Xalq Partiyası 121, Müsəlman Liqası isə 91 deputat yerinə malikdir. Kiçik partiyalar və müstəqil deputatlar da daxil olmaqla koalisiya 253 mandata malikdir. İndi isə məsələ Pərviz Müşərrəfə qarşı irəli sürülən ittihamların siyahısı ilə bağlıdır. Belə ki, koalisiya liderləri bəyan ediblər ki, siyahı müzakirə olunur və gələn həftə hazır olacaq. Ümumiyyətlə, parlamentarilərin prezidentə qarşı hansı iradlar ortaya qoyacaqları indidən bəllidir. Müşərrəf hazırda üç məsələ üzrə ittiham edilir. "Birincisi, o, qeyri-konstitusion yolla hakimiyyətə gəlib. İkincisi, bir neçə dəfə hərbi geyimini çıxaracağı vədini versə də, buna əməl etməyib. Bununla da xalqı aldadıb. Üçüncüsü, onu islam ekstremizmi və Əfqanıstanla sərhəddə vəziyyətin gərginləşməsində ittiham edirlər" - deyə nüfuzlu "Yinnah Daily" qəzetinin baş redaktoru Tazin Axtar bildirib. Prezidentə qarşı iddialıların siyahısını isə Əli Zərdari doldurub. Mərhum baş nazir Bənazir Bhuttonun əri Müşərrəfi Vaşinqtonun İslamabada terrorizmə qarşı mübarizə məqsədi ilə ayırdığı vəsaiti mənimsəməkdə günahlandırıb: "Hər il Birləşmiş Ştatlar bizə bir milyard dollar vəsait ayırır. Lakin bunun cəmi 300 milyon dolları gəlib orduya çatır. Çox hörmətli general Müşərrəfdən soruşmaq lazımdır, yerdə qalan 700 milyon hara yox olub?" Lakin hakim koalisiyanın ittihamlarına baxmayaraq, Pərviz Müşərrəf sona qədər mübarizə aparmaq əzmindədir. Sarayından kənara çıxmayan Müşərrəf mühafizəsini gücləndirir, ona loyal olan siyasi qüvvələrin liderləri ilə görüşür. Ötən gün isə o, yurnalistlər qarşısına çıxaraq opponetlərinə qarşı mübarizə aparacağını bəyan edib: "Əli Zərdarinin mənə qarşı irəli sürdüyü ittihamların heç bir əsası yoxdur. Mən əlimdə faktlarla sübut edəcəyəm ki, irəli sürülən ittihamların hamısı yalandır". Pakistan prezidenti əlavə edib ki, 1998-ci ildə hərbi çevriliş yolu ilə devirdiyi Nəvaz Şərif Pakistanın maraqlarını əlində rəhbər tutmur. Yəni ondan qisas almaq hissi ilə yaşayır. Prezidentin tərəfdarları da əllərini yanlarına salıb dayanmayıblar. Onlar Əli Zərdari və Nəvaz Şərifə qarşı bir sıra ittihamlar siyahısı hazırlayıblar. "Bizim millətə bu şəxslər barəsində deməyə sözümüz var" - deyə hakim Pakiistan Müsəlman Liqasının nümayəndəsi vurğulayıb. Deputatların sözlərinə görə, koalisiya prezidentə qarşı ittihamlarını irəli sürən kimi onlar da analoyi ittihamlarını irəli sürəcəklər. Prezidentin mətbuat xidmətinin rəhbəri Rəşid Qureyşi bildirib ki, prezident koalisiyanın irəli sürdüyü ittihamlardan qorxmur: "O, impiçmenti layiqincə qarşılayacaq. Vəkillər və onun tərəfdarları isə parlamentdə onu müdafiə etmək iqtidarındadırlar". Pakistanlı müşahidəçilər hesab edirlər ki, prezident son anda qəti addım ata, parlamenti buraxa və hökuməti istefaya göndərə bilər. Bu ssenarinin reallaşması isə böyük ehtimalla Pakistan hərbçilərinin tutacağı mövqedən asılı olacaq. Belə ki, onlar hər zaman vəziyyət gərgin olanda öz mövqelərini ortaya qoyurlar. Lakin Pakistan Silahlı Qüvvələrinin komandanı Asəf Kəyani hələ ki susmağa üstünlük verir. Müşərrəfin impiçmenti ilə eyni vaxtda "Əl-Qaidə" terror təşkilatı ölkənin Əfqanıstanla sərhəd ərazilərində mövqelərini gücləndirib. ABŞ kəşfiyyat xidmətinin nümayəndəsi Teda Gistaro da bu qənaətdədir. Vaşinqtonda Yaxın Şərq siyasəti institutunda keçirilən iclasda çıxış edən Teda Gistaronun sözlərinə görə, terrorçular həmin ərazilərdə özlərini çox təhlükəsiz hiss edirlər. Onlar İslamabada tabe olmayan qruplaşmalarla mövqelərini gücləndirməyə müvəffəq olublar. "AFR" isə belə bir məlumat yayıb ki, Əfqanıstan ərazisindən atılan raketlər nəticəsində ən azı 10 nəfər həlak olub. Ehtimal etmək olar ki, prezident Pərviz Müşərrəf "Əl-Qaidə" terror təşkilatının gücləndiyini bəhanə edərək ölkədə fövqəladə vəziyyət elan edəcək. Məhz bununla da o, rəqiblərini bir növ müəyyən müddətə susdurmaq imkanı əldə edə bilər.