Qərbin Tiflisə dəstəyi real müstəviyə keçir "Gürcüstan itkilərini bir neçə ilə bərpa edə biləcək, ancaq Rusiyanın imicini bərpa etməsi daha çətin olacaq" Qərbin Rusiyanın işğalına məruz qalmış Gürcüstana dəstəyi artmaqdadır. Polşa prezidenti Lex Kaçinski, Litva prezidenti Valdas Adamkus, Estoniya prezidenti Hendrik İlves və Ukrayna prezidenti Viktor Yuşşenko Azərbaycandan keçməklə Tiflisə gediblər. Qeyd edək ki, Cənubi Osetiya ətrafında vəziyyətin stabilləşməyə başladığı bir dönəmdə rusların sayəsində mövcud olan və dəstəklənən abxaz separatçıları Kodor dərəsini ələ keçirmək üçün hücuma keçiblər və bölgədən ziddiyyətli xəbərlər gəlir. "Atlas" Araşdırmalar Mərkəzinin rəhbəri Elxan Şahinoğlu deyir ki, həmin ölkələrin prezidentlərinin səfəri gürcülərə dəstək anlamı daşıyır. Ramiz Mikayıloğlu Bu, həm də gürcü lideri Mixail Saakaşvili ilə daha sıx əməkdaşlığa malik dövlət başçılarıdırlar. Ancaq səfər sadəcə, mənəvi dəstək anlamındadır. Aydındır ki, Rusiya-Gürcüstan savaşından sonra onlar Tiflisə hər hansı hərbi dəstək verə bilməzlər. Həm də artıq savaşa ara verilib. Elxan Şahinoğluna görə, rus-gürcü savaşını iki hissəyə bölmək olar. İsti savaşda Moskva qələbə çaldısa, informasiya savaşında Tiflis, prezident Mixail Saakaşvili qələbə qazandı. Çünki faktiki bütün dünya Rusiyanın bu işğalçılıq hərəkətini qınadı. Proseslərin sonrakı gedişində şimal qonşumuzu Qərbin daha çox qınadığını görəcəyik. Onun sözlərinə görə, Fransanın vasitəçiliyilə Moskvayla Tiflis arasında bir anlaşma imzalanmaq üzrədir. Ancaq bu da o demək olmayacaq ki, Rusiyayla bağlı problemlərə son qoyulur. ABŞ-ın tələbi ilə artıq NATO-Rusiya Şurasının iclası təxirə salınıb. Bu, Moskvaya açıq işarədir, növbəti mərhələdə onun "Böyük səkkizlər"dən uzaqlaşdırılması məsələsi gündəmə gələ bilər. Qərb Rusiyaya anlatmağa çalışır ki, işğalçılıq siyasəti yürüdənin sivil ölkələrlə bir arada olması yolverilməzdir. Ekspertin qənaətinə görə, artıq əvvəllər çox hədələyici tonda danışan Moskva da ehtiyatlı davranmağa başlayıb. Ruslar da başa düşürlər ki, çox zilə qalxa bilməzlər, bu iş onlara baha başa gələcək. Söhbət ondan gedir ki, şimal qonşumuz bir daha dünyada imicini korlayıb. Həmin imicin yenidən bərpası üçün uzun illər lazımdır. Gürcüstan itkilərini bir neçə ilə bərpa edə biləcək, ancaq Rusiyanın imicini bərpa etməsi daha çətin olacaq: "Təəssüflə vurğulamalıyıq ki, hərbi baxımdan Gürcüstan uğursuzluğa düçar oldu. Mixail Saakaşvili Sxinvaliyə hücum əmri verəndə riskli bir addım atmışdı. Ancaq o nə etməliydi? İllərlə uzanan danışıqlardan sonra ərazi bütövlüyünü bu yolla bərpa etməyə çalışdı, amma qeyri-adekvat cavab aldı. Rusiya tək Cənubi Osetiyayla kifayətlənmədi, Tiflisin yaxınlığı da bombalandı, çox irəlilədilər. Bunun özü dünyada Rusiyaya təzyiqli münasibətin formalaşmasına şərait yaratdı. Abxaziyaya gəlincə, əslində Kodor dərəsini abxazlar götürməyib, bunu yenə də ruslar ediblər. Hərbi uğurdan başı gicəllənən Moskva digər problemlərin də həllinə girişib, Kodor dərəsini ələ keçirib. Amma Rusiyanın qazandığı hərbi uğura baxmayaraq, dünya dövlətləri yenə də həmin iki bölgənin müstəqilliyini tanımayacaqlar". Elxan Şahinoğlu Moskvanın "hərbi uğurunun" onun üçün ciddi başağrısı yaradacağına əmindir. Rusiyanın müttəfiqləri arasında elələri var ki, bu addımları bəyənmirlər. Məsələn, Çin bununla bağlı heç vaxt Rusiyanın yanında yer almaz. Çünki Pekinin özünün separatizm problemləri var. Rusiya Cənubi Osetiya və Abxaziyanı tanıyacaqsa, Çinin özündə problemlər yaşanacaq: "Göz önündədir ki, Rusiya rəhbərliyi bu iki separatçı bölgənin tanınması ilə bağlı mövqelərindən də bir qədər geri çəkiliblər. Yəqin ki, yaxın günlərdə Qərb öz sözünü tam deyəcək. Rusiya təşkilatdardan sıxışdırılacaq, iqtisadi təzyiqlərlə üzləşəcək". Ekspert bir məqama da diqqət çəkir. Savaş getdiyi günlərdə tək Gürcüstan yox, Rusiya iqtisadiyyatı da xeyli itirib. Birjalarda böyük çalxalanmalar yaşanıb, rus şirkətlərinin aksiyalarının geri satılması prosesi baş verib. Rus iqtisadçıları vurğulayıblar ki, müharibə bir neçə gün də davam edərsə, ölkə iqtisadiyyatında böyük təlatümlər yaşana bilər: "Mənə elə gəlir ki, bundan sonra da Rusiya iqtisadiyyatında təlatümlər davam edəcək. Çünki Qərb investorları artıq qorxdular. "Hərbi qələbə"dən Rusiya daha çox itirəcək". "Atlas" Araşdırmalar Mərəkzinin rəhbəri bildirdi ki, baş verənləri tək Gürcüstan yox, Azərbaycan və digər bölgə ölkələri də müşahidə edərək dərs götürüblər. Bu, Gürcüstanı NATO-ya daha da yaxınlaşdırır. O xatırlatdı ki, NATO-nun Buxarest zirvə görüşündə iki ölkə Gürcüstanın Alyansa üzvlüyünü bir qədər əngəlləyib. Söhbət Fransa və Almaniyadan gedir: "Məncə, baş verən son olaylardan sonra Fransa və Almaniya dairələri də başa düşür ki, Gürcüstanı Rusiyadan xilas etmək lazımdır". xalqcebhesi