Qərb Rusiyanın işğalını dayandırdı Gürcüstana dəstək vermək üçün beş ölkənin prezidenti Tiflisə gəlib Dünən səhər Rusiya Gürcüstandakı hərbi əməliyyatları dayandırmağı qərara alıb. Prezident Dmitri Medvedyev bunu müdafiə naziri Anatoli Serdyukov və baş qərargah rəisi Nikolay Makarovla görüşü zamanı açıqlayıb və Müdafiə Nazirliyinin və Baş Qərargahın hesabatlarına əsasən bölgədə təhlükəsizlik təmin olunduğu üçün belə bir qərar verdiyini söyləyib. Dmitri Medvedyev deyib ki, hesabatları sayəsində gürcü aqressivliyinin sülhə yönləndirilməsi məqsədiylə keçirilən əməliyyatın məqsədinə çatdığı qənaətinə gəlib. Ramiz Mikayıloğlu "Aqressor ciddi itkilər verib və hərbi birlikləri dağıdılıb. Ancaq qarşı tərəfdən hər hansı bir zərbə endirilərsə, həmin zərbənin qaynağına anında cavab verməyinizi istəyirəm". Rusiyanın xarici işlər naziri Sergey Lavrov isə bundan sonra Cənubi Osetiyada sülhməramlıların tərkibində gürcü əsgərlərinin olmasını qəbul etməyəcəklərini bildirib. O, deyib ki, gürcü hökumətinə heç bir etimadımız qalmayıb. Bununla belə, Sergey Lavrov Gürcüstan prezidenti Mixail Saakaşvilini devirmək kimi bir planın olmadığını da vurğulayıb. Ancaq Moskva Mixail Saakaşvililə danışıqlar aparmayacaq. Sergey Lavrov Mixail Saakaşvilinin Rusiya vətəndaşlarına qarşı cinayət törətdiyini və hər zaman özünü haqlı saydığını bildirib: "Tövləyə doldurulmuş qızları yandıran Mixail Saakaşvili Amerika dəyərlərini müdafiə etdiyini deyir. Hesab edirik ki, o, bizim tərəfdaşımız ola bilməz. Biz gürcü xalqına dərin hörmət bəsləyirik və bu xalqın müdriklik nümayiş etdirməsini gözləyirik". O hesab edir ki, Gürcüstanda Cənubi Osetiyanın atəşə tutulduğu bütün regionlar hərbsizləşdirilməlidir. Sergey Lavrov Cənubi Osetiyada baş verənlərin araşdırılması xahişilə beynəlxalq tribunala müraciət etməyə hazırlaşdıqlarını və Gürcüstanda cinayətkar əmrləri kimin verdiyini öyrənmək lazım olduğunu dilə gətirib. Qərb hərəkətə keçir, ABŞ-ın qəzəbi özünü biruzə verir Dünən Polşa prezidenti Lex Kaçinski Rusiya və Gürcüstan arasında vasitəçilik etmək məqsədiylə Ukrayna və Pribaltika ölkələrinin dövlət başçılarıyla Tiflisə gedəcəklərini bildirib. O, bu plan barədə avqustun 11-də gecə telefonla ABŞ prezidenti Corc Buşla danışdıqlarını və Corc Buşun həmin plana tam dəstək verdiyini nəzərə çatdırıb. Gürcüstan Milli Təhlükəsizlik Şurasının katibi Aleksandr Lomaya da məlumatı təsdiqləyib və Fransanın dövlət başçısının da onların arasında yer alacağını deyib. Beləliklə, Tiflisə Fransa prezidenti Nikola Sarkozi, Polşa prezidenti Lex Kaçinski, Litva prezidenti Valdas Adamkus, Estoniya prezidenti Hendrik İlves və Ukrayna prezidenti Viktor Yuşşenko gələcəklər. Aleksandr Lamaya deyib ki, bu, həmin ölkələrin prezidentlərinin gürcü xalqına dəstəyinin ifadəsidir: "Onlar işğalçı qoşunlar Gürcüstanı tərk edənə qədər gürcü xalqı ilə bərabər olmaq niyyətindədirlər". Dünən isə ABŞ-ın veto qoyması səbəbindən NATO-Rusiya Şurasının fövqəladə toplantısını keçirmək də mümkün olmayıb. Xatırladaq ki, belə bir toplantının keçirilməsini Moskva istəyib. Brüsseldə Gürcüstanın xarici işlər nazirini isə NATO-nun baş katibi Yaap de Hoop Sxeffer qəbul edib, nazir Alyansın toplantısına da qatılıb. ABŞ prezidenti Corc Buş da sərt bəyanat verib. O, Moskvanın Gürcüstana qarşı hərəkətlərinin qəbuledilməz olduğunu vurğulayıb. Onun sözlərinə görə, Rusiya xalqın seçdiyi gürcü hökumətini devirməyə cəhd göstərdiyinə dair təsəvvür yaranır: "Bu hərəkətlər də Moskvanın dünyadakı mövqelərini ciddi şəkildə sarsıdır, bu ölkənin ABŞ və Avropa ilə münasibətlərini təhlükə altında qoyur". Kodor dərəsində vəziyyət gərginləşib Dünən Rusiya Müdafiə Nazirliyi rus hərbi hissələrin Senaki şəhərindən çəkildiyi barədə məlumat da yayıb. Bu, Gürcüstanın Cənubi Osetiyaya qarşı hərbi müdaxiləsi ilə bağlı təhlükənin aradan qalxmasıyla əlaqələndirilib. Məlumat üçün deyək ki, avqustun 11-dən 12-nə keçən gecə rusların Qori şəhərini ələ keçirdikləri barədə məlumat yayılmışdı. Ancaq Mixail Saakaşvili Qorinin ələ keçirildiyi və Tiflisə hücum başladığı barədə xəbərləri təkzib edib. Gecə yarısı canlı efirdə çıxış edən Gürcüstanın baş naziri Lado Qurgenidze isə Rusiya hərbçilərinin Poti şəhərinə daxil olduğunu bildirib. Ancaq Rusiya Müdafiə Nazirliyi bunu təkzib edərək şəhərə yalnız qısa müddətə kəşfiyyatçıların daxil olduğunu və bir qədər sonra çıxdığını açıqlayıb. Rusiya Müdafiə Nazirliyinin yaydığı məlumatda yazılır ki, rus sülhməramlıları gürcü-osetin və gürcü-abxaz münaqişəsi zonalarında dislokasiya olunub və Tiflisə irəliləmək planları yoxdur. Rusiya qoşunlarının Qori şəhərinə daxil olmadığını da bəyanlayıb. Cənubi Osetiya ətrafında vəziyyətin stabilləşməsinə ümidlərin artdığı bir dönəmdə, rusların dəstəyilə Kodor dərəsinə hücuma keçən abxaz separatçıları Acara kəndini tutub. Separatçılar mühacirətdə olan Abxaziya hökumətinin inzibati mərkəzi olan Acara kəndindəki binada Gürcüstan bayrağını endirərək öz bayraqlarını asıblar. Oyuncaq rejimin rəhbəri Sergey Baqapş ordusunun Kodor dərəsinin böyük hissəsinə nəzarəti ələ keçirdiyini və Gürcüstan sərhədi istiqamətində irəlilədiyini deyib. O, günün sonuna kimi əraziyə nəzarəti tam ələ keçirəcəklərini düşünür. Rəsmi Tiflis isə məsələyə münasibətini açıqlamayıb. xalqcebhesi