Əziz Mustafa [email protected]/* */ Gürcüstana müdaxilə Rusiyanın sonu deməkdir Ötən həftənin sonlarından başlayaraq bütün dünyanın diqqəti Gürcüstana yönəlib. Buna da səbəb Gürcüstanın beynəlxalq təşkilatlar səviyyəsində tanınmış ərazi bütövlüyünü bərpa etmək üçün Cənubi Osetiyaya hərbi qüvvə yeritməsi və nəticədə bölgədə yeni bir siyasi böhranın əmələ gəlməsidir. Əlbəttə, gürcülərin Cənubi Osetiyaya hərbi qüvvə yeridərək ölkənin ərazi bütövlüyünü bərpa etmək cəhdləri bütün hallarda beynəlxalq hüquq normaları çərçivəsində baş verir və burada qeyri-adi nə isə axtarmaq, bəlkə də, məntiqsizlik olardı. Çünki son 16-17 il ərzində Gürcüstan özünün tarixi ərazisi üzərində nəzarəti itirib və hər dəfə bu məsələni dinc vasitələrlə aradan qaldırmaq istəyəndə Rusiyanın güclü müqaviməti ilə üzləşib. SSRİ dağılan ərəfədə imperiyanı qoruyub saxlamaq üçün postsovet məkanında etnik separatizmi körükləyərək yüz minlərlə günahsız insanın qanının axıdılmasına səbəb olan Rusiya bu gün də bölgəni nəzarəti altında saxlamaq üçün Abxaziya, Cənubi Osetiya, Dnestryanı və Dağlıq Qarabağda hakimiyyətə gətirdiyi oyuncaq rejimlər vasitəsilə separatçıları dəstəkləməkdə davam edir. Bu baxımdan Gürcüstanın ərazi bütövlüyünü bərpa etmək üçün Cənubi Osetiyada başlatdığı hərbi əməliyyatlara Rusiyanın verdiyi sərt reaksiya və açıq şəkildə adıçəkilən ölkənin ərazisini işğal etməyə başlaması Moskvanın həm bölgə xalqları, həm də Avropa və Asiya üçün təhlükə mənbəyi olaraq qalmaqda davam etdiyini bir daha aydın şəkildə göstərdi. Qeyd edək ki, Gürcüstanın müstəqil siyasət yeritməsi və NATO-ya üzv olmaq üçün cəhdlər etməsi son illərdə Kremlin başağrısına çevrilmişdi. Ona görə də Rusiya Gürcüstanın son addımlarından bölgədə yenidən nəzarəti həyata keçirmək üçün istifadə etməyə başlayıb. Faktiki olaraq, bölgədə yeni işğalçılıq siyasətinə əl atan Kreml beynəlxalq hüquq normalarına məhəl qoymadan Gürcüstanın iri şəhərlərini bombalamaqda və onlarla dinc sakini öldürməkdə davam edir. Zənnimizcə, Rusiya bununla Kosova məsələsində Qərbdən aldığı ağır zərbənin əvəzini çıxmaq və iki çirkin niyyətini həyata keçirmək istəyir. Birincisi, Rusiya separatçı qurumlarla Tbilisi arasında Gürcüstanın ərazi bütövlüyünü şübhə altında qoyacaq alçaldıcı sülh anlaşmasının imzalanmasına nail olmaq və bu yolla Cənubi Osetiya və Abxaziya ərazilərinin ilhaqına zəmin hazırlamaq istəyir. İkincisi, Rusiya yaranmış son vəziyyətdən istifadə edərək Gürcüstanı NATO-ya üzvlük niyyətlərindən birdəfəlik əl çəkməyə məcbur etmək və onu yenidən özünün hərbi-siyasi və iqtisadi təsir dairəsinə salmağa cəhd edir. Əlbəttə, bu gün Rusiyanın Gürcüstan ərazilərini açıq şəkildə işğal etməyə başlaması dünya xalqları tərəfindən narahatlıqla qarşılanır. Amma hadisələrin gedişi göstərir ki, əslində Rusiya Gürcüstana müdaxilə etməklə özünün növbəti dəfə parçalanması üçün zəmin hazırlayıb və Moskvanın bölgədə qazandığı son “uğurlar” rus xalqının uçuruma sürüklənməsindən başqa bir şey deyil. Yeri gəlmişkən, onu da deyək ki, Rusiyanın Gürcüstana müdaxilə etməsini 1480-ci ildə monqol-tatar (Qızıl Orda) xanı Əhmədxanın Moskva üzərinə yürüşü ilə müqayisə etmək olar. O vaxt Əhmədxanın Moskvanı cəzalandırmaq istəyi onun öz əleyhinə çevrildi və nəhəng bir imperiyanın sonunun yaxınlaşması ilə nəticələndi. Zənnimizcə, bu gün Gürcüstan ərazilərini işğal edən və monqol-tatar imperiyasının yerində yaranan Rusiyanı da eyni tale gözləyir. Digər tərəfdən də, zənnimizcə, Rusiyanın bu hərəkətlərini Qərb də cavabsız qoymayacaq. Hər halda son hadisələrlə bağlı Qərbdə antirusiya ovqatının həddindən artıq artması göz qabağındadır və ruslara olan belə bir nifrət soyuq müharibə dövründə SSRİ-yə olan nifrəti xartırladır. Belə ehtimal etmək olar ki, Qərb Gürcüstanın Kreml tərəfindən diz çökdürülməsinə imkan verməyəcək və Rusiyanı hərbi qüvvələrini adıçəkilən ölkədən çıxarmağa məcbur edəcək. Çox güman ki, Qərb növbəti mərhələdə vaxtilə Çeçenistana münasibətdə buraxdığı səhvlərdən nəticə çıxararaq Rusiyanın yenidən dünya xalqları üçün təhlükə mənbəyinə çevrilməsinə imkan verməyəcək və onu öz silahı ilə vuraraq daxilindəki xalqların milli-azadlıq mübarizəsini dəstəkləyəcək. Çünki dünyanı yalnız bu yolla Rusiyadan gələn təhlükələrdən xilas etmək olar.zaman