Vasili İstratov: “Rusiya Azərbaycanın ərazi bütövlüyünü tam dəstəkləyir”

SON XƏBƏRLƏR

Vasili İstratov: “Rusiya Azərbaycanın ərazi bütövlüyünü tam dəstəkləyir”

2021.10.20, 07:36

Gunaz.tv

Vasili İstratov: “Rusiya Azərbaycanın ərazi bütövlüyünü tam dəstəkləyir”

“Rusiya Azərbaycanın ərazi bütövlüyünü tamamilə dəstəkləyir və bu məsələdə heç bir dəyişiklik yoxdur”. APA-nın məlumatına görə, bu sözləri Rusiyanın Azərbaycandakı səfiri Vasili İstratov bu gün keçirdiyi mətbuat konfransında deyib. “Əgər beynəlxalq hüquq işğalçını cəzalandırmaq üçün əməliyyat keçirməyə imkan verirsə, onda niyə Azərbaycanın işğal altındakı ərazilərinin azad olunması barədə BMT Təhlükəsizlik Şurasının 4 qətnaməsinin həyata keçirilməsi üçün tədbirlər görülmür?” sualına rus diplomat belə cavab verib: “Siz istəyirsiniz bunu Rusiya həyata keçirsin? Biz digər ölkələrlə birlikdə vasitəçilik edirik və çalışırıq ki, münaqişə tərəfləri yaranmış vəziyyətdən çıxış yolu tapsınlar”. Səfir danışıqların alternativinin olmadığını, danışıqların artıq bərpa edildiyini söyləyib. Rusiyanın xarici işlər naziri Sergey Lavrovun Gürcüstan prezidenti Mixail Saakaşvilini istefaya çağırmasına toxunan V.İstratov hesab edir ki, bu, Gürcüstan xalqı, parlamenti və Saakaşvilinin özü tərəfindən edilə bilər: “Lavrovun dediklərini bir tərəfdaş kimi Saakaşvili ilə danışıqlar aparmağın çətin olması kimi dəyərləndirmək lazımdır, Cənubi Osetiyada aparılmış əməliyyatın məqsədi kimi yox”. Səfir nazirin bəyanatından sitat gətirərək bildirib ki, Gürcüstanda hakimiyyət dəyişikliyi mexanizmi nə Rusiya, nə də digər ölkədən asılı deyil, bunu yalnız Gürcüstan özü edə bilər. Diplomatın sözlərinə görə, Gürcüstanın NATO-ya daxil olmaq istəyinin də aparılmış əməliyyata heç bir aidiyyəti yoxdur: “Rusiya öz vətəndaşları və sülhməramlılarının təhlükəsizliyini qorumaq üçün əməliyyat həyata keçirib”. Cənubi Osetiya əhalisinin 80 faizinin hansı əsaslarla Rusiya vətəndaşı olması məsələsinə aydınlıq gətirən səfirin sözlərinə görə, Rusiyanın vətəndaşlıq haqqında qanunu SSRİ dağıldıqdan sonra uzun müddət onun keçmiş vətəndaşlarının Rusiya vətəndaşlığı almasına imkan verib: “Həmin imkandan Azərbaycan vətəndaşları da yararlanıblar”. “Dağlıq Qarabağda hazırda neçə Rusiya vətəndaşı var və əgər Azərbaycan öz ərazi bütövlüyünü hərbi yolla bərpa etmək istəsə, Rusiya Gürcüstana qarşı həyata keçirdiyi əməliyyatı burada da təkrarlaya bilərmi” sualını cavablandıran diplomat Dağlıq Qarabağda yaşayan Rusiya vətəndaşlarının sayı barədə məlumatı olmadığını deyib. Rusiyanın Cənubi Osetiyada öz vətəndaşlarını və sülhməramlılarını müdafiə etmək üçün əməliyyat keçirdiyi qeyd edən səfir Rusiyan vətəndaşlarının dünyanın istənilən ölkəsində yaşadığını bildirib və analogiya aparmaq istəməyib. Rusiya-Gürcüstan qarşıdurması zamanı Azərbaycanın nümayiş etdirdiyi mövqeyə münasibət bildirən V.İstratov rəsmi Moskvanın Azərbaycanın mövqeyini, o cümlədən səslənən bəyanatları anlayışla qarşıladığını qeyd edib. LENT.AZ

GUNAZ.TV

SON XƏBƏRLƏR