Gürcü mətbuatında rus şayiəsi İldırım Məmmədov: "Rusiya və Ermənistan çalışır ki, Azərbaycanla Gürcüstan arasında olan münasibətlərə kölgə düşsün" Rusiyanın Gürcüstana qarşı əməliyyatlarında Ermənistandakı hərbi bazalarından yararlanması, Gümrüdəki hərbi bazadan qalxan rus qırıcılarının gürcü şəhər və kəndlərini, o cümlədən, Marneulini bombalaması ciddi əks-səda doğurub. İşğalçı Ermənistanın faktiki olaraq Rusiyanın Gürcüstana qarşı təcavüzünə dəstək verməsi, Gümrüdən qalxan rus qırıcılarının qonşu ölkəni bombalaması rəsmi İrəvanın yürütdüyü qeyri-konstruktiv siyasətin nəticəsidir. Regiondakı enerji-nəqliyyat layihələrindən kənarda qalan Ermənistan rus qırıcılarının ərazisindən qalxmağa icazə verməklə faktiki olaraq Rusiyanın "forpostu" olmasını, regionda təhlükəli siyasət yeritdiyini təsdiqlədi. Tural Bu ərəfədə Gürcüstan KİV-ləri guya rus qırıcılarının Azərbaycandan qalxması və Gürcüstanın Maxata dağındakı radar idarəetmə məntəqəsini bombalaması haqqında xəbərlər yayıb. Azərbaycan ərazisində heç bir xarici, o cümlədən, rus hərbi bazasının olmadığı və buna görə də rus qırıcılarının ölkəmizin ərazisindən qalxmasının qeyri-mümkünlüyü məlumdur. Elə Azərbaycan Silahlı Qüvvələrinin baş qərargah rəisi, general-polkovnik Nəcməddin Sadıqov Rusiya-Gürcüstan müharibəsi başlayandan Azərbaycanın hava sərhədini heç bir ölkənin təyyarəsinin pozmadığını bildirib. Onu da deyib ki, Azərbaycan özünün hava məkanından qonşu dövlətlərə qarşı istifadəyə, ölkənin hava sərhədlərinin pozulmasına yol verməyib və verməyəcək" Ekspertlərin fikrincə, rus qırıcılarının Azərbaycanın hava sərhədindən Gürcüstan ərazisinə daxil olması haqqında yayılan məlumatlar əslində məqsədli şəkildə həyata keçirilir. Hərbi ekspert İldırım Məmmədov Moskvanın İrəvandakı hərbi bazalarından istifadəsinin təkcə Gürcüstan üçün deyil, həm də Azərbaycan üçün də təhlükəli məqam olduğunu söylədi. Eyni zamanda bildirdi ki, rus təyyarələrinin Azərbaycan ərazisindən keçərək Gürcüstanı bombalaması haqqında yayılan informasiyalar əsasən gürcü mətbuatında gedən məlumatlardır: "Qeyri-rəsmi yayılan xəbərlər isə Gürcüstanda yaşayan rus soylu vətəndaşlardan qaynaqlanır. Müharibənin yazılmamış qanunlarından biri də şaiyələr yayaraq xaos yaratmaq və dost ölkələri düşmən kimi qələmə verməkdir. Əslində bu kimi məlumatların yayılmasında müəyyən məqsədlər var. Bir çox qüvvələr, xüsusən Rusiya və Ermənistan çalışır ki, Azərbaycanla Gürcüstan arasında olan münasibətlərə kölgə düşsün. Həm də bu gün Kreml bir növ gürcülərdə qorxu yaratmağa çalışır ki, guya artıq Azərbaycan da "forpost" Ermənistan kimi birbaşa olaraq Rusiyaya qapı açır və Gürcüstan dörd bir tərəfdən təklənib, hərbi, siyasi, iqtisadi blokadaya alınıb". Azərbaycan Müdafiə Nazirliyinin bununla bağlı ortaya konkret mövqe qoyduğunu deyən ekspert fikrincə, Rusiya və gürcü mətbuatında gedən yazıların böyük qismi yerli əhalinin sözlərinə söykənir ki, burada da müəyyən yanlışlıqlar ola bilər: "Məsələn, Gürcüstan ərazisinə daxil olan rus qırıcıları manevrlər edirlər və bu manevrlər də günəş şüalarından tutmuş digər amillərə kimi hesablanır. Yəni ola bilər ki, sərhəddi keçən qırıcılar ilk həmlədə Azərbaycan istiqamətindən gələn kimi görünsünlər. Amma rəsmi Bakının buna imkan yaratması ciddi siyasi və eləcə də strateji səhv olar və bu mümkün deyil". Azərbaycanın hava hücumundan effektiv müdafiə sisteminin olmamasını da vurğulayan İldırım Məmmədov vaxtilə İran təyyarələrinin az qala Bakıya qədər gəlməsini xatırlatdı: "Bir şeyi dəqiq bilməliyik ki, bu gün Gürcüstanın başına gətirilənlərin hamısı Azərbaycanı da gözləyir. Əgər Azərbaycan Qarabağın azadlığı uğrunda ayağa qalxsa, Moskva nəinki hava hücumundan aktiv yararlanacaq, hətta Ermənistan silahlı qüvvələrilə birgə öz qoşunlarını da bu əməliyyatlara cəlb edəcək. Ona görə də bu gün Gürcüstana açıq şəkildə dəstək vermək lazımdır ki, sabah biz də öz ərazi bütövlüyümüzü bərpa etməyə çalışanda köməksiz qalmayaq. Ən azı Ukrayna kimi Azərbaycan da Tiflisin müraciətini gözləmədən humanitar yardımlar göstərməli idi". Ekspert Ermənistanın Gümrü rayonundakı rus bazasında faktiki olaraq 4 motoatıcı diviziyanın silah-sursatının yığıldığını bildirdi: "Ruslar Gürcüstan bazalarından çıxarılan və döyüş qabiliyyəti olan bütün texnikanı Gümrüyə yığdılar, qalan metallomları isə Azərbaycan ərazisi vasitəsilə öz zavodlarına apardılar. Hazırda Ermənistanın hava hücumundan müdafiə və sərhəd sistemləri də əslində Rusiya qoşunlarının əlindədir. Bu gün Ermənistanda yerləşən rus qoşunlarının şəxsi heyətinin yetmiş faizi erməni əsilli vətəndaşlardır. Ona görə rus qırıcılarının Gümrüdən qalxıb Tiflisi bombalaması Tiflislə yanaşı Bakıya da zərərdir. Eyni təzyiqlərə, hücumlara məruz qalan Gürcüstan və Azərbaycan ərazi bütövlüyü, müstəqillik məsələsində birlik, həmrəylik nümayiş etdirməlidir". xalqcebhesi