DEPUTATLARIMIZ QARABAĞDA DÖYÜŞMƏYƏ HAZIRDIR Onlar gürcüstanlı həmkarlarının addımını təqdir edir Xəbər verildiyi kimi, Gürcüstanda yaşayan 50 azərbaycanlı könüllü olaraq müharibəyə gedib. 50 nəfərlik könüllü dəstəyə Gürcüstan parlamentinin azərbaycanlı üzvü Azər Süleymanov rəhbərlik edir. A.Süleymanov açıqlamasında bildirib ki, müharibəyə getmək istəyən soydaşlarımızın sayı daha çoxdur. Hələlik qərara gəliblər ki, ilk 50 nəfərlik qrup döyüşə qatılsın. Gürcüstan parlamentinə yeni seçilmiş Azər Süleymanovun yaşadığı dövlətin ərazi bütövlüyü uğrunda savaşa qoşulması Azərbaycanda da təqdir edilir. Küçədə sadə insanlar arasında keçirdiyimiz sorğuya qatılanların cavabları da bunu deməyə əsas verir. 50 nəfər arasında keçirdiyimiz sorğuda əksər respondentlər Azər Süleymanovun doğru hərəkət etdiyini söylədilər. Onlar bununla yanaşı Qarabağda müharibə başlayacağı və ya Rusiyanın hücumuna məruz qalacağımız halda Azərbaycan parlamentinin üzvlərindən də gürcüstanlı həmkarları kimi hərəkət etmələrini istədiklərini bildirdilər. Bəs Azərbaycan parlamentinin deputatları bu barədə nə düşünür? Müharibə başlasa, onlar könüllü şəkildə döyüşə getməyə hazırdırmı? Müsavat deputat qrupunun üzvü Arzu Səmədbəyli deyir ki, müharibə başlasa, özü də daxil olmaqla müsavatçı deputatların hamısı vətən uğrunda döyüşlərə könüllü gedəcəklər: “Biz ölkəmizdə demokratiyanın bərqərar olması uğrunda mübarizədə həmişə öndə olduğumuz kimi vətən uğrunda döyüşlərdə də öndə olacağıq. Buna heç bir şübhəniz olmasın”. A.Səmədbəyli vurğuladı ki, Azərbaycan da Rusiyanın hərbi müdaxiləsindən sığortalanmayıb: “Çünki Rusiya beynəlxalq hüquq və normalara məhəl qoymadan dünyanın gözü qarşısında təcavüzkar siyasət aparır. Müstəqilliyi BMT və bütün dünya tərəfindən tanınan dövləti işğal etmək istəyir. Bu addımla Rusiya həm də bölgədəki bütün separatçıların arxasında dayandığını sübut etdi. Rusiya təcavüzkar siyasəti ilə özünün mahiyyətini ortaya qoyub və özünü dünyanın hədəfinə çevirib. Rusiyanın heç bir beynəlxalq hüququ və rəyi nəzərə almadan bildiyini etməsi və Cənubi Qafqazı tam nəzarət altına götürməsi planının olması Azərbaycan üçün də siqnaldır. Ona görə də Azərbaycan xalqı və dövləti hər şeyə hazır olmalıdır”. Müsavat deputat qrupunun digər üzvü Pənah Hüseyn bildirdi ki, müasir dövrdə döyüşlər daha çox peşəkar ordu ilə aparılmalıdır. Peşəkar olmayan kənar şəxslərin, vətəndaşların döyüşə getməsi çətin dönəmlərin yarandığı halda ola bilər: “Azərbaycan üçün belə bir situasiya yaransa, təbii ki, döyüşməyə hazıram. Hər bir adam torpağını istənilən formada qoruya bilər. Fərdi şəkildə də döyüşə getmək olar. Könüllü dəstə də yaradıla bilər. Bütün hallarda məqsəd torpağın işğal edilməsinin qarşısını almaq, ölkənin suverenliyini saxlamaq olmalıdır. Bu məqsədlər uğrunda ələ silah götürüb vuruşmağa hazırıq”. Ümid Partiyasının sədri, millət vəkili İqbal Ağazadə bildirdi ki, hazırda istənilən şəxs bu suala “əlbəttə ki, gedərəm” cavabını verər: “Amma mən bircə onu deyə bilərəm ki, Qarabağda qanlı döyüşlər getdiyi zaman könüllü olaraq müharibədə iştirak etmişəm. Bir daha müharibə başlayarsa, əlimdə silah vətənin müdafiəsi üçün nə lazımdırsa yenə edə bilərəm”. İ.Ağazadə qeyd etdi ki, Rusiya Cənubi Qafqazda onun iradəsinə zidd olaraq NATO qüvvələrinin yerləşdirilməsi məsələsində müstəqil mövqe nümayiş etdirən Gürcüstanı cəzalandırmaq və bu ölkənin müstəqilliyini nominal həddə endirmək istəyir: “Məsələnin mahiyyətində bu amil dayanır. Azərbaycan hakimiyyəti bu məsələlərdə hələlik Rusiyanın ayağını tapdalamayıb. Ona görə də düşünmürəm ki, Gürcüstana qarşı atılan bu addım Azərbaycana qarşı da həyata keçirilsin”. Böyük Quruluş Partiyasının sədri, deputat Fazil Qəzənfəroğlu isə cavabında bildirdi ki, vətən savaşında təbii ki, hər bir vətəndaş iştirak etməlidir. Millət vəkilinin sözlərinə görə, Azərbaycanda hər an vətən uğrunda savaşa hazır olan peşəkar hərbçilərə maneələr yaradılır. F.Qəzənfəroğlu misal kimi şəxsən ona qarşı yol verilən qanunsuzluğu göstərdi: “Mən hərbi təcrübəyə malik baş leytenantam. Kapitan rütbəsi almağımın vaxtından 6 il keçib, lakin verilmir. Müharibə başlasa, mən orduda bir zabit kimi öz bacarığımdan, təcrübəmdən istifadə edə bilərəm. Lakin buna imkan verilmir. Azərbaycanda hər an müharibəyə hazırlıq istiqamətində iş aparılmaq əvəzinə ölkədə bir süstlük müşahidə olunur. Ancaq Gürcüstanda baş verənlər göstərdi ki, Azərbaycan da hər an istəmədiyi halda müharibəyə cəlb oluna bilər. Müharibə olsa, təcrübəli hərbçi kimi döyüşə getməyə hazıram. Bunu pafos üçün demirəm. Təcrübəmə əsaslanıram”. F.Qəzənfəroğlu soydaşımız Azər Süleymanovun könüllü dəstə yaradıb Gürcüstan uğrunda döyüşməsini təqdir edir: “Hər bir insan vətəni uğrunda döyüşməyə hazır olmalıdır. Azər Süleymanov vətəninin müdafiəsində iştirak edir”. BAXCP sədri, deputat Qüdrət Həsənquliyev və Ana Vətən Partiyasından deputat Zahid Oruc da istənilən vaxt vətən uğrunda savaşa hazır olduqlarını dedilər. E.SEYİDAĞA musavat