“RUSİYANIN HƏRBİ ƏMƏLİYYATLARINI UĞURLU SAYMAQ OLMAZ” Üzeyir Cəfərov: “NATO Gürcüstanı tək qoymayacaq” Rusiya-Gürcüstan müharibəsi dünya ictimaiyyətinin diqqət mərkəzindədir. Bir sıra hərbi ekspertlər Rusiyanın apardığı hərbi əməliyyatların uğurlu alınmadığını iddia edir. Onların qənaətincə, bu ölkənin hərbi komandanlığı tərəfindən tələm-tələsik hazırlanan əməliyyatları tam effektli həyata keçirmək mümkün olmayıb. Müharibə başlayandan gürcü tərəfi Rusiyaya məxsus 10 hərbi təyyarəni vurduğunu və 20 nəfərdən artıq rus hərbçisini əsir götürdüyünü iddia edir. Ruslar isə özünün cəmi 2 döyüş təyyarəsinin vurulduğunu bildirir, əsir düşən hərbçilər barədə məlumatları isə təkzib edir. O da faktdır ki, Sxinvali uğrunda gedən döyüşlərdə Rusiya tərəfi aviasiya dəstəyi ilə gürcü hərbi birləşmələrinə hücuma keçsə də böyük itkilərə məruz qalıb. Rusların səylərinə baxmayaraq gürcülər Sxinvali uğrunda gedən döyüşlərdə məğlub olmayıb, şəhəri isə ölkə rəhbərliyinin siyasi qərarı ilə tərk ediblər. Ekspertlər hesab edir ki, sovet hərb doktrinası ilə işləyən Rusiya ordusunun aviazərbələrdən istifadə etməklə uğura imza atması qeyri-mümkündür. Bu ordunun əsas hissəsini quru qoşunlarının təşkil etdiyini önə çəkən mütəxəssislər rusların ABŞ və digər NATO orduları tərəfindən təyyarələr vasitəsilə düşmənin hərbi infrastrukturunu məhv etmək əməliyyatını təkrarlaya bilməyəcəyini söyləyir. Konkret olaraq Gürcüstana Su-25 təyyarələri vasitəsilə təcavüz edildiyini önə çəkən ekspertlər bu tip təyyarələrin artıq müasir standartlara cavab vermədiyini bildirir. Onların rəyincə, Rusiya Gürcüstanın hava hücumundan müdafiə sistemlərini tamamilə sıradan çıxarsa belə təyyarələrinin təhlükəsiz uçuşunu təmin edə bilməyəcək. Gürcü ordusunun arsenalında hərəkət edən mobil hava hücumundan müdafiə qurğularının və Su-25, MiQ təyyarələrini vurmağa qadir “Strela” tipli reaktiv raketlərin olduğunu bildirən ekspertlər gürcülərin özlərini müdafiə edə biləcəklərini söyləyir. Rusiyanın hərbi əməliyyatlara plansız şəkildə başladığını söyləyən hərbi ekspertlər şimal qonşumuzun Gürcüstanı tam blokadaya almaq əməliyyatına çox gec başladıqlarını bildirir. Moskvanın Gürcüstanı dəniz blokadasına almaq əməliyyatında gecikdiyini önə çəkən ekspertlər rusların dəniz əməliyyatında faktiki surətdə uğursuzluğa düçar olduqlarını deyir. Onlar rus ordusunun əsas bazalarından bir neçə yüz kilometr aralıda quru əməliyyatları keçirməyə qadir olmadığını da bildirir. Əsasən çağırışçılardan ibarət bu ordunun NATO sistemi əsasında təlim görmüş peşəkar gürcü ordusu ilə üz-üzə döyüşlərdə məğlub olacağı bildirilir. Digər tərəfdən, rüşvət və korrupsiyanın tüğyan etdiyi rus ordusunun əsas bazalardan aralıda döyüşən birlikləri ərzaq və silahla keyfiyyətli təminatının sual altında olduğu söylənir. Hərbi ekspert, polkovnik-leytenant Üzeyir Cəfərov Gürcüstanın öz ərazi bütövlüyü uğrunda atdığı addımı dəstəklədiyini söylədi: “Rusiyanın Gürcüstana kobud hərbi müdaxiləsi, eyni zamanda döyüş əməliyyatlarının keçirildiyi ərazidən kənarda yerləşən məntəqələrə bomba zərbələri endirməsi və mülki infrastrukturu dağıtması qətiyyətlə pislənməlidir. Məncə, Rusiya bunun qarşılığında böyük çətinliklərlə üzləşəcək, bunun ağrısını həm iqtisadi, həm də diplomatik formada çəkəcək. Tezliklə NATO-ya üzvlüyə namizəd olacaq bir ölkəni alyans ölkələrinin tək qoyacağı da inandırıcı deyil. NATO ölkələri hazırkı şəraitdə Gürcüstana hərbi yardım göstərmək iqtidarında deyilər. Çünki bu, daha irimiqyaslı müharibəyə səbəb ola bilər. Amma düşünürəm ki, Rusiyaya diplomatik formada çox güclü təzyiqlər olacaq”. Ü.Cəfərov nəticədən asılı olmayaraq aparılan əməliyyatları Gürcüstanın uğuru sayır: “Gürcüstanın öz ərazi bütövlüyünü təmin etməsi və sonradan tamamilə başqa qüvvələr tərəfindən təcavüzə məruz qalması əslində Gürcüstanın uğuru sayılmalıdır. Gürcülər sübut etdi ki, çox qısa müddətdə separatçı rejimin qüvvələrini məhv edə bilərlər”. Ü.Cəfərov Rusiyanın müharibədən məğlub tərəf kimi çıxacağını da proqnozlaşdırır: “Təəssüf ki, müharibə zonasından xəbərləri Rusiya tərəfindən birtərəfli qaydada alırıq. Gürcüstan tərəfinin isə operativ məlumat vermək imkanları məhduddur. Müharibə başlayandan sonra rusların yalnız aviazərbələrdən və artilleriyadan istifadə etməsi məsələsinə gəlincə isə ruslar çox gözəl bilir ki, gürcü ordusu ilə üz-üzə savaşa bilməyəcəklər. Bir daha deyirəm ki, Gürcüstan ordusu NATO sistemi əsasında hazırlanıb və rusların bu ordu ilə savaşması çox çətin olacaq. Onu da bildirim ki, aviazərbələr, reydlər, artilleriya hücumları Gürcüstanın öz daxilində panika yaşanmasına hesablanıb. Ruslar hesab edir ki, bunun nəticəsində Gürcüstan ordusunun rəhbərliyini məqsədlərindən yayındıra biləcəklər. Mən hesab etmirəm ki, ruslar bu əməliyyatlarda uğur qazanır. Havaya hərbi təyyarlər qaldırıb infrastrukturu məhv etmək üçün xüsusi hərbi biliyə sahib olmaq lazım deyil. Tam məsuliyyəti ilə bildirirəm ki, ruslar gürcülərlə üz-üzə gəlməkdən çəkinir. Sadəcə, vəziyyəti dəyişmək üçün hava hücumundan istifadə edirlər. Bu cür əməliyyatlar uğur gətirməyəcək və Rusiya üçün çox acı fəsadlar verəcək”. Əfqan MUXTARLI musavat