“SAAKAŞVİLİ MÜHARİBƏNİ QƏRBİN RAZILIĞI OLMADAN BAŞLAYIB” Hikmət Hacızadə: “Azərbaycan Gürcüstanda baş verən hadisələrdən dərs götürməlidir” Regionda vəziyyət son dərəcə gərginləşib. Rusiya hərbi qüvvələri Gürcüstana soxulub, Bakı-Tiflis-Ceyhan (BTC) neft kəmərinə real təhlükələr yaranıb. Rusiya rəhbərliyi artıq belə bəyanatlar da səsləndirməyə başlayıb ki, onlar BTC-yə nəzarət etmək niyyətindədirlər. Belə aydın olur ki, Rusiya regiona nəzarəti tam ələ keçirməyi planlaşdırır. Bu planın ilkin mərhələsində Gürcüstana müdaxilə edildi. Belə ümidlər vardı ki, Qərb öz müttəfiqini köməksiz qoymayacaq. Lakin gözləntilər özünü doğrultmadı. Bu gün Gürcüstan çətin bir duruma düşüb, dünyadan yardım istəyir. Proseslər niyə bu cür cərəyan etdi? Saakaşvilinin atdığı addım niyə dəstəklənmədi? Bu və digər suallarımıza cavab tapmaq üçün politoloq, Müsavat Məclisinin üzvü Hikmət Hacızadə ilə söhbətləşdik. H.Hacızadə bildirdi ki, Gürcüstanın bu vəziyyətə düşməsi prezident Mixail Saakaşvilinin məlum addımı özbaşına atması ilə bağlıdır: “Mənə elə gəlir ki, Saakaşvili bu hərəkəti heç kimlə məsləhətləşmədən, Qərbin razılığını almadan atıb. Ola bilsin o, müttəfiqlərindən Gürcüstanın ərazi bütövlüyünü təmin etmək məqsədilə yardım istəyib, lakin ona bunun indiki məqamda yolverilməz olduğu deyilib və Saakaşviliyə gözləmək tövsiyə olunub. Saakaşvili də gözləməyib, hövsələsizlik edərək orduya hücum əmri verib. Bəlkə də o fikirləşib ki, ona gözləmək tövsiyə olunsa da, planlarını icra edərkən Rusiya müharibəyə başlasa, Qərb Gürcüstana real dəstək verəcək. Ən azı ona diplomatik dəstək veriləcəyini düşünürdü. Amma bu, səhv proqnoz oldu. Mən hələ ki, Gürcüstanın xeyrinə bir plan görmürəm. Bu gün (dünən-red.) günorta Rusiya telekanallarında çıxış edən Rusiyanın xarici işlər naziri Sergey Lavrov maraqlı bir etiraf etdi. O, təxminən belə dedi: ”Biz ABŞ-a minnətdarıq ki, Rusiyanın təqdimatı ilə onlar vaxtaşırı Saakaşvilini bu addımlarını dayandırmağa məcbur edirdilər. Görünür, bu dəfə onların səyləri nəticəsiz qaldı". Bu o deməkdir ki, Qərb Gürcüstana bu məsələ ilə bağlı heç bir vəd verməyib və Saakaşvili qərarı özbaşına verib. Ona görə də bu, çox böyük səhv idi". Bəs nəticə necə olacaq? Bu sualımızı cavablandıran H.Hacızadə hələlik yaxşı bir şey görünmədiyini dedi: “Nəticə əlbəttə, pis ola bilər. Ən azı Rusiya Cənubi Osetiyada və Abxaziyada əhəmiyyətli dərəcədə güclənəcək. İndiyə qədər Cənubi Osetiyada sülhməramlılar iki hissədən ibarət idi. Orada Rusiyanın da sülhməramlıları vardı, Gürcüstanın da. İndi Rusiya deyir ki, gürcü sülhməmarlılar Osetiyadan çıxarılmalıdır. Hələ mən ehtiyat edirəm ki, Rusiya ümumiyyətlə, Osetiyadan gürcü əhalisinin çıxarılmasını tələb edəcək. Artıq ruslar Kador dərəsinə giriblər, oradan gürcüləri təmizləyiblər. Qərb bir atəşkəs planı irəli sürdü, Gürcüstan onu imzalasa da, Rusiya qol çəkmədi. Ruslar dedilər ki, bu sənəd müəmmalıdır, orada qeyd olunur ki, tərəflər 6 avqust vəziyyətinə qayıtmalıdırlar. Rusiya isə deyir ki, bu qədər qırğınlar baş verib, qan tökülüb, bundan sonra 6 avqust vəziyyətinə qayıtmaq qeyri-mümkündür. Mənə elə gəlir ki, Rusiya Gürcüstanı sona qədər sıxacaq”. Azərbaycan hakimiyyətinin bu Gürcüstanla bağlı məsələdə tutduğu mövqe necə, politoloqu qane edibmi? H.Hacızadə Azərbaycanın bu məsələdə aciz olduğunu bildirdi: “Azərbaycan hakimiyyəti nə edə bilər ki? İqtidar Xarici İşlər Nazirliyi səviyyəsində Gürcüstanın ərazi bütövlüyünü tanıdığını bəyan etdi. Diplomatik şəkildə Azərbaycan başqa nə edə bilərdi? Qoşun göndərəsi deyil ki?! Sadəcə, Azərbaycan cəmiyyəti gürcülərə həm maddi, həm də mənəvi dəstək olmalıdır. Vətəndaşlar yardım toplayıb gürcülərə göndərməlidir. Mən eşitmişəm ki, ”Dalğa" Gürcüstanla bu istiqamətdə əlaqə yaradıb. Onların başladığı kampaniyaya dəstək vermək lazımdır". Politoloq bildirdi ki, bu hadisələr Azərbaycan üçün də örnək olmalıdır: “Söhbət ondan gedir ki, Azərbaycanda kifayət qədər dəliqanlılar var ki, onlar silahlanıb Qarabağda əməliyyatlara başlamağa çağırırlar. Onların vətənpərvərliyini başa düşürük. Amma reallıqları başa düşmək, qonşu ölkədə baş verənlərdən dərs götürmək daha faydalıdır. Başa düşmək lazımdır ki, nə qədər Ermənistanın arxasında Rusiya var, müharibəyə başlamaq son dərəcə təhlükəlidir. Biz də Gürcüstanın gününə düşə bilərik”. Regionda gərgin vəziyyət hökm sürdüyü bir ərəfədə Türkiyənin baş naziri Rəcəb Tayyib Ərdoğanın Qafqaz İttifaqı yaratmaqla bağlı təşəbbüsünə münasibət bildirən H.Hacızadə bunun hələlik baş tutacağına inanmadığını dedi: “Hələlik bunun reallaşacağına inanmıram. Çünki regionda ara qarışıb, Rusiya ilə Gürcüstan müharibə aparır, Dağlıq Qarabağ problemi həll olunmayıb. İttifaqda tərəflər bərabərhüquqlu olmalıdırlar. İndiki şərtlər daxilində bu mümkünsüz görünür. Ərdoğanın təklifi sadəcə, xoş bir niyyətdir”. Rusiyanın BTC ilə bağlı təhdidlərinə gəlincə, politoloq söylədi ki, Kremlin neft kəmərinə yönəlik planları var: “Amma konkret olaraq deyə bilmərəm ki, bu plan nədən ibarətdir. Hər halda, Rusiya çalışacaq ki, BTC-yə nəzarəti ələ keçirsin”. Elşad MƏMMƏDLİ musavat