Rus ayısının maskası Rusiya nə qədər çalışsa da, sivil, normal, demokratik və beynəlxalq hüquqa riayət edən ölkə imicini qoruya bilmir. Zatən belə imic Kremlin maskasıdır. Rus ayısının sifətində isə sivil və normal məxluqun maskası heç vaxt uzun müddət qala bilməz: günlərin birində mütləq düşəsidir. Cənubi Osetiyadakı hadisələr son 7 ildə Rusiya rəhbərliyinin ciddi-cəhdlə qurduğu bütün yalançı sxemləri, nümayiş etdirdiyi saxta davranışları, verdiyi vədləri və səsləndirdiyi bəyanatları darmadağın etdi. Sxinvaliyə yeridilən rus tankları əslində orada gürcü hərbiçilərini yox, özlərini gələcəyini və Rusiyanın dünya birliyindəki imicini topa tutdular. İndi bütün dünya müasir Rusiyanın nə olduğunu aşkar görür. Ərazi bütövlüyünü bərpa etməyə çalışan Gürcüstanın Cənubi Osetiyadakı separatçı rejimə qarşı apardığı antiterror əməliyyatına Rusiyanın müdaxilə etməsi, 58-ci ordusunu Sxinvaliyə yeritməsi Kremlin özünün doğurduğu və tərbiyə etdiyi separatçıları dəstəkləməkdə nə qədər kobud, yöndəmsiz və həyasız davrandığını nümayiş etdirdi. Rusiyanın prezidenti Dmitri Medvedyev, sonra da baş nazir Vladimir Putinin "Cənubi Osetiyaya qoşun yeritməyimizin səbəbi Gürcüstanı sülhə vadar etməkdir" demələri açıq ironiya təsiri bağışlayırdı. Əgər Cənubi Osetiyadan çox kənarda olan Tiflis, Marneuli, Poti, Qardabani, Qori, Vaziani şəhərlərinin bombardman edilməsi Gürcüstanın "sülhə vadar edilməsi"dirsə, onda işğal, savaş və müharibə nədir? Rusiyanın xarici siyasəti maraqlıdır. Bu ölkənin xarici işlər naziri Sergey Lavrov BMT-nin Təhlükəsizlik Şurasında Kosovonun statusu müzakirə olunanda emosional vəziyyət alaraq demişdi: "Belə müzakirələr İkinci Dünya Savaşından sonra ilk dəfə olaraq hər iki tərəfin razılığı olmadan dövlət sərhədlərini dəyişmək cəhdidir. Bizim üçün "qırmızı xətt" beynəlxalq hüquq, dövlətlərin ərazi bütövlüyü problemləridir. Bu prinsiplər maraqlı tərəflərin qarşılıqlı razılığı olmadan əsla dəyişdirilə bilməz". Həmin bəyanatdan çox az vaxt keçib. İndi yenə də Sergey Lavrov bütün dünyanın gözü qarşısında Gürcüstanın ərazi bütövlüyünü heçə sayıl əvvəlcə Cənubi Osetiyaya, sonra da Abxaziyaya qoşun yeridən Kremlin vəkili rolunu oynamağa çalışır. Lavrov deyəsən bizi kar, kor və lal sayır. Gürcüstan şəhərlərini bombardman edən, dinc sakinləri qətlə yetirən Rusiya hərb maşınını işə salaraq Gürcüstanı tam işğal etmək niyyətini gizlətmək niyyətində deyil. Artıq aydındır ki, Rusiya nəhəng və ölçüsü naməlum neoimper ambisiyalarının daşıyıcısı, sərhədlərini sabiq Sovetlər Birliyinin hədlərinə çatdırmağı düşünən, postsovet məkanını "doğma və təbii maraq dairəsi" sayan aqressiv, avantürist, terror və separatizmi dəstəkləyən dövlətdir. Rusiya istəklərini reallaşdırmaq və hərisliyini söndürmək üçün istənilən cinayətə hazırdır. O öz vətəndaşları ilə bahəm, qonşu ölkələrdə yaşayan insanları qana boğmağa hazırdır və bunu hazırda nümayiş etdirir. Gürcüstanda rus təyyarələri, tankları və raketlərinin hədəfinə dönən insanların yeganə günahı isə onların öz ölkələrinin ərazi bütövlüyü uğrunda mübarizə aparmalarıdır. Rusiya Cənubi Osetiya və Abxaziyanı işğal edib. Lakin Moskva simasını, beynəlxalq birlikdə nüfuzunu, ən başlıcası isə Cənubi Qafqazı birdəfəlik itirib. Bundan sonra Gürcüstanın və gürcülərin Rusiyaya inam, etibar və ya sevgisindən danışmaq absurddur. Bundan sonra Azərbaycanda ağlı başında olan adamın Rusiyanı müttəfiq kimi görmək, Dağlıq Qarabağ münaqişəsinin dinc yolla nizamlanmasında Moskvaya bel bağlaması təhlükəli sadəlövhlükdür. Cənubi Osetiya və Abxaziyadakı hadisələr, Gürcüstan ərazisinin Rusiyanın hücumlarına məruz qalmasının nə ilə başa çatmasından asılı olmayaraq artıq Moskva uduzub. Postsovet məkanında ilk dəfə olaraq bir dövlət başqasının ərazisini işğal etməkdədir və bunu gizlətmədən edir. Əgər Ermənistan Azərbaycan rayonlarına qoşunlarını yeridəndə hadisələri hərc vəchlə pərdələməyə çalışırdısa, "orada erməni könüllülər vuruşur" deyirdisə, Moskva 58-ci ordusunun tankları Şimali və Cənubi Osetiyaları ayıran Rok tunelindən keçən kimi "biz Osetiyadayıq" dedi. Bu isə Rusiyanın Gürcüstanı tamamən və əbədi itirməsi deməkdir. Çünki Tiflisdə bundan sonra kimlərin hakimiyyətdə olmasına rəğmən, gürcülər öz şəhərlərinin bombardman edilməsini, həmvətənlərinin qətlə yetirilməsini heç vaxt unutmayacaq, Rusiyaya bağışlamayacaqlar. Osetiya və Abxaziya ilə bağlı hadisələr həm də Rusiyadakı müxalifətin bütünlüklə məhv olmasını, yalnız kağız üzərində fəaliyyət göstərməsini bütün çılpaqlığı ilə göstərdi. Çünki Marneuli, Qori, Marta, Tiflis şəhərlərinə bombalar atılanda rusiyalı müxalifətçilər Kremlin fəaliyyətini dəstəklədilər, "Gürcüstanın aqressiv və radikal hakimiyyət dairələrinin şovinizmi"ni pislədilər. Bu isə Rusiyada müxalifətin tabutuna çalınan son mıx oldu. İndi şimal qonşumuz olan dövlətdə demokratiya, insan haqları, azad fikir və düşüncənin son işartılarının tam söndüyünü demək olar. Milyonlarla rusiyalı Kremlin beynəlxalq hüququn bütün normalarını tapdamasını, qonşu dövləti işğal etməyə çalışmasını sakitcə izləyir. Çünki onlar Putin hakimiyyətinin xofunda qalaraq başlarını qaldıra bilmir, 1861-ci ildə təhkimçiliyin ləğvindən sonra ötən 148 ilə rəğmən vücudlarındakı tipik rus mujikliyini, kölə psixologiyasını çıxara bilmirlər. Rusiyalıların sakitliyi isə Kremlin Gürcüstandakı cinayətlərinə haqq qazandırılmalarıdır. Belədə Rusiyanın bütün postsovet məkanındakı terrorçu və separatçıları dəstəkləməsinə təəccüblənməyə dəyərmi? Gürcüstanda indi hüququn gücü gücün hüququna qarşı mübarizə aparır. Nəticədən asılı olmayaraq gürcülər qalibdir. Həsən AĞACAN [email protected]/* */ express