ÖLKƏMIZƏ HƏRBİ MÜDAXİLƏ OLSA, ABŞ BİZƏ DƏSTƏK VERƏRMİ? Rasim Musabəyov: “Amerika Rusiyaya müharibə elan edib başqa torpaqlara görə vuruşası deyil” Leyla Əliyeva: “ABŞ bizə o vaxt hərbi dəstək verər ki, Rusiya və İrana qarşı müharibədə onun müttəfiqi olaq” Qafqazda Rusiya ilə Gürcüstan arasında başlayan müharibə hər iki tərəfin kifayət qədər itki verməsi ilə müşayiət olunur. Artıq beş gündür davam edən şiddətli döyüşlərdən sonra gürcü qoşunları Cənubi Osetiyadan çəkilib. Amma Rusiya Tiflisin atəşkəslə bağlı çağırışlarına məhəl qoymayaraq Gürcüstana hərbi müdaxiləni genişləndirir. Gürcüstanın ən sadiq müttəfiqi hesab olunan ABŞ isə bəyanatlar xaricində Gürcüstana hələ də hərbi dəstək verməyib. ABŞ administrasiyası Gürcüstana hərbi kömək göstərməyə hazırlaşmadığını rəsmən bildirib. Qeyd edək ki, ABŞ Dövlət Departamenti, eləcə də Amerikanın ölkəmizdəki səfirliyi Azərbaycanın İran və Rusiyanın təcavüzünə məruz qalacağı təqdirdə ölkəmizə dəstək verəcəklərini dəfələrlə bəyan ediblər. Bu bəyanatların nə dərəcədə reallığı əks etdirdiyinə aydınlıq gətirmək məqsədilə politoloqlara müraciət etdik. Politoloq Rasim Musabəyovun fikrincə, əgər ABŞ Gürcüstana dəstək verməsəydi, Rusiya Mixail Saakaşvilini çoxdan devirmiş və onun yerinə öz marionetini təyin etmişdi: “Ancaq bu, qeyri-mümkündür. Gürcü xalqı iki yerə bölünüb. Gürcüstanı NATO-ya daxil etmək və təəssüflər olsun ki, Rusiyaya qarşı düşmənçilik mövqeyindən yanaşma tərzi var. Amma ABŞ Gürcüstanın yerinə Rusiyaya müharibə elan edib başqa torpaqlara, o cümlədən Abxaziya və Osetiyaya görə vuruşası deyil”. R.Musabəyov Rusiyanın Gürcüstanın qalan ərazisinə əl-qol atmaq istəyində olacağı təqdirdə ABŞ-ın çox sərt reaksiyası ilə üzləşəcəyini söylədi: “Rusiya dünyaya meydan oxumaq üçün elə də böyük güc sahibi deyil. ABŞ hazırda Rusiyanın əl-qolunu yığışdırmasının vacib olduğunu izah etməyə, Gürcüstana diplomatik yolla dəstək verməyə çalışır. Düşünürəm ki, Rusiya Amerikanın xəbərdarlığına məhəl qoymasa, ABŞ hərbi donanması Qara dənizə girməlidir”. ABŞ-ın Azərbaycanı dəstəkləyəcəyi ilə bağlı bəyanatlarına gəlincə isə R.Musabəyov ABŞ-ın Dağlıq Qarabağın azadlığı istiqamətində müharibədə israrlı olmadığını söylədi: “Bizə öncədən də deyirlər ki, Qarabağa hərbi müdaxilə etmək lazım deyil, məsələ sülh yolu ilə həll olunmalıdır”. Politoloq Leyla Əliyeva Rusiyanın Gürcüstanın daxili işlərinə üçüncü tərəf kimi qarışmasını qeyri-qanuni addım sayır. O, həm də Rusiyanın müharibədən qalib çıxmasının narahatçılıq doğuracağını bildirir: “Ümumiyyətlə isə Gürcüstanda keçirilən hərbi əməliyyatlardan sonra dünya dövlətlərinin Rusiyaya münasibəti dəyişəcək. Rusiya özünü ifşa edəcək və bütün dünyada işğalçı dövlət kimi tanınacaq. Məncə, Gürcüstan üzərində qalib gəlməyin heç bir əsası yoxdur. Rusiyanın Gürcüstana müdaxiləsini siyasi təzyiq kimi qiymətləndirmək olar”. L.Əliyeva tərəflərin məsələni siyasi müstəvidə və danışıqlar yolu ilə həll etməsini daha vacib sayır: “Məsələ təkcə Abxaziya və Osetiya məsələsi deyil. Rusiya başqa mövqedən çıxış etsə də onun bu münaqişədə məqsədi özünə ərazicə yaxın olan dövlətlərin Qərbə inteqrasiyasının qarşısını almaqdır. Rusiya deyir ki, Abxaziya və Osetiya məsələsi təkcə Gürcüstanın yox, həm də onun məsələsidir. Çünki proseslər Rusiyanın sərhədlərində baş verir. Rusiyanın müdaxiləsi Gürcüstanın NATO-ya inteqrasiyasına cavabdır”. Politoloq Amerikanın münaqişəni diplomatik yolla həll etməyə daha çox önəm verdiyini söylədi: “İndi çox maraqlı vəziyyət yaranıb. Gürcüstan bir neçə il idi ki, problemin Osetiya və Abxaziya xalqı ilə bağlı olmadığını deyirdi. Qafqazda əsas problem Rusiyadır. Bütün dünya da görür ki, Rusiyanın məqsədləri heç də xoş deyil. Dəstək məsələsinə gəlincə isə ABŞ hərbi yox, diplomatik dəstəyi nəzərdə tutur”. L.Əliyevanın sözlərinə görə, Amerika Azərbaycana o vaxt hərbi dəstək verər ki, Azərbaycan Rusiyaya, ya da İrana qarşı müharibədə onun müttəfiqi olsun: “Belə olan halda Azərbaycana hərbi dəstək vermək Amerikanın borcudur. Gürcüstanda gedən müharibə isə Amerikanın müharibəsi deyil. Amerika hazırda regionda müharibə istəmir. ABŞ-ın Əfqanıstan və İraq problemi var. Azərbaycan da çalışır ki, Rusiya ilə münasibətləri ehtiyatla qursun. Hər hansı bir ehtiyatsız davranış arzuolunmaz halla nəticələnə bilər. Rusiya Gürcüstana müdaxilə etməklə Azərbaycana mesaj verir. Əgər Azərbaycan Qarabağ məsələsi istiqamətində bu cür addım atsa, eyni vəziyyətlə qarşılaşacaq. Qafqazda qaynar münaqişəyə girmək Amerikaya o qədər də sərfəli deyil”. Leyla İLQAR musavat