PKK “BAKI-CEYHAN”ı PARTLATDIĞINI RƏSMƏN ELAN ETDİ Kəmərdə yanğın hələ davam edir, Ceyhandakı terminallar isə boşdur Bakı-Tiflis-Ceyhan neft kəmərinin Türkiyə ərazisindən keçən hissəsində törədilmiş partlayışı PKK rəsmən öz üzərinə götürüb. Dünən PKK-ya bağlı “Fırat” xəbər agentliyi təşkilatın silahlı qanadı adından “kommunike” yayıb. Bildirilir ki, PKK BTC-nin Ərzincan yaxınlığından keçən hissəsində sabotaj aktı həyata keçirib. Xəbər verildiyi kimi, neft kəmərinin Ərzurum vilayətinə daxil olan Ərzincan şəhəri yaxınlığında avqustun 6-na keçən gecə güclü yanğın və partlayış baş verib. Həmin gün PKK-ya yaxın mənbələr hadisənin bu təşkilat tərəfindən törədildiyi haqda məlumat yaymışdılar. Bildirilirdi ki, təşkilat bu haqda daha sonra “rəsmi bəyanat” yayacaq. Xatırladaq ki, partlayış kəmərin Ərzurum yaxınlığındakı 29-cu nasos stansiyasında baş verib, üç gündür ki, kəmərin hadisə zonasına daxil olan 6 kilometrlik hissəsində qalan 12 min barel neft yanmaqda davam edir. Hadisə artıq Azərbaycan neftinin Ceyhan limanından dünya bazarlarına nəqlinin dayanmasına səbəb olub. CNN Türk kanalının məlumatına görə, Türkiyənin təhlükəsizlik çevrələrindəki mənbələrdən bildiriblər ki, sözügedən partlayışın texniki səbəbdən yarandığı haqda dəlillər var. Mənbə hadisənin PKK-nın sabotajı olması barədə yayılan məlumata şübhə ilə yanaşıb. Bildirilir ki, Türkiyə Silahlı Qüvvələrinin apardıqları əməliyyatlar nəticəsində PKK daxilində təşviş və nizamsızlıq yaranıb: “Mümkündür ki, terror təşkilatı bir-birinin ardınca aldığı ağır zərbələrə baxmayaraq hələ də güclü olduğunu nümayiş etdirmək üçün BTC-dəki yanğının məsuliyyətini üzərinə götürüb”. Təhlükəsizlik çevrələrindəki mənbə deyib ki, PKK terror aksiyalarının məsuliyyətini öz üzərinə götürmək məsələsində ziddiyyətli davranır. “Bəzən təşkilat özünün törətdiyi terror aksiyasının məsuliyyətini üzərindən atır, bir çox hallarda isə ona dəxli olmayan terror aktlarına görə məsuliyyəti üzərinə götürür”. Türkiyə mətbuatının məlumatlarına görə, enerji və təbii ehtiyatlar naziri Hilmi Gülər hadisə yerində olub və kəmərin ölkə ərazisindən keçən hissəsini idarə edən BOTAŞ şirkətinin nümayəndələrindən məlumatlar alıb. BOTAŞ rəsmiləri deyiblər ki, yanğın nəzarət altındadır, ancaq söndürülməyib. Belə ki, yanğın kəmərdəki neftin tam yanıb qurtarmasına qədər davam edəcək. Şirkət təmsilçilərinə görə kəmərdə yanğını söndürmək olar, ancaq bu risklidir, çünki bu halda yanğının daha da güclənməsi, yaxud neftin ətrafa sızması təhlükəsi var. Ona görə də ən təhlükəsiz variant yanğının neft tükənənə qədər nəzarət altında davam etməsidir. Yalnız neft bitdikdən sonra yanğınsöndürmə xidmətləri alovu söndürəcəklər. Enerji və təbii ehtiyatlar naziri Hilmi Gülər də deyib ki, yanğını tam söndürməyə imkan var, lakin bu halda kəmərdəki neft ətrafa axa bilər. Hadisənin səbəbləri haqda isə ancaq yanğın söndürüldükdən sonra aparılan araşdırmalardan sonra danışmağın mümkün olacağı bildirilir. Nazir jurnalistlərin “partlayışı PKK-mı törətdi” sualına “konkret bir şey söyləmək mümkün deyil, araşdırmalar gedir” deyə cavab verib. Rəsmilər deyiblər ki, yanğın söndürüldükdən sonra nasos stansiyasının işini bərpa etmək üçün 10-15 gün vaxt tələb olunacaq. Bu isə sutkada 1 milyon bareldən çox neft nəql edən kəmərin təqribən 20 gün bağlı qalacağı deməkdir. Artıq dünəndən etibarən Azərbaycan neftinin dünya bazarlarına Ceyhan limanından çıxışı dayanıb. Belə ki, kəmərdə partlayış baş verən zaman Ceyhan limanındakı terminallarda 7.5 milyon barel neft olub. Həmin neft təqribən 7 böyük tankeri doldurmağa kifayət edir. Lakin bu neft avqustun 7-də tankerlərlə yüklənərək bitib və bununla da Ceyhan limanından dünya bazarlarına neft axını dayanıb. Bu xəbərdən sonra son günlər ucuzlaşmaqda olan neft yenidən bahalaşmağa başlayıb. Son xəbərlərə görə, Nyu York birjasında neftin qiyməti 2 dollar artaraq 120 dolları keçib. Qeyd edək ki, BTC ilə nəql edilən neft dünyanın neftə olan tələbatının 1 faizidir. Məlumatlara görə, partlayışla bağlı Ceyhan limanındakı Heydər Əliyev adına terminalda böhranlı vəziyyəti idarə etmək üçün xüsusi qərargah yaradılıb. 15 aparıcı mütəxəssisdən ibarət mərkəz Bakı və Ankaradakı böhran qərargahları ilə koordinasiya olunmuş şəkildə çalışır. Mərkəzdə hadisə yerindən birbaşa görüntülər izlənilir, operativ şəkildə yanğın bölgəsindəki səlahiyyətli şəxslərə göstərişlər verilir. Xatırladaq ki, əvvəlcə rəsmilər nasos stansiyasında baş vermiş yanğın nəticəsində yerin altı ilə keçən kəmərə ziyan dəymədiyini açıqlamışdılar. Lakin dünən BOTAŞ rəsmiləri etiraf ediblər ki, kəmərə də ziyan dəyib, buna görə də təmir işlərinin nə qədər vaxt aparacağı bilinmir. Qeyd edək ki, BTC boyu nasos stansiyaları elektron mühafizə sistemi ilə qorunur, stansiyaların ətrafı metal hasarlarla əhatə olunub, içəridə isə təhlükəsizlik əməkdaşları keşik çəkir. Bu üzdən PKK-nın nasos stansiyasını necə partlatdığı ekspertlər üçün hələ qaranlıq qalır. Terror təşkilatının bəyanatında da bu haqda bir şey deyilmir. Ən çox ehtimal olunan versiyaya görə, PKK-çılar stansiyaya elektron hasarın üstündən əl qumbarası ata və ya ora qumbaraatanla zərbə endirə bilərlər. Türkiyə rəsmiləri bildirirlər ki, hadisədən 15 dəqiqə əvvəl Ankaradakı BTC-nin işinə nəzarət edən mərkəzə qəza haqda siqnal daxil olub, lakin qəzanın səbəbləri müəyyən deyil. F.MƏMMƏDOV musavat