BTC-də partlayış dünyada neftin qiymətini qaldırıb "İcraçı PKK terrorçuları olsa da, partlayışın arxasında müəyyən dövlətlərin, güc mərkəzlərinin durmasını istisna saymıram" Avqustun 5-da Bakı-Tiflis-Ceyhan (BTC) neft boru xəttinin Refahiyə hissəsində partlayış olub. Partlayış Ərzincan və Refahiyə yolunun 60-ci kilometrliyində, Yurtbaşı kəndi yaxınlığında gecə, Türkiyə vaxtı ilə saat 23.20-də baş verib. Yanğın 50 metr yüksəkliyə qalxıb. Partlayışdan dərhal sonra kəmərin 29 və 31 saylı siyirtmələri bağlanılıb, neftin nəqli dayandırılıb. "Cihan" xəbər agentliyi hadisədən az sonra PKK terror təşkilatının BTC-də baş vermiş partlayışın məsuliyyətini öz üzərinə götürdüyü barədə məluat yayıb. Rəvan Məmmədli Türkiyənin Daxili İşlər Nazirliyindən bildirilib ki, partlayışın səbəbi yalnız yanğın tam söndürüldükdən sonra məlum olacaq. Çünki sonra daha dəqiq araşdırmalar aparılacaq. Daxili İşlər Nazirliyi PKK tərəfindən verilən açıqlamanın həqiqətə uyğun olub-olmamasını nə təsdiqləyib, nə də təkzib edib. Yanğın hələ də davam edir. APA-nın Türkiyə KİV-ə istinadən verdiyi məlumata görə, yanğın tam nəzarət altına alınıb. Yetkililər boru xəttindəki neftin yanıb qurtarmasını gözləyirlər. Hazırda 10 kv.m. ərazidə müşahidə olunan yanğının daha bir neçə gün davam edəcəyi bildirilir. Yanğın tam sönəndən sonra 10-15 gün ərzində xəttə təmir-bərpa işləri aparılacaq. Neftin nəqli təmir-bərpa işləri başa çatandan sonra bərpa olunacaq. Partlayış baş verdikdən sonra "British Petroleum" (bp) şirkəti fors-major situasiyasının yarandığını elan edib. APA-nın "The Wall Street Journal" qəzetinə istinadən verdiyi məlumata görə, şirkət alıcılara xəbərdarlıq edib ki, mövcud müqavilələr üzrə öhdəliklər yerinə yetirilməyə bilər. bp-nin səlahiyyətli şəxsləri kəməri terrorçuların partlatmasını mümkün sayırlar. Partlayışdan sonra dünya bazarlarında neftin qiyməti yüksəlib. Ancaq günün sonunda neftin nəqlində böyük fasilə yaranmayacağı aydınlaşdıqdan sonra qiymətlər düşüb. Məsələylə bağlı fikirlərini öyrəndiyimiz politoloq Qabil Hüseynli deyir ki, BTC kəmərinin müəyyən hissəsi Türkiyədə kürdlərin yaşadığı bölgələrdən çəkilib. Siyasi qərarın qəbulundan və layihə-smeta sənədləri işlənildikdən sonra PKK təhdidedici bəyanatlar verib. O zaman həmin təhdidlərə ciddi əhəmiyyət verilməyib. Həm də ona görə ki, BTC-nin qorunmasını yerli təhlükəsizlik qüvvələri ilə bərabər peyk rabitəsiylə səmadan da izlənir və NATO-nun müəyyən strukturları da mühafizə işlərinə cəlb olunmuşdu. Onun sözlərinə görə, indi belə görünür ki, Türkiyənin xüsusən dağlıq rayonlarında zəif qorunan yerlər var və PKK təxribatçıları da həmin zəif yerlərdən istifadə edə bilirlər: "Zənnimcə, bu, çox təhlükəli bir siqnaldır. Bu, onu göstərir ki, ümumiyyətlə, kəmərin qorunmasını gücləndirməyə ehtiyac var. Belə partlayış bu gün Türkiyədə, Yurtbaşı kəndi yaxınlığında törədilibsə, sabah başqa bölgələrdə də baş verə bilər". Maraqlıdır ki, Qabil Hüseynli partlayışın arxasında müəyyən dövlətlərin, güc mərkəzlərinin durmasını da istisna saymır: "İcraçı PKK terrorçuları olsa da, bu məsələ bir sıra rəqabət aparan dövlətlərin maraq dairəsinə daxil ola bilər. Ona görə də hesab edirəm ki, "Cihan" xəbər agentliyinin yaydığı məlumatlar ilkin məlumatlardır. Gələcəkdə baş vermiş bu hadisənin bütün təfərrüatı üzə çıxanda biz yeni-yeni detalların şahidi olacağıq". xalqcebhesi