Bütün ölkə ərazisində Azərbaycan prezidentinin portretlərinin yığışdırılmasına başlanılıb

SON XƏBƏRLƏR

Bütün ölkə ərazisində Azərbaycan prezidentinin portretlərinin yığışdırılmasına başlanılıb

2021.10.20, 07:36

Gunaz.tv

Bütün ölkə ərazisində Azərbaycan prezidentinin portretlərinin yığışdırılmasına başlanılıb

Bakı – APA. Bütün ölkə ərazisində Azərbaycan prezidenti İlham Əliyevin portretlərinin yığışdırılması ilə bağlı tapşırığı yerinə yetirilir. Bakının Nəsimi, Yasamal, Qaradağ və Suraxanı rayonlarının İcra Hakimiyyətindən (RİH) APA-ya daxil olan məlumata görə, dövlət başçısının müvafiq tapşırığından sonra dərhal prosesə başlanılıb. Səbayel RİH-dən isə bildirilib ki, rayon ərazisində dövlət başçısının portretləri ilə bağlı problem olmayıb. Prezidentin portretlərinin asıldığı mağazalara müvafiq tapşırıqlar verilib. Azərbaycanın şimal-qərb bölgəsində prezident İlham Əliyevin portretlərinin sökülməsinə başlanılıb. APA-nın Şəki-Zaqatala bürosunun məlumatına görə, ölkə başçısının müvafiq göstərişindən sonra şimal-qərb regionunu əhatə edən rayonlarda əməli fəaliyyətə başlanılıb. Şəki rayon İcra Hakimiyyətindən bildirilib ki, onlar bu prosesə prezident seçkilərinə start verilən gündən başlayıblar və hazırda rayon ərazisində İ. Əliyevin portreti yoxdur. Bu gün Zaqatala və Balakən rayonların da dünən keçirilən müşavirə ilə əlaqədar toplantı təşkil olunub. Toplantıda bütün təşkilat və müəssisə rəhbərlərinə, həmçinin kənd icra nümayəndələri və bələdiyyələrə ölkə başçısının göstərişi barədə məlumat verilib. Hazırda hər iki rayon ərazisində prezidentin şəkillərinin yığışdırılması prosesi həyata keçirilir. Qax rayonunda isə prezident İ. Əliyevin portretlərinin yığışdırılması istiqamətində hələlik heç bir iş aparılmır. Rayon İcra Hakimiyyətindən (RİH) bildirilib ki, prosesə yaxın günlərdə başlanılacaq. Prezidentin Qazax və Tovuz rayonlarının park və küçələrində olan bütün portretləri artıq yığışdırılıb. Ağstafa, Daşkəsən, Gədəbəy, Samux rayonlarında ölkə başçısının göstərişi yerinə yetirilir, Gəncədə isə bu tapşırığın icrasına sabah başlanılacaq. Göyçay rayonunda tapşırıq artıq icra olunub. APA-nın mərkəzi aran bürosunun məlumatına görə, Zərdab və Ucar rayonlarında isə proses davam edir. Tərtər, Yevlax və Ağdam rayonlarında ölkə başçısının bütün şəkilləri yığışdırılıb. RİH aparatlarından APA-nın Qarabağ bürosunun məlumatına görə, Bərdə, Goranboy və Ağcabədidə tapşırıq icra olunur. Hacıqabul, Şirvan, Salyan və Sabirabadda hələlik tapşırığın icrasına başlanılmayıb. Azərbaycanın şimal bölgəsi rayonlarının küçə və meydanlarından da İ. Əliyevin portretləri yığışdırılır. Xaçmaz RİH başçısının müavini Yetkin Mehmanov APA-nın şimal bürosuna bildirib ki, bu məqsədlə xüsusi briqada yaradılıb. Bununla bağlı yerli bələdiyyə və icra orqanlarına da tapşırıqlar verilib. Quba RİH başçısının müavini Yusif Abidov rayon ərazisində analoji tədbirlərin həyata keçirdiyini, kəndlərdən və yol qıraqlarından Azərbaycan prezidentinin şəkillərinin yığışdırılmasına başlandığını deyib. Dövlət başçısının tapşırığı Masallı, Lerik, Lənkəran, Cəlilabad, Yardımlı, Biləsuvar, Astara rayonlarında, habelə Sumqayıt şəhərində də icra olunur. apa

GUNAZ.TV

SON XƏBƏRLƏR