İSTANBULDAKI PARTLAYIŞLARI TÖRƏDƏN ŞƏXSLƏR TUTULDU 18 dinc sakinin ölümünə səbəb olan terror aktlarını PKK-çıların törətməsi təsdiqlənib İstanbul polisi iyulun 27-də Türkiyə vaxtı ilə axşam saat 21:55-də şəhərin Göngörən məhəlləsində 18 dinc sakinin həlak olmasına, 150-dən çox adamın xəsarət almasına səbəb olan terror aktlarının PKK tərəfindən törədildiyini üzə çıxarıb. Türkiyə mətbuatının xəbərlərinə görə, təhlükəsizlik kameralarının hadisə yerindən çəkdiyi görüntülərin araşdırılması nəticəsində polis terrorçuların izini tapmaq üçün mühüm dəlillər əldə edib. Partlayışlardan sonrakı 2-3 gün ərzində hadisə ilə bağlılığı şübhə doğuran 8 nəfər həbs edilib. Onlar avqustun 2-də məhkəmə qarşısına çıxarılıblar və barələrində həbs qərarı verilib. Bəlli olub ki, qanlı terror aksiyasını törədən şəxslər PKK üzvləridir. Onlardan biri partlayıcı qurğunu zibil qutusuna yerləşdirən şəxsdir. Digər terrorçular isə partlayışı təşkil ediblər. Məlum olub ki, partlayıcı qurğunu uzaqdan mobil telefonla işə salan terrorçu Hüseyn Tureli adlı PKK-çıdır. O, ifadəsində əvvəlcə partlayıcı qurğunu qutuya yerləşdirən şəxsi tanımadığını bildirib. Lakin digər həbs edilənlər ifadələrində deyiblər ki, bu işi Tureli həyata keçirib. Təhlükəsizlik kameralarının hadisə yerindən çəkdiyi görüntülərdə də bombanı qutuya yerləşdirib qaçan şəxsin Tureli olduğu müəyyənləşib. Məlum olub ki, partlayıcı qurğu telefonla işə salınandan sonra terrorçulardan beşi hadisə yerinə gələrək baş verənləri seyr ediblər. Saxlanılan şəxslərin əvvəllər də terror fəaliyyətləri ilə bağlı axtarışda olduğu müəyyənləşib. TERRORDAN ƏN ÇOX ƏZİYYƏT ÇƏKƏN ÖLKƏLƏR Onlardan biri də Türkiyədir Türkiyə, 2008-ci ilin ikinci yarısında terror hadisələrindən ən çox əziyyət çəkən ölkələr arasında 7-ci yerdə qərarlaşıb. Bu müddətdə ölkədə 71 teror aktı nəticəsində 38 nəfər ölüb, 88 nəfər yaralanıb.Terrorizmlə Mübarizə Mərkəzi (TMM) Komandanlığı tərəfindən ingilis dilində yayınlanmış “Terrorçu fəaliyyətlərə ümumi baxış” adlı məqaləyə görə, 2008-ci ilin birinci yarısında dünya miqyasında 2396 teror aktı baş verib. Bu terror aktları nəticəsində 4204 nəfər həlak olub, 7614 nəfər yaralanıb. Rəsmi rəqəmlərə görə isə, 319 nəfər terrorçular tərəfindən qaçırılıb. 2008-ci ilin ikinci yarısında ən çox terror aktının baş verdiyi ölkə İraqdır. Bu müddətdə İraqda törədilmiş 857 terror hadisəsi zamanı 575 nəfər həlak olub 3247 nəfər yaralanıb. Dünyada baş vermiş terror aktlarının 35%-i, ölümlə nəticələnən terror aktlarının 37%-i, yaralnma ilə nəticələnən terror aktlarının isə 42%-i bu ölkədə törədilib. 2008-ci ilin birinci yarısında ən çox terror aktlarının törədildiyi ölkələr belə sıralanır: İraq(857), Əfqanıstan (334), Şri Lanka (327), Pakistan (216), Hindistan (195), Somali (112), Türkiyə (71), Tailand (55), Nepal (44) və İsrail (31). Türkiyədə 2008-ci ilin birinci yarısında əksər hissəsi PKK tərəfindən həyata keçirilən terror aktlarının ən çox baş verdiyi yer Şırnak rayonu olub. Burada 17 terror aktı nəticəsində 9 nəfər həlak olub, 18 nəfər yaralanıb. Bu müddətdə ən ölümcül terror aktı isə 9 may 2008-ci ildə Hakkaridə meydana gəlib. PKK terrorçularının Hakkaridə polis mərkəzinə hücumu nəticəsində baş vermiş atışmada 6 əsgər şəhid olub, 20 terrorçu öldürülüb. TÜRKİYƏDƏN NAXÇIVANA ƏRZAQ BURAXILMIR “Artıq üç gündür ki, Türkiyədən Naxçıvana ərzaq buraxılmır. Bunun baiskarı isə Türkiyə yox, Azərbaycan tərəfidir”. Bu barədə əməkdaşımıza Naxçıvandakı mənbə bildirib. Mənbənin dediyinə görə, qonşu ölkədən Naxçıvana un, vermişel, düyü və digər ərzaq məhsullarının gətirilməsinə Sədərək gömrüyündə yasaq qoyulub. “Əvvəl müəyyən edilmiş norma müqabilində naxçıvanlılar geriyə ərzaq gətirirdilər. İndi buna da imkan vermirlər. Türkiyə tərəfi buraxsa da, Azərbaycan tərəfi qadağanı heç nəylə izah edə bilmir. Sadəcə, insanların əlindən ərzağı alıb, müsadirə edirlər”, - deyə mənbə bildirir. SƏBUHİ musavat