AKP YENİ BAŞLANĞIC VƏD EDİR Lakin hakim partiya onu bağlanmağın bir addımlığına gətirən hicab məsələsindən geri çəkilmək fikrində deyil Türkiyədə hakim Ədalət və İnkişaf Partiyası (AKP) Konstitusiya Məhkəməsinin ciddi xəbərdarlıq kimi qiymətləndirilən qərarından sonra öz siyasətini dəyişəcəyini vəd edib. Baş nazir Rəcəb Tayyib Ərdoğan televiziya ilə müraciətində deyib ki, onun partiyası məhkəmənin çıxardığı qərardan hər kəsin dərs götürməli olduğuna inanır. Bu baxımdan AKP milli birlik və bərabərliyə nail olmaq üçün üzərinə düşəni edəcək, yeni başlanğıc nöqtəsi tapıb oradan hərəkət edəcək. Mətbuatda yayılan xəbərlərə görə, Konstitusiya Məhkəməsinin üzvləri baş prokurorun AKP əleyhinə verdiyi dəlillərin çoxunu rədd edib, lakin bir neçə dəlil AKP-nin dünyəvilik əleyhinə fəaliyyətlər göstərdiyini sübut etmək üçün mühüm rol oynayıb. Belə dəlillərdən biri baş nazir Ərdoğanın İspaniyadan səfərdən dönərkən jurnalistlərə “baş örtüsü siyasi simvol olsa da, ona qoyulmuş qadağalar götürülməlidir” şəklindəki açıqlamasıdır. Siyasi təhlilçilərin qənaətincə, AKP yeni başlanğıc dedikdə konstitusiyada bir sıra islahatlar aparmağa, siyasi partiyaların bağlanmasına dair qaydaları yenidən müəyyən etməyə və müxalifətlə uzlaşmağa çalışacaq. Bu istiqamətdəki çalışmaların sentyabr ayından başlayacağı bildirilir. O da bildirilir ki, Ərdoğan Konstitusiya Məhkəməsinin qərarından çıxış edərək hökumətin tərkibində bir sıra dəyişikliklər edəcək. Azı 5-6 nazirin yeniləri ilə əvəzlənəcəyi gözlənilir. Bir sıra xarici xəbər agentliklərinin yaydığı məlumata görə, Türkiyənin hakim partiyası Konstitusiya Məhkəməsinin məngənəsindən çıxan kimi sensasiyalı bəyanat da verib. Həmin xəbər agentlikləri baş nazirin yerli NTV telekanalına müsahibəsinə istinadən bildirirlər ki, hakim partiya bundan belə baş örtüyü məsələsinin onların gündəliyində olmadığını açıqlayıb. Xarici ekspertlər bu addımı həm də onunla əlaqələndirir ki, Konstitusiya Məhkəməsində AKP ilə bağlı 3 gün davam edən müzakirələr zamanı partiyanın bağlanması tərəfdarı olan hakimlərin ən ciddi arqumentləri partiyanın hicabla bağlı mövqeyi olub. Lakin bəzi müşahidəçilər bildirir ki, məsələ təqdim olunduğundan daha mürəkkəbdir və hicab məsələsində hakim partiyanın geriyə çəkildiyini söyləmək hələ tezdir. Baş nazirin müavini Cəmil Çiçək hakim partiyanın hicabla bağlı mövqeyinə müəyyən qədər aydınlıq gətirib. AKP-nin gündəmində hicab məsələsinin olmadığını bildirən C.Çiçək qeyd edib ki, hakim partiyanın adı ilə əlaqələndirilən bir çox məsələlər AKP-nin iqtidara gəlməsindən əvvəl uzun illər boyu həll edilmədiyi üçün gündəlikdə qalıb. Onun sözlərinə görə, gündəlikdə qaldıqca da bütün təbəqələr o məsələlər haqqında danışır. C.Çiçəyin fikrincə, Türkiyədə məqalə yazan jurnalistlər arasında bu mövzuya toxunmayan qələm adamı tapmaq mümkün deyil. Hicab məsələsini müzakirə etməyən heç bir siyasi partiya da yoxdur. C.Çiçək qeyd edib ki, məhkəmənin hicabla bağlı konstitusiya dəyişikliyini ləğv etməsindən sonra qərarın qəbul edilməsində istinad edilən əsaslar hələ dərc edilmədiyi üçün hicab məsələsi istər-istəməz AKP-nin gündəliyində ola bilməz. Baş nazirin müavini əlavə edib ki, bu məsələlər AKP-nın gündəliyində olsa da, olmasa da cəmiyyətin gündəliyində qalır. Bəzi müşahidəçilər hesab edir ki, partiyanın gündəliyində hicab məsələsinin olmadığını deyən C.Çiçək bu məsələnin Türkiyə cəmiyyəti üçün hələ də problem olaraq qaldığını qeyd etməklə nə vaxtsa məsələyə qayıdacaqlarına işarə edib. Yəni hakim partiya konstitusiyada müəyyən dəyişikliklər etməklə dünyəvi rejimi qoruyan yüksək məhkəmə və prokurorluq sisteminin səlahiyyətlərini azalda, öz mövqelərini daha da möhkəmləndirə və yalnız bundan sonra illərdir Türkiyə cəmiyyətinin probleminə çevrilmiş məsələyə - baş örtüsünün universitetlərə daxil olmasına qayıda bilər. Xəbər xidməti musavat