«İran-Azərbaycan» marşrutu üzrə narkotiklərin daşınması ilə məşğul olan iki qrupdan 33 kq narkotik vasitə aşkarlanıb Milli Təhlükəsizlik Nazirliyinin (MTN) həyata keçirdiyi əks-kəşfiyyat tədbirləri çərçivəsində «İran-Azərbaycan» marşrutu üzrə qaçaqmalçılıq yolu ilə narkotiklərin daşınması ilə məşğul olan iki qrup yaxalanıb, onlardan ümumi çəkisi 33 kiloqramdan artıq olan narkotik vasitə aşkarlanıb. MTN ictimai əlaqələr mərkəzindən APA-ya verilən məlumata görə, Bakı şəhər sakinləri - Afət Hüseynova, Niyazi Əkbərov və Nazim Cabbarov saxlanılıb, 31,1245 kq narkotik vasitə olan həşiş qətranı götürülüb. Müəyyən edilib ki, onlar və habelə hazırda şəxsiyyəti istintaqla araşdırılan İran vətəndaşı qabaqcadan əlbir olub cinayət əlaqəsinə girərək həmin narkotik vasitəni qaçaqmalçılıq yolu ilə Azərbaycanın gömrük sərhədindən, gömrük nəzarətindən gizli keçirərək satış məqsədi ilə İrandan Azərbaycana gətiriblər. Məlum olub ki, A. Hüseynova İran vətəndaşına sifariş verdiyi narkotik vasitəni sonuncudan qəbul etməyi Niyazi Əkbərova və Nazim Cabbarova tapşırıb. Bu məqsədlə N. Əkbərov Afət Hüseynovaya məxsus olan və özünün etibarnamə ilə idarə etdiyi «WANHOLL» markalı avtobusla Bakıdan İrana gedib, İranın Rəşt şəhərinin Fuman qəsəbəsində həmin İran vətəndaşından 31,245 kq həşiş qətranını təhvil alıb və A. Hüseynovanın tapşırığı ilə ona kömək etmək üçün təyyarə ilə İrana gedən N. Cabbarovla birlikdə avtobusun istilik hava borusunun içərisində gizlədiblər. Bundan sonra N. Cabbarov təyyarə ilə Bakıya qayıdıb. 2008-ci il iyulun 25-də MTN tərəfindən keçirilmiş əməliyyat tədbirləri nəticəsində N. Əkbərov saxlanılıb, onun idarə etdiyi «WANHOLL» markalı avtobusdan 31,1245 kq həşiş qətranı aşkarlanaraq götürülüb. MTN tərəfindən həyata keçirilən digər əks-kəşfiyyat tədbirləri çərçivəsində Sumqayıt şəhər sakini Ziyəddin Əlizadə və İran vətəndaşı Nadir Seyidi saxlanılıb, onlardan 1,8875 kq həşiş aşkarlanıb. Müəyyən edilib ki, Z. Əlizadə, N. Seyidi və qeyriləri qabaqcadan əlbir olub cinayət əlaqəsinə girərək həmin narkotik vasitəni qaçaqmalçılıq yolu ilə Azərbaycanın gömrük sərhədindən, gömrük nəzarətindən gizli keçirərək satış məqsədi ilə İrandan Azərbaycana gətirmək barədə razılığa gəliblər. Sövdələşməyə əsasən, Z. Əlizadənin sifarişi ilə hazırda şəxsiyyəti istintaqla müəyyənləşdirilən İran vətəndaşı külli miqdarda narkotik vasitə olan həşişi qrupun digər üzvü N. Seyidinin idarə etdiyi «HOVO» markalı avtomobilin ehtiyat təkərinin içərisində gizlədib. N. Seyidi isə öz avtomobilində gizlədilmiş narkotik vasitəni gömrük nəzarətindən gizli İrandan Azərbaycana keçirib. Z. Əlizadə Bakı şəhərinin «Aeroport» adlanan ticarət mərkəzinin ərazisində həmin narkotik vasitəni N. Seyididən qəbul etmək üçün yaxınlaşarkən hər ikisi yaxalanıb. Hər iki faktla bağlı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən narkotik vasitələrin qaçaqmalçılığı), 234.4.1 və 234.4.3-cü (qabaqcadan əlbir olan bir qrup şəxs tərəfindən satış məqsədi ilə qanunsuz olaraq külli miqdarda narkotik vasitələri əldə etmə, saxlama, daşıma, göndərmə və satma) maddələri ilə cinayət işi başlanılıb. Adları çəkilən şəxslər təqsirləndirilən şəxs qismində cəlb olunaraq, məhkəmənin qərarı ilə barələrində həbs qətimkan tədbiri seçilib.