Avropa Birliyini vasitəçiyə çevirməyə çalışırlar "Hər hansı format dəyişikliyi Dağlıq Qarabağ münaqişəsinin həllinə əsaslı təsir göstərə bilməz" Dağlıq Qarabağ münaqişəsinin tənzimlənməsində vasitəçilik funksiyasını yerinə yetirən ATƏT-in Minsk qrupunun formatını dəyişdirməyin mümkünlüyündən artıq Beynəlxalq Böhran Qrupu da danışmağa başlayıb. Beynəlxalq Böhran Qrupunun təmsilçisi Sabina Freyzer gürcü-abxaz münaqişəsində Avropa Birliyinin (AB) aktiv rol oynamasına diqqət çəkib və AB-nin Qərb üçün az əhəmiyyət kəsb etməyən Dağlıq Qarabağ münaqişəsində də vasitəçilik funksiyasını yerinə yetirməsinin önəmli ola biləcəyini söyləyib. Ramiz Mikayıloğlu Sabina Freyzer bildirib ki, Qərb üçün həyati əhəmiyyət daşıyan Bakı-Tiflis-Ceyhan neft, Bakı-Tiflis-Ərzurum qaz kəmərləri münaqişə bölgəsinin lap yaxınlığından keçir və avropalılar bunu nəzərə almalıdırlar. Münaqişənin uzun müddət həll edilməmiş qalması, sülh danışıqlarının nəticə verməməsi, münaqişə tərəflərinin sürətlə silahlanması konfliktin alovlanma ehtimalını artırır. Məsələylə bağlı fikirlərini öyrəndiyimiz politoloq Zərdüşt Əlizadə deyir ki, Avropa Birliyinin ATƏT-in Minsk qrupunda vasitəçilərdən biri kimi yer alması səmərə verə bilməz. Çünki AB Avropa dövlətlərinin konsensus əsasında qərar çıxardığı bir qurumdur: "Bu yaxınlarda İrlandiyada referendum keçirildi, qurumun Konstitusiyası sayılan Lissabon sənədi rədd edildi. Avropa Birliyinin digər dövlətləri də bir İrlandiyaya görə çarəsiz qaldılar". Onun sözlərinə görə, AB-də ATƏT-in Minsk qrupunda həmsədrlərdən biri olan Fransanın çox mühüm rolu var: "İrlandiya AB-nin digər dövlətlərini çarəsiz vəziyyətə saldısa, təsəvvür etmək çətin deyil ki, Qarabağ məsələsində AB Fransanın mövqeyini nəzərə almayan digər bir mövqeyi ortaya qoya bilməz. Fransa dedikdə, Qarabağ problemində Avropa Birliyinin vasitəçiliyi nəzərdə tutulur". Politoloq bildirdi ki, vasitəçi olarsa, ola bilsin ki, AB dairələrinin münaqişənin tənzimlənməsində rolu ictimai, siyasi səviyyədə artar. Amma Minsk qrupu səviyyəsində bu, məqbul variant deyil: "Çünki ortada Fransa var". Zərdüşt Əlizadə onu da vurğuladı ki, ümumiyyətlə, hər hansı format dəyişikliyi Dağlıq Qarabağ münaqişəsinin həllinə əsaslı təsir göstərə bilməz. Çünki münaqişə elə bir mərhələdədir ki, kənar qüvvələr istəklərinə çatıblar. Rusiya münaqişə vasitəsiylə Azərbaycan və Ermənistanı əlində saxlayır, ABŞ konfliktdən yaralanıb, bölgədə oturub, öz itisadi, siyasi, hətta hərbi strukturlarını regionda yerləşdirir. Politoloq düşünür ki, artıq münaqişənin həllində Azərbaycan və erməni xalqından başqa, heç bir qüvvə maraqlı deyil. Azərbaycan və erməni xalqları özlərində təpər, şüur, qeyrət tapıb, ortaya hansısa iradə, plan qoymalıdırlar. Yoxsa münaqişənin həllində maraqlı olmayan qüvvələrə ümid bəsləməməlidirlər: "Münaqişənin həllinə kənar qüvvələr yol vermirlər. Cəmiyyətlərə, siyasilərə, mədəniyyət və elm xadimlərinə müxtəlif üsullarla, o cümlədən kəşfiyyat üsuluyla kənar qüvvələr təsir göstərirlər. Azərbaycan və erməni xalqlarının barışmaması onların maraqlarına uyğundur. Bunu biz anlamalı və nəhayət, iradə taparaq, oturub iki tərəf-dövlət, ictimaiyyət, vətəndaş cəmiyyəti, elmi dairələr, mədəniyyət, idman dairələri səviyyəsində danışmalıyıq. Müzakirə etməliyik ki, bu münaqişə bizə nə verdi, nələri aldı. Nə üçün konflikt xalqları bədbəxt edib?! Biz bunu anlamadıqca, sülhü xarici dairələrdən dilənəcəyik". xalqcebhesi