Ermənistanda ara yenə qarışır Qafar Çaxmaqlı: "Hazırda bu ölkədə narıncı inqilabdan söhbət gedir" Sabiq prezident Levon Ter-Petrosyanın tərəfdarları avqustun 1-də İrəvanın mərkəzində aksiya keçirməyə hazırlaşırlar. Xatırladaq ki, Levon Ter-Petrosyan fevralın 19-da keçirilən prezident seçkilərinə namizəd kimi qatılmış və nəticələrin Serj Sərkisyanın lehinə saxtakarlaşdırıldığını bəyan etmişdi. Müxalifətin fasiləsiz mitinqləri martın 1-dən 2-nə keçən gecə qarşıdurma ilə sonuclanmış və 20-yə yaxın insan öldürülmüşdü. O vaxtdan paytaxda kütləvi aksiyalara qadağa qoyulsa da, sabiq prezidentin tərəfdarları, Ümummilli Erməni Hərəkatı 2 dəfə icazəsiz aksiya keçirib. Qurumun təmsilçiləri bəyanlayırlar ki, 1 avqust mitinqi mövcud hakimiyyətin sonunun başlanğıcı olacaq. Ramiz Mikayıloğlu Bəs bu bəyanatlar nə dərəcədə reallığı özündə əks etdirir? Erməni Araşdırmaları Mərkəzinin rəhbəri Qafar Çaxmaqlı deyir ki, proseslər martın 1-dən başlayıb. Həmin iğtişaşlarda hökumət 8 nəfərin öldüyünü bildirib. Amma daha çox insan ölüb, həbsdə olanlar da var. Levon Ter-Petrosyan da müxalifət lideri kimi önə çıxıb, ətrafında xeyli qüvvə birləşib. Ermənistanda sosial, iqtisadi vəziyyət çox gərgindir, bu gərginlik hələ uzun müddət qalacaq. Erməni Araşdırmaları Mərkəzinin rəhbəri düşünür ki, avqustun 1-də keçiriləcək mitinq müəyyən bir başlanğıc olacaq. Çünki narazılar, Respublika, İrs partiyaları sabiq prezidentin ətrafında birləşiblər və Ermənistanda ictimai-siyasi sabitliyin pozulması gözlənilir. İşğalçı ölkədə həm rusiyameyilli, həm də qərbmeyilli qüvıvələr var. Rusiyameyilli qüvvələr indiki halda bir qədər qeyri-fəaldırlar. Qərb isə Ermənistanı əlinə keçirmək üçün vasitələr axtarır. Bu vasitələrdən biri də Levon Ter-Petrosyandır. Böyük ehtimalla, sabiq prezidentə Qərb ciddi dəstək verəcək. Onun sözlərinə göbrə, hazırda bu ölkədə narıncı inqilabdan söhbət gedir: "Amma mən fikirləşirəm ki, bu barədə danışmaq hələ tezdir. Çünki Ermənistan Rusiyanın təsiri altındadır, hakimiyyət də müəyyən mənada güclüdür. Hakimiyyət bu iğtişaşların böyüyüb narıncı inqilaba keçməsinə imkan verməz. Düşünürəm ki, ölkədə sabitlik pozula bilər, amma bu, hakimiyyət dəyişikliyinə gətirib çıxarmayacaq. Çünki hələ parlament seçkilərinə də xeyli var". Erməni Araşdırmaları Mərkəzinin rəhbəri bildirdi ki, Levon Ter-Petrosyan növbədənkənar seçkilərin keçirilməsinə nail olmağa çalışır. Amma bu, hələ tezdir: "İstənilən halda ölkə yenə də qarışacaq". Qafar Çaxmaqlı onu da dedi ki, bundan əvvəl də hakimiyyətin icazə verməməsinə baxmayaraq, müxalifət kütləvi aksiya keçirib. Onun qənaətinə görə, bu dəfə də Levon Ter-Petrosyanın tərəfdarları mitinq keçirəcəklər: "Ermənistanda nə qədər olmasa da, müəyyən demokratik mühit var. Yəni qanunlar da buna icazə verir. Avropa Şurası, başqa beynəlxalq təşkilatlar da Ermənistana nüfuz edə bilirlər. Erməni hakimiyyəti mitinqin qarşısını ala bilməyəcəklər. Müxalifət buna qərar veribsə, hazırlıq işi gedibsə, xalqın özü küçələrə töküləcək. Şübhəsiz ki, hakimiyyət bu mitinqləri dağıtmaq istəyəcək. O zaman insidentlər ola bilər. Amma bunun qanlı olaylara çevrilməsi ehtimalı azdır. Çünki hakimiyyət bunu istəmir, Ermənistanda da narazıların sayı çoxdur, Levon Ter-Petrosyanın ətrafında birləşiblər. Narazılar hakimiyyətin içərisində də var". Erməni Araşdırmaları Mərkəzinin rəhbəri vurğuladı ki, Ermənistan hazırda meşədə azmış insana bənzəyir, hara gedəcəyini müəyyənləşdirə bilmir. İşğalçı ölkə bütün enerji və tranzit layihələrindən kənarda qalıb. Elə ona görə də İrəvan Ankarayla Berndə xarici işlər nazirliklərinin idarə rəisləri səviyyəsində müəyyən gizli danışıqlar aparıb: "Amma mən fikirləşirəm ki, Türkiyə heç vaxt Azərbaycanı ayağa verməz, ortada müəyyən prinspial məsələlər var. Ermənistan Türkiyəyə qarşı "soyqırım", ərazi iddiaları irəli sürür, işğal etdiyi Azərbaycan torpaqlarını boşaltmır. Düzdür, türk diplomatiyasında Ermənistana qarşı müəyyən yumşalma var. Amma düşünmürəm ki, bu yumşalma Türkiyənin dövlət maraqlarını üstələsin". Onun fikrincə, ölkənin düşdüyü ağır sosial-iqtisadi durumdan çıxarmaq üçün yollar arayan Ermənistandakı mövcud hakimiyyət belə bir vəziyyətdə qan tökməyə getməz: "Çünki martın 1-də artıq belə hadisə baş verib və Ermənistanın bir dövlət kimi nüfuzu beynəlxalq təşkilatlarda çox aşağı düşüb. Hətta erməni mətbuatı da yazır ki, ölkə müəyyən beynəlxalq təşkilatlardan, Avropa Şurasından çıxarıla bilər. Ona görə də hakimiyyət çalışacaq ki, avqustdakı mitinq insidentsiz ötüşsün. Ola bilər ki, hakimiyyət müxalifətə müəyyən güzəştlərə getsin ki, dünyadan təcrid olunmasın". xalqcebhesi