Konqresdə Azərbaycanla bağlı dinləmələr keçiriləcək

SON XƏBƏRLƏR

Konqresdə Azərbaycanla bağlı dinləmələr keçiriləcək_Proses iyulun 29-na təyin olunub

2021.10.20, 07:36

Gunaz.tv

Konqresdə Azərbaycanla bağlı dinləmələr keçiriləcək Proses iyulun 29-na təyin olunub

ABŞ Konqresinin Helsinki Komissiyasında Azərbaycanla bağlı dinləmələr keçiriləcək. Proses iyulun 29-na təyin olunub. Komissiyanın toplantısına rəhbərliyi qurumun sədri Alsi Hatinqs və həmsədri, senator Bencamin Kadrin edəcəklər. Dinləmələr "Azərbaycanda demokratikləşmə və insan haqları" mövzusunda olacaq. A.Hastinqsin ofisinin yaydığı məlumatda bildirilir ki, Azərbaycan müasir müsəlman dövləti və ABŞ-ın müttəfiqidir. O da vurğulanır ki, bu ilin oktyabrına təyin olunan prezident seçkiləri Azərbaycana ATƏT-in standartlarına cavab verən seçkilər keçirmək üçün gözəl imkan yaradacaq. Dinləmələrdə ABŞ dövlət katibinin demokratiya, insan haqları və əmək məsələləri üzrə köməkçisi Devid Kramer, Azərbaycanın ABŞ-dakı səfiri Yaşar Əliyev, "Freedom House" təşkilatının nümayəndəsi Kris Uolker çıxış edəcəklər. Toplantıya Minsk Qrupunun amerikalı həmsədri Metyu Brayza da qatılacaq. "Azərbaycan naminə" İctimai Forumun rəhbəri Eldar Namazovun sözlərinə görə isə Helsinki Komissiyasının iyunun 29-da Vaşinqtonda keçirilməsi planlaşdırılan dinləmələrində əsasən Azərbaycanda insan haqları və demokratikləşmə ilə bağlı vəziyyət, həmçinin ölkədəki seçkiöncəsi durum araşdırılacaq. Belə dinləmələrin keçirilməsi ilə bağlı müraciət isə onun ABŞ-a səfəri zamanı edilib: "Mənim ABŞ-a bir müddət əvvəl reallaşan səfərim zamanı Konqres və Avropada Təhlükəsizlik və Əməkdaşlıq Komissiyasında keçirilən görüşlərdə onlara Konqres üzvlərinə ünvanlanan və Azərbaycandakı seçkiöncəsi vəziyyət, demokratikləşmə və insan haqları ilə bağlı vəziyyətlə əlaqədar xüsusi dinləmələrin keçirilməsi xahişinin əksini tapan müraciət təqdim edildi". E.Namazov bildirdi ki, bu müraciətində o, konqresmenlərdən və Helsinki Komissiyasından həbsdə olan jurnalistlərin azad edilməsi, Seçki Məcəlləsinə dəyişikliklər, sərbəst toplaşmaq azadlığı, bütün namizədlərə seçki təbliğatı dövründə bərabər şəraitin yaradılması kimi məsələlərə xüsusi diqqət ayırmalarını istəyib: "Biz bu cür dinləmələrin keçirilməsinin vacibliyini ətraflı müzakirə etdik. Baxmayaraq ki, Konqresdə keçən ay ümumilikdə Cənubi Qafqazdakı vəziyyətlə bağlı dinləmələr keçirilmişdi". Qeyd edək ki, Helsinki Komissiyası ABŞ-ın dövlət orqanı sayılır. Bu qurum Helsinki Aktının tələblərinin yerinə yetirilməsinin monitorinqini aparır. Onun 9 üzvü Senat və Nümayəndələr Palatasının təmsilçisidir. Komissiyanın üzvlərindən biri ABŞ Dövlət Departamentini, digərləri isə Müdafiə və İqtisadiyyat nazirliklərini təmsil edir. E.Namazov onu da vurğulayıb ki, dinləmələrə qədər Helsinki Komissiyasının üzvlərinə müvafiq materiallar göndəriləcək. Azad Əliyev

GUNAZ.TV

SON XƏBƏRLƏR