Avropa Şurası rəsmi Tiflisi soydaşlarımıza diqqət yetirməyə çağırır Gürcüstanın Ermənistanla sərhəd ərazilərində yaşayan azərbaycanlılara qarşı ayrı-seçkilik siyasəti aparılır Avropa Şurasının (AŞ) rəsmi internet saytında yerləşdirilmiş "Kvemo-Kartli regionunda milli azlıqların müdafiəsinə dair çərçivə sazişinin Gürcüstanın icrasına dair" qeyri-hökumət təşkilatlarının alternativ hesabatına əlavədə maraqlı məlumatlar yer alıb. "Gürcüstanın Kvemo-Kartli regionu Marnueli rayonunun Sadaxlı, Burma Təzəkənd və Təzəkənd yaşayış məntəqələrində azərbaycanlılara qarşı ayrı-seçkilik" adlı bu əlavə "Gürcüstan mənim vətənimdir" və "Mtred" hüquq müdafiə təşkilatlarının məlumatları əsasında hazırlanıb. Sənəddə yazılır ki, rəsmi Tiflisin səhlənkarlığı üzündən erməni sərhədçiləri Gürcüstan ərazilərinin dərinliyinə girir. Ramiz Mikayıloğlu Sadaxlı, Burma Təzəkənd və Təzəkənd yaşayış məntəqələrinin sakinləri hesab edirlər ki, Gürcüstan hakimiyyətinin səhlənkarlığı ucbatından ölkənin Ermənistanla sərhəd ərazilərində yaşayan azərbaycanlılara qarşı ayrı-seçkilik siyasəti aparılır, onların hüquq və azadlıqları pozulur. Gürcü hakimiyyəti azərbaycanlıların bu regionda qalması üçün əlverişli şərait yaratmayıb, eyni zamanda belə şərait yaratmaq, onların mədəniyyətini qoruyub saxlamaq və inkişaf etdirmək, din, dil və ənənələrini saxlamaq niyyətinlə deyil. Dövlət ayrı-seçkiliyə qarşı mübarizədə adekvat tədbirlər görməyə nəinki qadir deyil, hətta bir çox hallarda qapalı, üstüörtülü şəkildə ayrı-seçkiliyə yol verir. Sadaxlı kəndində polis işçiləri sakinlərə öz evlərinin qarşısında kənd təsərrüfatı məhsullarının satışını qadağan edir, halbuki belə ticarətə Gürcüstanın hər yerində rast gəlinir. Hesabatda qeyd olunur ki, özbaşına olaraq sərhədlərə yenidən baxılması nəticəsində həmin kəndlərdəki bəzi evlər erməni ərazisinə düşüb və sakinləri məcburən evlərindən çıxarıblar. Şumluq torpaqlar və otlaqlarla bağlı vəziyyət də eynidir. Bundan əlavə, erməni sərhədçiləri suvarma üçün su mənbələrini tutublar və bu da kəndliləri kənd təsərrüfatı bitkilərini becərmək imkanlarından məhrum edib. Hesabatda yer alan məsələlərlə bağlı fikirlərini öyrəndiyimiz əslən Borçalıdan olan KXCP Ali Məclisinin sədri Zəlimxan Məmmədli deyir ki, məsələyə günümüzün geosiyasi reallıqları prizmasından yanaşmaq lazımdır. Bu geosiyasi reallıqlar Azərbaycan və gürcü cəmiyyətlərinin inteqrasiyasını, dostluğunu tələb edir. Onun sözlərinə görə, problem hər yerdə var, Gürcüstandakı Azərbaycan kəndlərində də çoxlu sayda problemlər mövcuddur. Etnik separatizm, Rusiyanın təhdidləri, Moskvanın Mixail Saakaşvili hakimiyyətini çevirmək üçün açıq hərəkətə keçməsi müqabilində Gürcüstanda çox ciddi demokratik islahatların keçirilməsi də faktdır. Zəlimxan Məmmədli bildirdi ki, həmin ərazilərdə ermənilərlə azərbaycanlılar arasında hər hansı ciddi etnik toqquşma baş verməyib. Amma Qarabağ müharibəsinə görə hər yerdə ermənilərlə azərbaycanlılar arasında bir psixoloji gərginlik var, ancaq Gürcüstanda bu problem sistematik qabarmır: "Təbii ki, erməni ermənidir, onların içərisində milli zəmində türklərə qarşı düşmənçilik var. Azərbaycan türkü də ermənini düşmən kimi görür. Zaman-zaman sərhəddə gərginlik ola bilər, ancaq bunu siyasiləşdirməyə müsbət yanaşmıram". Onun sözlərinə görə, əgər doğrudan da Sadaxlıda bir azərbaycanlı evinin həndəvərində öz məhsulunu sata bilmirsə, deməli, qanun buna yol vermir. Bunun üçün ticarət mərkəzi var. Məhsul satışı zamanı dövlətə vergi də ödənilməlidir: "Bir kənddə müxtəlif nəsillər yaşayırsa, yaxud Azərbaycan və gürcü kəndləri qonşudurlarsa, onların məişətində, davranışında uyuşmayan bəzi məqamlar var. Hər halda Sadaxlı sərhəddədir, orada böyük bazar vardı. Həmin bazar dağıdıldı, orada ölən də, itkin düşən də oldu. İndi o kəndin bazar psixologiyasından çıxması lazımdır. Bu sərhəd bölgəsində narkoticarətin mövcudluğu, ayrı-ayrı mafiyalar arasında toqquşmalar, çox ciddi gərginliklər və Sadaxlının Azərbaycan kəndi olması, onun Ermənistanla sərhəddə yerləşməsi nəzərə alınaraq həmin bazar bağlandı. Bazarın mövcudluğu istənilən zaman orada toqquşmaların, atışmaların baş verməsinə zəmin yaradırdı. Onu da deyim ki, yüz illər boyu Sadaxlı kəndi yalnız o bazarla dolanmayıb. İndi də profili dəyişdirmək lazımdır". Zəlimxan Məmmədli dedi ki, AŞ Gürcüstanda etnik problemlərin həllində maraqlıdır, bu sahədə qurum kifayət qədər ciddi qətnamələr çıxarıb. Mixail Saakaşvilinin hakimiyyətə gəlməsi ərəfəsində də Borçalı ilə bağlı bir sənəd qəbul olunub: "Avropa Şurası yerli QHT-lərdən də məlumatlar alır, özləri də təhqiqat aparırlar. Qurumun son sənədində də müəyyən həqiqət var. Amma narahatçılığım onunla bağlıdır ki, bu, Azərbaycan və Gürcüstan cəmiyyətləri arasında problem yaratmasın. Elə yol axtaraq ki, o yolla problemlərimizi həll edək və Gürcüstanla Azərbaycan daha sıx tellərlə bir-birinə bağlansın". xalqcebhesi