Nə qədər yazırsan da bu dünya düzəlmir ki, düzəlmir (5) - Semed Niknam Nə qədər yazırsan da bu dünya düzəlmir ki, düzəlmir “Cəlil Məmmədquluzadə“ Diasporamızın fəaliyyəti Salam molla əmi! Sən həmşəriləri ən çox Bakıda, bir də Təbrizdə Molla Nəsrəddin qəzetini çıxaranda və Xiyabanı Hərəkatı zamanı görmüsən. İndi o vaxtdan yüz il keçir. Sənin Avropada yaşayan çağdaş və modern həmşərilərdən xəbərin yoxdur. Bilmirsən, bizim diaspora burada nə qiyamət edir. Elə bir işlər görürlər ki, heç başqalarının misal üçün farsların və ermənilərin ağlına belə gəlməz. Məsələn, farsların əlindən gələn odur ki, gündə beş on kitab yazıb İsveç kitabxanaların öz kitabları ilə doldursunlar, amma bizim yazdığımız kitabları kitabxanalara buraxmasınlar. Bəli, günah onlardadır. Yoxsa, indi İsveç kitabxanaları bizim kitablarla da dolmuşdu. Soruşacaqsan necə yəni bizim kitabları kitabxanalara buraxmasınlar ? Bəli , Molla əmi! Burda da günah farslardadır. Necəliyini sonra deyərəm. Ən vacibi öz diasporamızın fəaliyyətindən yazmaqdır. Ermənilərdə lap çaşıb, İsveç televiziya kanallarında sənədli film göstərirlər ki, guya Şuşa Erməni şəhəridir. Bax belə axmaq-axmaq işlərlə məşğuldurlar. Nə olsun ! Ermənilərin fəaliyyəti nəticəsində İsveç Xarici İşlər Nazirliyinin rəsmi saytında Dağlıq Qarabağın mərkəzi kimi hələ də Stepanakert göstərilir. Nə olsun ! Kürdlərin İsveç dərslik kitablarında yerləşdirdiyi xəritədə, yalnız Güney Azərbaycanın deyil, hətta Azərbaycan Respublikasının da ərazisinin böyük bir bölümü “ Kürdüstan “ xəritəsinə daxil edilib. Nə olsun ! Molla əmi ! Dəfələrlə müraciət etsək də, Azərbaycan diasporasının belə xırda-xırda işlərlə məşğul olmağa vaxtı yoxdur. Onların daha vacib işləri var, məsələn : Bir isveçli və bir Almaniya vətəndaşından kağızlar aldım. Kağızların məzmunu təxminən eyni olduğu üçün, yalnız isveçlinin kağızı haqda yazıram. Yazırdı ki, əvvələn xahiş edirəm səndən başqa heç kim bu məktubu oxumasın. Saniyən mümkün olsa biz yazıq isveçlilərə kömək et. O sözünə davam edərək yazır: Biz 50 nəfərə yaxın isveçliyik. Bir idarədə işləyirik. İdarənin rəisi qeyrətli, qoçaq və cəsur bir azərbaycanlıdır. O hər gün səhər iş saatı başlamamış bizim hamımızı sıraya düzür və Azərbaycan dilində vətənpərvər şerlər oxutdurur. Bunun üçün biz işə bir saat tez getməyə məcburuq və üstəlik şerləri oxumağa dilimiz yatmır, çətinlik çəkirik. Məndən kömək istəyən isveçli yazıq, rəisinin adını yazmaqdan qorxsa da, mən o rəisi və onun kimi belə vətənpərvər işlərlə məşğul olan başqa azərbaycanlı rəislərin çoxunu tanıyıram. Molla əmi ! Siz də tanımaq istəsəniz, buyurun təşrif gətirin Bakıda keçirilən rəsmi və qeyri rəsmi görüşlərə və orada xaricdə fəaliyyət göstərən Azərbaycan diasporasının nümayəndələrinin çıxışlarını dinləyin. Orada belə sözləri çox eşitmək olar. Onda görərsiniz ki, bu qoçaqlar, yalnız bir idarə işçilərini deyil, bəlkə yeri gəlsə bütün Avropanı ayağa qaldıracaqlar. Bunlar yaxşı bilirlər ki, xalqı ayağa qaldırmaq hər şeydən vacibdir, yoxsa farslar, ermənilər və kürdlər kimi kitab, xəritə, film və belə axmaq işlərlə məşğul olmağa dəyməz. Amma molla əmi ! Mənə məktub yazan isveçlinin xahişini nəzərə alaraq, o rəisi tapdım və dedim ki, camaata zəhmət vermə, şerləri oxutmasan da olar. Dedi, yox oxumalıdırlar. Qoy bu isveçlilər vətənpərvərliyi bizdən öyrənsinlər. Maşallah belə fərasətə. Sonra, Molla əmi, sənin yazdığın ağıl duasını asdım rəisin boynundan ki, göz dəyməsin. baybak