Urmu gölü sürətlə quruyur

SON XƏBƏRLƏR

Urmu gölü sürətlə quruyur

2021.10.20, 07:36

Gunaz.tv

GünAz TV: Dünyanın üçüncü duz gölü çölə çevrilir, quruma prosesi isə 3-5 il ərzində başa çatacaq.

Dünyanın ən böyük üçüncü duzlu gölü olan və Cənubi (Güney) Azərbaycanda yerləşən Urmu gölü yox olma təhlükəsi ilə üz-üzə qalıb. TİA.AZ bildirir ki, flaminqo, pelikan və qağayılar kimi su quşlarının qışda sığındığı gölün artıq 60 faizi tamamilə quruub.

Mütəxəssislər bildirirlər ki, göl bir neçə ildən sonra tamamilə quruyub, yox olacaq. Vəziyyətin belə şəkil alması kimi isə quraqlıq və yanlış suvarma sistemlərindən yararlanmasını göstərirlər. Onlar qeyd edirlər ki, İran hökuməti gölə axan çayların qarşısını kəsməklə, Urmunun məhvinə səbəb olublar.

TİA.AZ qeyd edir ki, İranın ən önəmli turizm sahələrindən biri olan gölün bu gün duzla örtülmüş çölə çevrilməsi ailəsini gəmi turları ilə əldə etdiyi gəlirlərlə dolandıran əhaliyə də böyük zərbə vurub. Onlardan biri Kamal Sədat bildirir ki, iki il bundan əvvələ qədər badam və üzüm sahələrini inkişaf etdirməsinə gəmi gəzintilərindən əldə etdiyi gəlirlərin böyük təsiri olub. «Göl quruduğundan bəri hər 10 dəqiqədən bir gəminin pərvanələrini təmizləmək məcburiyyətində qalıram. Turistlər bu cür sıxıcı gəzintilərə çıxmaq istəmir».

Sədat onu da deyir ki, quraqlıq nəticəsində gəmi gəzintilərini ləğv etmək qərarına gəlib.

Bildirək ki, Urmu gölünün ən dərin yeri hazırda 2 metrdir. Rəsmilər aprel ayında vəziyyətin təhlükəli ola biləcəyi səbəbindən Gülmanxana, Şərəfxana və İslami limanlarını (bəndərləri) bağlayıblar. Suların çəkilməsi ilə bölgədəki otellər (hotellər) də zərər gördüyündən, yeni otellərin tikintisi layihələri də təxirə düşüb.

Turizmlə yanaşı, kənd təsərrüfatı da gölün qurumasından ciddi zərər görməkdədir. Belə ki, qurumuş çöldən duz tozunu havaya qaldıran külək onu yaxınlıqdakı əkin sahələrinə uçurur. Bir çox kəndlilər yüz illər boyu alma, üzüm, püstə, badam, soğan, kartof, aromatik (ətirli) çay bitkiləri və şəkər qamışı yetişdirmələrinə artıq ciddi ziyanlar dəydiyindən narahatdırlar.

Keçən günlərdə bununla bağlı açıqlama verən Urmudan olan deputat (millət vəkili) Salman Zakir hal hazırkı gedişatla duz sunamisinin artdığını bildirmişdi. «3-5 il içində Urmu gölü tamamilə quruyacaq. Bundan sonra 8-10 milyard ton duz milyonlarla insanın həyatını risk altında qoymağa başlayacaq».

Bildirilir ki, Zakirin bu təxminləri Ekologiya Nazirliyinin bölgə üzrə nümayəndəsi Həsən Abbasnejad tərəfindən də dəstəklənir. Rəsmi hesabatlarda isə Urmu gölünün qurumasının səbəbi kimi, gölə axan çayların sularından suvarmada yanlış istifadə olunması göstərilir. Bununla yanaşı, çaylar üzərində inşa edilən bəndlərin də sayının çoxluğu əsas amillərdən biri kimi təqdim olunur. Belə ki, 1990-cı ildən bəri bu ərazidə 35 bənd tikilib, yaxın iki il içində isə daha 10 bəndin tikilməsi nəzərdə tutulur.

GUNAZ.TV

SON XƏBƏRLƏR