GünAz TV: Azərbaycan musiqisini Danimarkada yaşadan və onu sevərək təbliğ edən Danimarka-Azərbaycan Dostluq Cəmiyyətinin Mədəniyyət Mərkəzinin rəhbəri, fəal diasporçu Kəmalə Hüseynovanın mətbuat mərkəzimizə müsahibəsi...

- Xöş gördük sizi və ilk öncə Azərbaycan oxucusuna özünüz haqqında məlumat vermənizi istərdik.

- Mən 1965-ci ildə anadan olmuşam. Bakıda o vaxtkı Dzerjinski adına 11 illik orta ixtisas musiqi məktəbi, eyni zamanda, Bakı şəhəri 12 n-li orta məktəbi fərqlənmə ilə bitirmişəm. 1986-cı ildə indiki N.Tusi adına Azərbaycan Pedaqoji Universitetini qırmızı diplomla bitirmişəm. Onu da qeyd etmək istərdim ki, Adil Bəbirov, Eldar Mansurov, Kamilə Qarabağlı, Gülarə Axundova, Dilarə Əliyeva kimi istedadlı bəstəkar və musiqiçilərin tələbəsi olmuşam, bununla da fəxr edirəm, əldə etdiyim nailiyyətlərdə onların əməyi böyükdür. Həmin ildən etibarən ixtisasım üzrə əmək fəaliyyətinə başlamışam.

1988-ci ildə ailə qurmuşam və həyat yoldaşım sovet (Şurəvi) ordusunun zabiti olduğu üçün Macarıstanda, Rusiyada və Ukraynada orta və musiqi məktəblərində çalışmışam.Təbii ki, sovet dönəmində hərbi orkestrlərlə (karşünaslarla) və coxmillətli uşaq və gənclərlə apardığım işlərlə böyük təcrübə əldə etmişəm.1991-ci ildə ermənilərin Azərbaycana təcavüzü başlayan kimi həyat yoldaşım Vətənə dönərək döyüşlərə qatıldı, mən isə Azərbaycan Respublikası (Cümhuriyyəti) Bədii Gimnastika Federasiyasında musiqi tərtibatçısı və pianoçu kimi fəaliyyət göstərməyə başladım.

2003- cü ildən ailəm ilə Danimarkanın Fredensborq şəhərində yaşayıram. Danimarka dili məktəbini bitirmişəm, özəl Danimarka məktəbində, ixtisas musiqi məktəbində və özəl türk məktəbində musiqi, xor və fortepiano dərsləri verirəm. Bundan əlavə, danimarkalı vətəndaşlardan ibarət “ Hafla” instrumental ansamblında və Danimarkanın qədim Renessans xorunda fəaliyyət göstərirəm. Danimarka-Azərbaycan Dostluq Cəmiyyətinin Mədəniyyət Mərkəzinin rəhbəri kimi daim fəaliyyət göstərirəm.

- Danimarka insanında Azərbaycan musiqisinə maraq necədir və xüsusilə, hansı janrlarla maraqlanırlar?

- Bir çox Avropalılar kimi, danimarkalılar da əsasən müasir estrada musiqisinə, yaşlı nəsil isə dini musiqiyə üstünlük verirlər. Ümumiyyətlə, danimarkalılar təvazökar, işguzar və xoşməramlı xalqdır. Hər yeniliyə böyük maraq göstərirlər. Azərbaycan musiqisinə maraqları gündən -günə artır. Çıxışlar və konsertlerdən sonra mənə tez-tez yaxınlaşıb ifa etdiyim musiqi və mahların qaynaqları ilə maraqlanırlar. Azərbaycan bəstəkarlarının CD satışı və ya internet ünvanını istəyirlər. Hesab edirəm ki, Azərbaycanımızı geniş tanıtmaq üçün musiqimizin və, ümumiyyətlə, zəngin mədəniyyətimizin təbliği birinci yerdə olmalıdır. Çünki bu protokol tədbirlərdən daha effektivdir (təsirlidir).

- Ümumiyyətlə, Qərb müsiqisi ilə Şərq müsiqisi arasında fərqli cəhətlər coxdurmu, yoxsa prinsip etibarı ilə hər ikisinin fəlsəfi mahiyyəti eynidir?

- Təbii ki, Qərb musiqisi ilə bizim musiqi arasında olduqca böyük fərq var və fəxrlə qeyd etmək istərdim ki, bizim musiqimiz qərb musiqisindən qat-qat zəngin və maraqlıdır, bununla danimarkalıların özləridə razılaşır. Nəinki qərb musiqisi, şərqdə Azərbaycan musiqisindən zəngin ve gözəl musiqi yoxdur. Bunu dəfələrlə mənimlə söhbətlərində Turkiyənin, Misirin, İraqin, Özbəkistanin, İranin peşəkar musiqişunasları təsdiq ediblər. Təkrarolunmazlığı və rəngarəngliyi ilə seçilən azərbaycan musiqisinə bir dəfə qulaq asan, ömürlük onun heyranı olur.

- İctimai işlərdə fəalsınızmı və diasporamızın işləri ilə maraqlanırsınızmi?

- Əlbəttə, amma daha cox Türk özəl məktəbində və Danimarka “Kompas” gənclər mərkəzində geniş fəaliyyət göstərirəm. Hər il keçirilən Beynəlxalg Türkçe Olimpiatlarinin Danimarka üzrə musiqi tərtibatçisi və münsifler heyətinin üzvüyəm. Danimarka-Azərbaycan Dostluq Cəmiyyətinin mədəniyyət mərkəzinin rəhbəriyəm. Ümumiyyətlə yəqin ki, musiqi özü-özlüyündə içtimai işdir, insanlarin ortaq nöqtəsidir.

- Bu gün Danimarkalıların təsəvvüründə Azərbaycanla bağlı fikirləri necədir?

- Mən Danimarkaya yeni gələndə ətrafimizdaki çox insanlar Azərbaycanın harada yerləşdiyini belə bilmirdilər, hətta bu mənim xətrimə dəyirdi. Amma gün-gündən vəziyyət dəyişir. Azərbaycanın güclü dövlətə çevrilməsi, dünyada artan nüfuzu bizləri çox sevindirir. Artıq bu gün Azərbaycanı geniş Danimarka kütləsinə tanıtmağa nail olmuşuq. Yaxınlarda küçədə bir danimarkalının “Əsmərim” mahnısını özü-özünə zümzümə etdiyini eşitdim və bunu gördüyüm işlərin ən böyük bəhrəsi kimi qəbul edirəm.

Musiqimiz o qədər gözəldir ki, hətta bir qrup təqaüdçü danimarkalı xor təşkil edərək onlara azərbaycan mahnılarını öyrətməyi məndən xahiş ediblər. Çox gözəldə oxuyurlar, bizim mülayim xalq mahnılarınə çox bəyənirlər. Bu gün, demək olar ki, Hillerod və Fredensborq şəhər bələdiyyələrinin əsas dövlət və mədəniyyət tədbirlərində hər zaman Azərbaycan musiqisi və mahnıları səslənir və hər dəfə alqışlarla qarşılanır.

- Amma əslində siz böyük işlər görürsünüz, danimarkalılara musiqimizi öyrətməklə xalqımızın milli mənəvi dəyərləri ilə onları məlumatlandırırsınız. Oxucularımız üçün də maraqlı olardı ki, Danimarkada sizin kimi içtimai-inzibati, elm tədris mərkəzlərində çalışan insanlar varmı?

- Danimarkada azərbaycanlı çox azdır. Yəqin ki böyüklü-kiçikli 60-70 insan var və onlar bütün Danimarkaya yayılmışlar. Demək istərdim ki, azərbaycanlılar oxuyur, çalışır və nailiyyətlər əldə edirlər. Aramizda gözəl mütəxəssislər, həkimlər, iş adamlari var və əlde etdikləri nailiyyətlər Azərbaycanımızı bir cox sahələrdə tanıdır. Amma hesab edirəm ki, Azərbaycanımızı tanıtmaq üçün geniş danimarkalı auditoriyası (taban, bəstər) vacibdir. Həyat yoldaşım Elxan Fredensborg bələdiyyəsinin mədəniyyət ve ictimaiyyət bölməsində fəaliyyət göstərir və Danimarka – Azərbaycan Dostluq cəmiyyətinin sədridir.

Cəmiyyətimiz Danimarka dövləti tərəfindən dəstəklənir, fəaliyyətimiz gərəkli və əhəmiyyətli qəbul olunur. Azərbaycanla bağlı bir çox proyektlər (tərhlər) həyata keçirmişik və bu gündə bu proyektlər davam edir. Mənə gəldikdə ən böyük arzum yaratdığımız danimarkalilardan ibarət “Hafla” ansamblı (qrup) ilə Azərbaycanda konsert proqrami ilə çıxış etmək, ansambl üzvlərinə qədim və gözəl Azərbaycanımızı göstərməkdir.

Söhbətləşdi:Elnur Eltürk