GünAzTv: Rusiyada etnik zəmində cərəyan edən hadisələrin yaxın bir neçə gündə daha geniş miqyas alacağı istisna olunmur. Artıq Rusiya mediası da bu istiqamətdə həyəcan təbili çalır. "Press sentr portalı yazır ki, yaşanan xaotik durumun artıq bütün ölkə ərazisinə yayılması vəziyyəti daha da qəlizləşdirir. Bu gedişlə hakimiyyətin etnik qarşıdurmaların qarşısını ala biləcəyinin böyük sual altında olduğu vurğulanır.    Siyasi müşahidəçilər də bildirir ki, gənc rus futbol azarkeşilə bir neçə şimali qafqazlı arasında mübahisədən başlanan toqquşma sonradan bütün Moskvaya və indi isə bütün Rusiya şəhərlərinə yayılıb. Bunun hələ uzun müddət davam edəcəyi gözlənir. Hakimiyyət bildirir ki, zorakılıqların qarşısını almaq üçün, onun təbirincə desək, ən amansız tədbirlərə əl atacaq.    Hələlik isə Rusiyada Qafqazdan olanlara qarşı hücumların artdığı bildirilir. İndiki vəziyyətdə belə məlumatlar da çoxalmağa başlayıb ki, baş verənlərin hamısı eyni mərkəzdən idarə olunur. Bunu Rusiya İnsan Haqlarının Müdafiəsi Mərkəzinin ekspreti Yelena İvanova da təsdiqləyir: "Bəli, küçələrə çıxan insanları idarə edirdilər. O qüvvənin kimliyini bilmək çətin deyil. Bunun üçün internetdə, xüsusilə də millətçi hərəkat və qruplaşmaların saytları, onların rəhbərlərinin bloqları, "Vkontakte" və "Odnoklassniki"dəki profillərinə baxmaq yetər. Məhz həmin şəxslər gəncləri küçələrə, kütləvi itaətsizlik, etiraz aksiyalarına, qafqazlılara qarşı hücumlara çağırırdı".    Rusiyanın ən radikal millətçi təşkilatlarından olan "Qanunsuz Miqrasiyaya Qarşı Hərəkat"ın (DPNİ) lideri Aleksandr Belov (Potkin) isə millətçi təşkilatların bu iğtişaşları təşkil etmələri barədə deyilənləri qətiyyətlə təkzib edir: "Bu iddiaların heç bir əsası yoxdur. Biz Moskvada fanatların aksiyalarına qatılmamışıq və bütün üzvlərimizlə yanaşı, tərəfdarlarımıza da o aksiyalardan mümkün qədər uzaq durmağı tapşırmışıq. Həmin aksiyaları təşkil edən və həyata keçirən millətçilər yox, başqa çirkin qüvvələrdir. Təşkilatçıları başqa yerdə axtarın. Həmin adamlar millətçi adı ilə pərdələnərək kütləvi iğtişaşlar yaratmaq və məqsədlərinə çatmaq istəyib".    Lakin Rusiya xüsusi xidmət orqanlarının apardığı araşdırmalar göstərir ki, bu iğtişaşların arxasında DPNİ və onun kimi təşkilatlarla bahəm, daha radikal strukturlar durur.    Həmin strukturlar isə Rusiya Millətçilər İttifaqı, Rusiya Monarxistlər Liqası, Rusiya "Nurlu Yol" Hərəkatı və bu kimi təşkilatlar olub. Baş verənlərin soydaşlarımıza təsiri isə həmişə xüsusi diqqət yetirilən məsələ olub. Son bir neçə gündə baş verənlər nəticəsində soydaşlarımızın, hələ ki, buradan kütləvi şəkildə çıxışı qeydə alınmayıb. İqtisadçılara görə, Rusiyadan gələn pulların insanların sosial vəziyyətinin yaxşılaşdırılmasına müəyyən təsiri olsa da, həmin pulların kəsilməsi faciəyə də səbəb olan deyil. Daha geniş biznesi olanların isə, Rusiyadan çıxacağı halda Azərbaycana deyil, Ukrayna, Moldova, Belarus kimi ölkələrə üstünlük verəcəyi gözlənir. Ancaq Moskvadakı hadisələrdən sonra azərbaycanlıların Rusiyadan köçməsi faktına, hələ ki, rast gəlinmir. Həm dövlət dəmiryolunda, həm də hava limanında Moskavadan Azərbaycana gələn sərnişinlərin sayında hər hansı bir artımın müşahidə olunmadığı bildirilir.    Onu da xatırladaq ki, yaşanan zorakılıq Rusiyanın 2018-ci ilin Dünya Futbol Çempionatına ev sahibliyi barədə seçimin bayram edildiyi vaxta təsadüf edib. Bu, Rusiyada irqçilik barədə çətin suallar doğurur və Moskva xarici futbol komandalarının təhlükəsizliyini necə təmin edəcəyi barədə də suallara cavab verməli olacaq.    Rusiyanın millətlərarası gərginlik və ultrairqçi qruplar sahəsindəki problemləri çoxdanqalmadır.    Lakin indi başlıca məsələ ondadır ki, bu problem zorakılıqlar və toqquşmalar şəklində ölkə şəhərlərinin küçələrinə çıxıb.    Kremlin baş ideoloqu Vladislav Surkov həyəcanlı vəziyyətin yaranmasına görə liberal müxalifətin məsuliyyət daşıdığını bildirib. O deyib ki, müxalifətin tez-tez baş verən küçə yürüşləri küçələrə çıxmağı dəbə çevirib. Baş vermiş zorakılıqların iştirakçıları barədə danışarkən, Surkov onların özlərini eynilə Dmitri Medvedyevin və Vladimir Putinin əleyhdarları kimi apardığını söyləyib: "Bu iki şəxs isə sabitlik və qayda-qanun barədə siyasi layihənin əsasını təşkil edir. Rusiya müxalifətinin bəlası budur ki, hakimiyyət özünün dinc əleyhdarları ilə futbol xuliqanlarını və ekstremistləri bir tərəziyə qoyur".    Öz növbəsində, müxalifət baş verənlər üçün hakimiyyətin məsuliyyət daşıdığını bildirir. Müxalifət bildirir ki, vətənpərvərlik barədə təmtəraqlı demoqogiyası ilə hakimiyyət dözülməzlik, ksenofobiya və hətta irqçi hisslərin baş qaldırmasına rəvac verib. Bir çox xarici media vasitələri artıq indidən belə bir sual qaldırıblar: Rusiya dünya çempionatına gələcək xarici komanda və azarkeşlərin təhlükəsizliyini təmin etməyə nə dərəcədə qabildir? Tahir TAĞIYEV . Bakı xəbər