GünAzTv mətbuat mərkəzinin növbəti müsahibi siyasi elmlər doktoru, Frankfurt Sülh Arașdırmaları İnstitutunun elmi əməkdaşı  Azər Babayevdir.

 "Siyasi elmlər doktoru Azər Babayev Berlində Erməniləri və onları müdafiə edənləri fakt qarşısında qoydu"

Bu günlərdə Berlikdəki Avropa Akademiyasında Almaniyanın “Nomos” nəşriyyatında çapdan çıxmış “Dağlıq   Qarabağ üçün həll variantları”  (“Lösungsansätze für Berg-Karabach/Arzach: Selbstbestimmung und der Weg zur Anerkennung”) kitabının təqdimatı keçirilmișdir. Vahram Soqhomonyanın redaktorluğu ilə nəşr olunan və alman, avstriyalı, erməni müəlliflərin məqalələri toplusundan ibarət olan bu kitab əsasən Azərbaycanın Dağlıq Qarabağ bölgəsində yaşayan ermənilərin “öz müqəddəratlarını təyin etmələri və müstəqilliklərinin tanınması” kimi sərsəm məsələlərdən bəhs edir. Maraqlı olan  odur ki, tədbirdə həmyerlimiz siyasi elmlər doktoru, Frankfurt Sülh Arașdırmaları İnstitutunun elmi əməkdaşı Azər Babayevdə iştirak edib.  

Azər bəy öz tutarlı elmi əsaslandırmaları ilə Qarabağ münaqişəsinin həllini birtərəfli düşünən erməni və digər avropalı ekspertlərin cavabını verib. Kitab haqqında daha ətraflı məlumat almaq üçün hazırda Almaniyada yaşayan Azər Babayevə müraciət etdik.

-Azər bəy, kitab haqqında fikirlərinizi eşitmək maraqlı olardı...

-Kitab həm məzmunca, həm də müəlliflərin  seçilməsi baxımından birtərəfli olmasını əsaslandırmış bir kitabdır. Dağlıq Qarabağ münaqişəsinin həlli ilə bağlı sülh danıșıqlarının əsasında ilk növbədə Azərbaycanın ərazi bütövlüyü prinsipinin durmasını xatırlatdım, bu prinsipdən doğan həll variantlarını nəzərə almayan bir “elmi” arașdırmanın obyektivliyinin böyük şübhələr doğurduğunu söylədim. Digər tərəfdən bu topluda azərbaycanlı müəlliflərin təmsil olunmaması da onun elmi obyektivliyini sual altına alır.

Kitab ətrafında diskussiyanın sonrakı mərhələsində tədbir iștirakçılarının diqqətini Azərbaycanın münaqişə nəticəsində çox böyük itki və məhrumiyyətlərə məruz qalmasına yönəltdim, xüsusən Dağlıq Qarabağın özündən əlavə Azərbaycanın üç Qarabağın ərazisi qədər torpaqlarının Ermənistanın ișğalına məruz qalmasını xatırlatdaraq məsələnin birtərəfli araşdırılması düzgün olmadığını tədbir iştirakçılarının diqqətinə çatdırdım. Həmçinin, ișğal olunmuș Qarabağ və ətraf rayonlardan bütün azərbaycanlıların qovulmasının xalqımıza böyük faciələr gətirdiyini qeyd etdim vǝ bu cəhətdən həmin saydan qat-qat az olan Dağlıq Qarabağ ermənilərinin tam müstəqilliyə can atmalarının heç bir ölçüyə sığmadığını vurğuladım.   

-Konkret olaraq, avropalı ekspertlərin nəzərinə bu gün Ermənistanın Cənubi Qafqazda oynadığı mənfi rolu haqqında məlumatları çatdırdınızmı?

-Bu məsələ ilə bağlı çıxışımda əsasən həm də  Azǝrbaycanın 20 faiz torpaqlarının Ermənistan tərəfdən ișğalının davam etməsinn münaqişənin həllinə əsas maneə olmasını bildirdim və iki ölkə arasında sülhün əldə edilməsini Cənubi Qafqaz regionunun ümumi inkișafı üçün əsas şərt kimi səciyyələndirdim. Tədbirdə iştirak edən almanlar bu çıxışımı kitabla bağlı dərin məntiqə və tutarlı faktlara əsaslanan haqlı tənqidlərini rəğbətlə qarșıdılar. Xüsusilə, Almaniyanın region üzrə tanınmıș ekspertlərindən olan professor Udo Steinbach çıxıș edərək Azərbaycanın haqlı mövqeyini müdafiə etdi, xüsusilə Qarabağ ətrafındakı ərazilərin Ermənistan tərəfindən işğalını kəskin tənqid atəşinə tutdu.

Onu da qeyd edim ki, bu gün Qarabağ münaqişəsinin əsl həqiqətlərini görən professor Udo Steinbach kimi elm xadimlərinin sayı artmaqdadır və bu da avropada mövqelərimizin güclənməsinə səbəb olur. Söhbətləşdi: Elnur Eltürk