Erməni diasporu səfərbərlik elan edib

SON XƏBƏRLƏR

Erməni diasporu səfərbərlik elan edib

2021.10.20, 07:36

Gunaz.tv

GünAzTv: Erməni diasporu səfərbərlik elan edib, "Müharibə qapıdadır!"

Ermənistan-Azərbaycan, Dağlıq Qarbağ münaqişəsinin nizamlanması üzrə danışıqlar prosesinin fəallaşması, həmçinin qarşıda duran ATƏT-in Astana sammitində Madrid sənədlərinə əsaslanan müzakirələr, erməni qoşunlarının təmas xəttindən münaqişə zonasına geri çəkilməsi ehtimalı fonunda dünyanın müxtəlif ölkələrində olan erməni diasporunun koordinasiya mərkəzləri faktiki olaraq yeni müharibəyə hazırlaşmağa başlayıb.

“Regnum” İnformasiya Agentliyinin məlumatına görə, dünyanın 4 ölkəsi – Rusiya, Fransa, ABŞ və Uruqvaydan olan erməni mənşəli iri biznesmenlər hərbi əməliyyatlar bərpa olunacağı təqdirdə İran ərazisindən hava nəqliyyatı vasitəsilə münaqişə zonasına göndərilməsi planlaşdırılan veteran və ehtiyatda olan hərbçilərin yığımı ilə bağlı koordinasiya mərkəzləri yaradıblar.

“Qabaqlayıcı səfərbərlik” proqramının təşəbbüskarlarından biri, Rusiyanın erməni mənşəli iri sahibkarının agentliyə verdiyi məlumata görə, işlər bu yaxınlarda yaradılan “Ehtiyatda olan erməni hərbçi və veteranları İttifaqı” beynəlxalq erməni ictimai hərəkatı çərçivəsində aparılır. Onun sözlərinə görə, informasiyalar rus, ingilis və ispan dilində olan vahid məlumat bazasına toplanır. Səfərbərlik hərəkatı fəallarının hesablamalarına görə, burada ümumilikdə dünyanın təqribən 38 ölkəsindən olan 200 minədək erməni iştirak edə bilər.

Agentliyin Qarabağ münaqişəsi zonasında müharibə başlayacağı təqdirdə diaspora hansı üsullarla fəaliyyət göstərəcək sualına mənbə belə cavab verib: “Müharibə qapıdadır! Burada bütün üsullar yaxşıdır. Mən demirəm ki, biz Üsamə ben Ladenin təcrübəsini sınaqdan keçirəcəyik. Xeyr! Biz açıq və daha sərt fəaliyyət göstərəcəyik. Hazırda açıq aşkar görünür ki, Qarabağ təhlükədədir. Qarabağ olmasa, Ermənistan, dövlət olmasa, ermənilər olmayacaq. Millət təhlükədədir və bunu hansı ölkədə yaşamasından asılı olmayaraq ehtiyata yazılan hər bir erməni dərk edir. Siyahıya qeyri-ermənilər də yazılırlar. Bunda antitürk əhval-ruhiyyəsində olan xalqların nümayəndələri – serblər, bolqarlar və hətta italiyalılar maraqlıdır”.

Erməni sahibkar agentliyin “dövlət və Sarkisyan hakimiyyəti sözügedən layihəni dəstəkləyirmi?” sualına cavab verməkdə çətinlik çəkib: “Bu hissədə mötərizələri açmayacağam. Astana sammitindən sonra hər şey aydın olacaq”. ANS Press

GUNAZ.TV

SON XƏBƏRLƏR