GünAzTv: Ermənistandakı bir neçə təşkilatın rəhbərlərinin deyəsən, şizofreniya səviyyəsi kəllə-çarxa qalxıb. "Azərbaycanın son bəyanatlarını nəzərə alsaq, Ermənistan və Dağlıq Qarabağdakı ermənilər savaşa hazır olmalıdır. Çünki Dağlıq Qarabağ münaqişəsini öz bildiyi kimi həll etməyə çalışan rəsmi Bakı hər an müharibəyə başlaya bilər". Milli.Az xəbər portalı bildirir ki, bu açıqlama özünü "Erməni Ariləri Ordeni" adlandıran təşkilatın bəyanatındandır. Təşkilat hesab edir ki, bütün dünya erməniləri Azərbaycana müharibəyə hazırlaşmalıdır. "Ermənistan və Dağlıq Qarabağda silahlı qüvvələrin gündəlik hazırlığı, onların hər vasitə və silahla təminatı ən yüksək səviyyədə təmin olunmalıdır. Bakının müharibəyə hazır olması barədə xəbər alan kimi hücuma keçməli, azərbaycanlılara Bakıda zərbə endirməliyik. Belə vəziyyətdə hadisələrə Türkiyə və Gürcüstanın da hərbi-siyasi, habelə iqtisadi müdaxiləsi istisna olunmadığından Ermənistan Bakı ilə yanaşı, Ankara və Tbilisinin də yerində oturdulması məsələləri ilə bağlı perspektivləri strateji tərəfdaşları ilə müzakirə etməlidir", - bəyanatda deyilir. Azərbaycana qarşı müharibədə türklərlə gürcüləri susdurmağın yolları nədir? Ermənistan Gənc Vətənpərvərlər İttifaqının sədri Artaşes Hayvazyan da analoji mövqedədir. O, "Lragir"ə verdiyi açıqlamasında bildirib ki, ermənilər Azərbaycanla yanaşı, Gürcüstan və Türkiyə  ilə müharibəyə də hər an hazır olmalıdır. "Azərbaycanla müharibə qaçılmazdır və bu, mütləq baş verəcək. Türkiyə və Gürcüstan düşmənimizin ən yaxın müttəfiqləri olduğundan, hərbi əməliyyatların başlayacağı təqdirdə Bakıya dəstək verəcəklərini əsla istisna etmirəm. Buna görə də türklərlə gürcüləri susdurmağın yollarını da aramalıyıq", - A.Hayvazyan bildirib. Ermənistan Vətən Mühafizləri Cəmiyyəti, Ermənistan "Yerkrapa" Könüllülər İttifaqı və Dağlıq Qarabağ Veteranlar Birliyi də müharibənin qaçılmaz olduğunu vurğulamaqla yanaşı, Türkiyə və Azərbaycanın "hadisələrə müdaxiləsinin qarşısının alınması üçün müvafiq işlərin görülməsinə ehtiyac duyulduğunu" vurğulayıblar. Ermənilərin belə bəyanatları Gürcüstanda çaşqınlıq və qəzəblə qarşılanıb. Gürcüstan Xarici İşlər Nazirliyinin mətbuat xidməti Ermənistandakı strukturların sözügedən açıqlamalarını şərh etmək istəməsə də, nazirlikdəki mənbələr Milli.Az xəbər portalına verdikləri açıqlamalarında erməni ictimai, siyasi və qeyri-hökumət təşkilatlarının bu fikirlərini "ekstremizm həddində dəyərləndirilə biləcək yolverilməz fikirlər" kimi qiymətləndirdilər. Gürcüstan Regional Siyasi Proseslərin Tədqiqatı Mərkəzinin analitiki Nodar İmedaşvili Milli.Az xəbər portalına açıqlamasında bildirdi ki, ermənilərin Gürcüstanla müharibəyə çağırışları qonşuluq prinsiplərinin kobud şəkildə pozulması ilə yanaşı, Cənubi Qafqaz bölgəsində situasiyanı daha da ağırlaşdıracaq çıxışlardır. "Ermənilər belə bəyanatlarla sırf "daxili mətbəx"ə hesablanmış addımlar atırlar. Lakin onlar çıxışlarının Azərbaycan bir yana - Türkiyə və Gürcüstanda hansı reaksiya doğuracağının fərqindədirmi? İnanmıram, çünki belə olsaydı, onlar əvvəlcə düşünər, sonra daşınardılar. Həmin açıqlamaları xəstə təxəyyülün məhsulu sayıram", - N.İmedaşvili söylədi. Milli Məclis üzvü Zahid Oruc hesab edir ki, ermənilərin belə bəyanatları Dağlıq Qarabağ münaqişəsinin nizamlanması və işğal etdikləri Azərbaycan ərazilərinin azad edilməsi məqsədilə aparılan danışıqlardakı mövqeləri ilə birbaşa bağlıdır. "Ermənistan Dağlıq Qarabağ münaqişəsinin həll variantrı qismində Azərbaycanın hərbi əməliyyatlara başlayacağı təqdirdə prosesi lokal miqyasdan çıxararaq genişləndirmək və onu gözləyən qaçılmaz məğlubiyyətdən yaxa qurtarmağa çalışır. Şübhəsiz ki, rəsmi İrəvan MDB-nin Kollektiv Təhlükəsizlik Müqaviləsi Təşkilatı çərçivəsində ona müttəfiq olan ölkələr bel bağlayır. Bununla belə, ermənilər anlamamış deyil ki, Dağlıq Qarabağda hərbi əməliyyatlar başlayarsa nə Gürcüstan, nə də Türkiyə döyüşlərə qatılan deyil. Sadəcə, Ermənistanın sözügedən təşkilatları Azərbaycanın həminq dövlətlərlə strateji tərəfdaşlıq və əməkdaşlıq əlaqələrinin çox yüksək səviyyədə olmasından narahat olublar. Onların bəyanatları da həmin narahatlığın aşkar izharıdır", -Z.Oruc söylədi.