GünAzTv: İran prezidenti Mahmud Əhmədinejad Ölkəsinin Ermənistana qucaq açmasından danışmaq istəmədi. O jurnalistlər qarşısında çıxılmaz duruma düşdü.

Bakıda səfərdə olan İran İslam Respublikasının prezidenti Mahmud Əhmədinejad dünən mətbuat konfransı keçirdi. Qurban bayramı günlərində Azərbaycana səfər etdiyinə görə şükranlığını bildirən İran prezidenti NATO və ABŞ-ın (Amerika Birləşmiş Ştatları) ünvanına sərt mesajlar səsləndirdi.

Azərbaycan xalqının böyük mədəniyyətə sahib olduğunu bildirən İran və Azərbaycan arasında qardaşlıq münasibətinin olduğunu söylədi. Qeyd etdi ki, prezident İlham Əliyevlə görüşdə həm regional, həm də beynəlxalq məsələləri müzakirə edib. İki ölkə arasında münasibətlərin çox möhkəm təməllər üzərində qurulduğunu vurğulayan Əhmədinejad yaxın dövrlərdə bu əlaqələrin daha da inkişaf edəcəyini dedi. NATO-nun Türkiyədə raket əleyhinə qurğular yerləşdirmək niyyətinə toxunan İran prezidenti bunu təşkilatın səvhi adlandırdı: “Raketdən müdafiə sistemi ilə insanların təfəkkürünün qarşısını necə almaq olar? Raketlə baharın gəlişinin qarşısını almaq olmaz. Biz NATO-nu İran üçün təhlükə hesab etmirik. Raketdən müdafiə sistemi qurulursa, Azərbaycanın müdafiəsi üçün də qurulmalıdır. NATO-nun hərəkətləri İran üçün dəyərsizdir”. M.Əhmədinejad dedi ki, 11 sentyabr hadisələri İraq və Əfqanıstanın işğal olunması üçün bəhanə oldu. İran rəhbəri baş verən hadisənin obyektiv araşdırılmasını zəruri saydı.  M.Əhmədinejadın sözlərinə görə, səfəri zamanı İran-Azərbaycan arasında qaz nəqli barədə də müzakirə aparılıb: “Bu sahədə əməkdaşlıq üçün məhdudiyyət yoxdur”. İran qazının Avropaya nəqlinə gəldikdə, İran prezidenti bildirdi: “Biz Avropaya qaz satmağa israr etmirik. İstəsələr, münasib qiymətə satacağıq”. NABUKKO layihəsinə toxunan M.Əhmədinejad dedi ki, regiondan qaz aparmaq istətyən ölkələr İranla əlaqələr qurmaq istəsə, buna baxıla bilər: “Amma biz özümüz israr etmirik”.“Altılar”ın görüşü haqda verilən suala cavabında Əhmədinejada görə, bu formatın üzvü olan bəzi dövlətlər istismarçılıq əxlaqından bəhrələnir: “Biz onların fikirləri, təfəkkürü ilə müxalifik. Elə bilirdilər 5 aylıq embarqo İrana təsir edəcək. Onların bu hərəkəti qoz ağacı üzərində oturmuş ağcaqanadın məsələsini xatırladır. Ağcaqanad qoz ağacına deyir ki, möhkəm dayan, mən uçmağa hazırlaşıram. Qoz ağacı isə bildirir ki, mən heç sənin nə zaman gəlib bura qonduğunu hiss etmədim”. Əhmədinejad qeyd edib ki, Tehran “Altılar”ın görüşünün İstanbulda keçirilməsini istəyir, qarşı tərəf isə Cenevrə variantı üzərində qalıb. Jurnalistlərdən birinin istəyi ilə Allahdan istəyi özündə ehtiva edən “Fərəc” duasını oxuyan İran prezidenti Xəzər dənizinin statusu ilə bağlı danışarkən dedi ki, Xəzər dostluq dənizi olmalı, ondan ədalətli qaydada istifadə edilməlidir. Zina ittihamı ilə ölüm hökmünə məhkum olunmuş Səkinə Məhəmmədi Aştiani haqqında məhkəmə hökmünün yerinə yetirilib-yetirilməyəcəyi barədə sualı cavablandıran M.Əhmədinejad bəyan etdi ki, onda olan məlumata əsasən, ABŞ-da 53 qadına ölüm cəzası verilib, lakin heç kim bunu ədalətsiz saymayıb: “Orada verilən hökmün qanuni olduğu deyilir, İranda belə hökm çıxarılanda isə insan haqları pozulması kimi qələmə verilir. Həmin qüvvələr bəşəri məsələlərdən siyasi mənfəət güdür. Nə üçün orada edilən edamlarla bağlı heç kim səsini çıxarmır, İranda isə həyata keçirilməyən şey ətrafında səs küy qaldırılır?!” GünAzTv mətbuat mərkəzinin “Yeni musavat”-a istinadən yaydığı məlumata görə, Mətbuat konfransında İranın işğalçı Ermənistanla əlaqələri barədə jurnalistlərin suallarına cavab verməkdən yayınan Əhmədinejad bunları bildirdi: “Biz bir-birimizlə qonşuyuq və qonşu olaraq yaşayacağıq. Problem danışıq yolu ilə həll olunmalıdır. Biz regionda olmayan dövlətlərə müraciət edirik ki, təzyiqlərini azaltsınlar. Əgər onların təzyiqi olmasa, bu məsələ həllini tapacaq”. Azərbaycanlı jurnalistləri ən çox maraqlandıran isə İranın təcavüzkar Ermənistana yardım göstərməsi, əlaqələrini inkişaf etdirməsi idi. Odur ki, bu məsələ ilə bağlı növbəti suallar səsləndi. Əhmədinejad isə sualın təkrar olduğunu deyərək cavablandırmaqdan imtina etdi. Belə olan halda İran prezidenti media mənsublarının təpkisi ilə üzləşib. Media mənsubları ardıcıl şəkildə İran-Ermənistan əlaqələri barədə sualı təkrarladı. Ancaq prezident “bayaqdan bu sualı vermək üçün çalışırdınız” deyərək təkrar olduğu üçün cavablandırmaqdan imtina etdi və brifinqi yekunlaşdırdı. Təəssüf ki, İranın Azərbaycandakı səfirliyi suallar üçün şərait yaradarkən jurnalistlər arasında fərq qoymaqdan da çəkinmədi. Belə ki, brifinqdə iki “Yeni Müsavat”çı olduğu halda, səfirlik nümayəndəsi onların heç birinə sual imkanı yaratmadı. Yeri gəlmişkən, sualların mövzusu barədə qabaqcadan sorğu-sual edilmiş və qeydlər aparılmışdı.