GünAzTv mətbuat mərkəzinin növbəti müsahibi, Hollandiyada fəaliyyət göstərən "Wereldregio" qəzetinin jurnalisti Vuqar Abbasovdır.

-Vuqar bəy, hazırda Hollandiyada Azərbaycan haqqında təsəvvürlər hansı səviyyədədir?

-Təəssüflə qeyd etmək istəyirəm ki, Niderlandda Azərbaycan haqqında çox az təsəvvür var. Söhbət əlbəttə ki, sadə əhalidən gedir. Burda olan hər bir Azərbaycan türkü imkan olduqca ölkəmizi təbliğ etməlidir və ümid edirəm ki, edirlər də. Təbii ki, hərə öz bilik, səviyyə və dünya görüşü çərçivəsində. Şəxsən mənim tutdugum yol bir qədər fərqlidir. Belə ki, mən 2 ildən bir qədər artıq vaxtdır ki, ailəmlə (xanımım və iki övladım) birlikdə burda yaşayıram. Son bir ildə dil kurslarına getmək və s. bu kimi imkanlar əldə etmişəm. Qısa vaxt ərzində dil və vətəndaşlıq imtahanlarımı verib, təhsilimi daha yuxarı səviyyədə davam etdirirəm. Bu yaxınlarda isə "Wereldregio" qəzetində jurnalist kimi işləmək şansı qazanmışam.

- Calışdığınız qezetdə Azərbaycan təbliğ etmək üçün hansı layihələri həyata keçirməyi düşünürsünüz? - Əlbəttə ki, gələcəkdə bu və digər mətbuat orqanlarında ölkəmizi təbliğ etmək üçün müəyyən düşüncələrim var və bunu etməyə çalışacam. Ən azından bu gün bu qəzetdə mənim barədə yazının getməyi və yazılarımda mənim imzamın olması da vətənimizin təbliğatına yönəlib. Ancaq mən bununla kifayətlənmək fikrində deyiləm.

- Azərbaycan diasporunun fəaliyyəti bu ölkədə hiss olunurmu? - Burada Azərbaycanlıların vahid təşkilatının olması barədə məndə elə bir informasiya yoxdur. Əgər belə bir təşkilat və yaxud qurum varsa, fürsətdən istifadə edib buradan onlarla əməkdaşlıq etmək istəyimi bildirirəm.

-Hollandiya insanı, siyasətçiləri,media qurumları Qarabağ həqiqətləri haqqında bilgilərə sahibdirlərmi? Eyni zamanda Güney Azərbaycanda haqqında təsəvvürlər varmı, və qəzetdə gələcəkdə Güney Azərbaycanda pozulan insan hüquqları haqqında məlumatlar verilə bilərmi? -Hazırda mən buranın siyasi dairələri ilə əlaqələrimi möhkəmləndirməyə və daha da genişləndirməyə çalışıram. Hazırda vaxtımın azlığı mənə bir qədər mane olur. Əslində vaxtımın azlığı elə bu istiqamətdə atmaq istədiyim addımlarla bağlıdır. Yəni istəyim odur ki, onlara ölkəmizi daha yüksək səviyyədə təqdim edə bilim. Bütün rəsmi və qeyri-rəsmi görüşlərimdə Qarabağ və Cənubi Azərbaycanla bağlı məlumatlar verməyə çalışıram.

Cənubi Azərbaycanla bağlı bilgiləri isə tamamilə yox səviyyəsindədir. Hər bir halda mən özümün ünsiyyətdə olduğum insanların düşüncəsindən çıxış edərək danışıram. Mən hər vaxt 1813-Gülüstan, 1828 - ci il Türkmənçay müqavilələri ilə Azərbaycanın ikiyə bölünməsi, Qarabağın işğal olunması barədə bilgilər verməyə səy göstərirəm. Cənubi Azərbaycanda yaşayan soydaşlarımızın öz dillərində təhsil ala bilməmələri, mətbuat orqanlarının olmaması bu insanlarda təəccüb yaradır. Azərbaycanın birləşmək istəyi isə söhbət etdiyim dairələrdə çox təbii istək kimi başa düşülür. Bizim hər birimizin istəyi Bütöv Azərbaycan görməkdir. Ancaq tək istəklə nəticə əldə etmək olmaz, hər birimiz bu işdə müəyyən addımlar atmalıyıq.

-Təşəkkür edirik dəyərli vaxtınızı bizə ayırıb suallarımızı cavablandırdığınıza görə, və gələcək işlərinizdə uğurlar arzu edirik.

-Bütöv Azərbaycan uğrunda mübarizədə hər kəsə işıqlı yol arzu edirəm.

 Söhbətləşdi: Elnur Eltürk