GünAzTv: Qazaxıstan dekabrın 1-2 arası keçiriləcək görüşə tarixi hasidə kimi baxır. ATƏT-in bu ilki sədri məhz Qazaxıstandır. Ölkə prezidenti deyib ki, bu sammit zamanı bütün üzv ölkələr mövcud fikir ayrılıqlarını bir kənara qoymaq üçün siyasi istək nümayiş etdirməlidirlər.

Bu il ərzində Qazaxıstan çox yaxından ATƏT-in baş katibi Mark Perra de Brişambo ilə əməkdaşlıq edib.

Fransadan olan yüksək səviyyəli diplomat ATƏT-in baş administrativ rəsmisi və sədrin elçisidir.

O, BBC Azərbaycan Xidmətinin qonağı olub və sualları cavablandırıb:

Cavab: Bu təşkilat üçün 11 ildən sonra sammitin keçirilməsinə nail olmaq əslində böyük nailiyyətdir. Çünki siyasi proseslər dəyərlər üzərində qurulduğundan bizim ali liderlərin problemlərə diqqət yetirməsi, bunun ictimaiyyətin diqqətinə çatdırılması və gələcək planların qurulmasına ehtiyacımız var. Bunun üçün zirvə görüşü səviyyəsində toplantı mühüm əhəmiyyət daşıyır. Sammitin Astanada keçirilməsi də çox mühümdür. Çünki ilk dəfədir ki, Mərkəzi Asiya ölkəsi, keçmiş Sovet İttifaqının hazırda ATƏT-ə üzv olan ölkəsi məsuliyyəti üzərinə götürərək bu Avropa təşkilatının sükanı arxasına keçir, bu təşkilatı təmsil edir və ATƏT-in ehtiyaclarını müəyyən etmək üçün mühüm bir toplantını təşkil edir. Özü də bu toplantı ATƏT ölkələrinin təhlükəsizliyi baxımdan müstəsna əhəmiyyətə malik bir bölgədə keçirilir. Fikrimcə, bu sammitin keçirilməsi həm böyük imkanlar, həm böyük məsuliyyət meydanıdır.

BBC: Astana sammitində Mərkəzi Asiyanın regional problemlərindən savayı sizin həll etməli olduğunuz daha bir mühüm problem ortaya çıxacaq. ATƏT-ə üzv ölkələr arasında orada Gürcüstan və Rusiyanın təmsilçiləri iştirak edəcək. Sizin bununla bağlı gözləntilərinizi bilmək maraqlıdır. Prezident Medvedev və prezident Saakaşvili biri-birinin əlini sıxacaqlarmı?

Cavab: Bu, onların işidir, özləri bilərlər. Lakin ən azı belə bir səviyyədə keçirilən toplantıda iştirak etməklə hər iki prezident anlayır ki, eyni zalda, eyni masanın arxasında oturmalı olacaq və eyni tədbirlərdə müştərək iştirak edəcək. Orada başqa dövlət başçıları da olacaq, çox guman ki, aralarında ikitərəfli görüşlər, danışıqlar aparacaqlar. Gürcüstan MDB görüşlərində iştirak etmir, ona görə də ATƏT və BMT Baş Assambleyası kimi tədbirlər Rusiya ilə Gürcüstanın görüşə biləcəyi yeganə imkandır. ATƏT Cənubi Osetiyada sülhün təmin edilməsi mexanizmlərində fəal iştirak edir. Ötən həftə mühüm bir iclas keçirmişdik. Və Gürcüstan məsələsi Vyanada Daimi Şurada demək olar ki, hər həftə qaldırılır. Odur ki, bu və ya digər yollarla Rusiya-Gürcüstan arasında ünsiyyət baş verir, istər Avropa İttifaqı, istər Amerika ilə danışıqlar çərçivəsində. Bir sözlə, ATƏT - 2008-ci il münaqişəsi zamanı və bu münaqişədən sonra ortaya çıxan yeni problemlərin daim müzakirə edildiyi və tədricən həll edildiyi qurumlardan biridir. İndiyə qədər bu məsələnin həllinin taıpılmaması - bu iki ölkə arasında münasibətlərin mürəkkəbliyi və bir-birinə nə qədər zidd olduğundan xəbər verir.

BBC: Bəs Dağlıq Qarabağ məsələsi nə yerdədir? Qazaxıstan ATƏT-ə sədrliyi üzərinə götürəndə demişdi ki, bu məsələ ilə ciddi məşğul olmaq əzmindədir və müəyyən tərəqqiyə nail olacağına əmin idi. Buna nail olundumu?

Cavab: Minsk Qrupunun 3 həmsədri bu il çox fəal işləyib. Onların işinə Rusiya prezidenti və xarici işlər nazirinin bu məsələyə qarışması kömək edib. Onlar sülh sazişinin ümumi prinsiplərinin razılaşdarılımasına səy göstəriblər. Dağlıq Qarabağ məsələsində çox vaxt müvəffəqiyyət nailiyyətlərlərlə yox, nail oluna bilinməyən şeylərlə ölçülməlidir. Cəbhə bölgəsində təmas xəttində yüksək gərginlik müşahidə edilsə də, orada münaqişə yoxdur. Və son bir neçə ildən fərqli olaraq Ermənistan və Azərbaycan prezidentlər arasında ünsiyyət fəallaşıb. Bu yaxınlarda yeni imkanlar da açılıb - son bir neçə il ərzində ilk dəfə Minsk Qrupu həmsədrləri cəbhə xəttini piyada keçə biliblər. Yəni, vəziyyət bir o qədər də pis deyil.