Toqquşmalar bu gün də davam edib

Dekabrın 27-də İranda baş qaldıran hökumət əleyhinə aksiyalar paytaxt Tehranda bu gün də davam edib. İranın müxalif yönlü saytları xəbər verirlər ki, bu gün səhər saatlarında yüzlərlə insan müxalifət lideri Mirhüseyn Musəvinin qətlə yetirilən bacısı oğlu Əli Musəvinin cənazəsinin olduğu İbn Sina adına xəstəxananın qarşısına toplaşıb.Təhlükəsizlik qüvvələri xəstaxana qarşısına toplananları gözyaşardıcı qazdan və dəyənəklərdən istifadə edərək dağıtmağa çalışıb. Nəticədə növbəti toqquşma baş verib.Xatırladaq ki, bu arada Əli Musəvinin meyitinin saxlandığı İbn Sina xəstaxanasından oğurlandığı xəbəri yayılıb. Mərhumun qardaşı Rza Musəvi xəbəri təsdiqləyərək, qardaşının meyitini xəstəxanada tapa bilmədiklərini deyib. O, baş verənləri cinayət adlandırıb və bildirib ki, buna görə kimdən məsuliyyət tələb etməli olduqlarını bilmirlər, çünki məsuliyyəti üzərinə götürən yoxdur.Bu arada “lent.az” İran saytlarına istinadla xəbər yayıb ki, İrandakı nümayişlər zamanı həbs olunanlar içərisində keçmiş xarici işlər naziri İbrahim Yezdilə yanaşı, sabiq prezident Məhəmməd Hatəmi də var.“New York Times” qəzeti isə İrandakı mənbələrinə istinadla xəbər verir ki, təhlükəsizlik qüvvələri müxalifət lideri Mirhüseyn Musəvinin həbsinə hazırlıq görür.Xatırladaq ki, 2 gündür davam edən toqquşmalar zamanı Musəvinin müşavirləri və başqa yaxın adamları həbs olunub.

***

Hökumət əleyhinə Aşura mitinqləri bütün İranı bürüyüb

Təbrizdə də ölənlər var

Hökumət adamları Musəvinin meyitini oğurlayıb

Dekabrın 27-də İranın bir sıra başqa şəhərlərində də ölkə rəhbərliyi və hakim rejim əleyhinə aksiyalar olub. Bəzi məlumatlara görə, paytaxt Tehranla yanaşı Təbriz, Nəzəfabad, İsfahan və ümumilikdə 20 olmaqla bəşqa şəhərlərdə də hökumət qüvvələri ilə toqquşmalara çevrilən nümayişlər olub. Şəhərlərdə əhali Aşura günü ilə əlaqədar küçələrə çıxıb və hökumət əleyhinə şüarlar səsləndirib. Silahlı təhlükəsizlik qüvvələri nümayişçiləri dağıtmağa çalışıb, bu zaman isə toqquşmalar yaranıb. Təhlükəsizlik qüvvələri dəyənəklərdən və gözyaşardıcı qazlardan istifadə edib, odlu silahdan əhaliyə atəş açıb.Məlumatlara görə, Təbrizdəki nümayişlər zamanı aksiyaçılar İranın ali dini lideri Xamneyiyə qarşı şüarlar səsləndiriblər. Hökumət qüvvələri nümayişçilərə hücum edib, şəhərin Saman meydanı, Bazar ağzı, Əmir bazarı və başqa yerlərində atışma səsləri eşidilib. Ən azı 4 nəfər öldürüldüyü, onlarla yaralının olduğu haqda xəbərlər yayılıb.Başqa bir məlumata görə isə Nəcəfabaddakı toqquşmada 2 nəfər öldürülüb.Ölkə boyu aksiyalarda tutlanların isə 500 nəfərdən çox olduğu deyilir.

Musəvinin bacısı oğlunun meyiti oğurlanıb

Bu arada Tehrandakı nümayişlərdə qətlə yetirilənlərdən biri, müxalifət lideri Mirhüseyn Musəvinin bacısı oğlu Əli Musəvinin meyitinin İbn Sina xəstəxanasından yoxa çıxdığı xəbər də yayılıb. Məlumatlara görə, kimliyi bəlli olmayan məmurlar dekabrın 27-si axşam İbn Sina xəstəxanasına gələrək Musəvinin meyitini özləri ilə naməlum istiqamətə aparıblar (media forum).Eyni zamanda təhlükəsizlik qüvvələrindən Musəvi ailəsinə xəbərdarlıq edilib ki, dekabrın 28-də dəfn mərasimi keçirilməyəcək. Mirhüseyn Musəvi dekabrın 27-də jurnalistlərə açıqlamasında dekabrın 28-ni milli matəm günü elan edərək vətəndaşları həmin gün dəfn mərasiminə qatılmağa çağırmışdı.Bəzi iranlı hüquq müdafiəçiləri Əli Musəvinin əvvəllər dəfələrlə ölümlə təhdid edildiyini vurğulayaraq onun planlı şəkildə qətlə yetirildiyini bildirirlər.Məlumatlara görə, dekabrın 27-si günortadan sonra yüksək sürətlə hərəkət edən bir polis avtomobili bir neçə aksiyaçını basaraq avtomobillə vurub. Daha sonra avtomobildəki beş silahlı polisdən biri yaxın məsafədən S.Musəviyə atəş açıb. Ürəyindən güllə yarası alan S.Musəvi yerindəcə həlak olub.

***

Tehran qana boyandı

İranda dəhşətli toqquşmalar

Musəvinin bacısı oğlu güllələndi; ümumi ölü sayı 15 nəfər

Hökumət Aşura günü öz əleyhdarlarını qan içində boğdu; Kərrubi “Heç şah zamanında da belə şey olmamışdı” dedi

Dekabrın 27-də İranda hökumət qüvvələri ilə müxalifət tərəfdarları arasında növbəti qarşıdurma yaranıb. Paytaxt Tehranda baş verən budəfəki qarşıdurma daha şiddətli xarakter alıb və insan tələfatı ilə nəticələnib.Ölənlər arasında müxalifət liderlərindən biri, prezidentliyə keçmiş namizəd islahatçı Mirhüseyn Musəvinin bacısı oğlu Əli Musəvi də var. Nümayişçiləri dağıtmaq üçün odlu silahdan istifadə edən hökumət qüvvələri 20 yaşlı Əli Musəvini ürəyindən güllələyiblər.İran televiziyasının verdiyi son məlumata görə, ölənlərin sayı 15 nəfərdir. Lakin televiziya bu insanları hökumət qüvvələrinin güllələdiyini inkar edir. Televiziyanın bildirdiyinə görə, ölənlərdən 10-u “çevriliş tərəfdarı terror təşkilatın” üzvləri, 5-i isə onların qətlə yetirdikləridir.Müstəqil mənbələr isə daha çox insanın qətlə yetirildiyini və qətlləri nümayişçilərə atəş açan təhlükəsizlik qüvvələrinin törətdiyini deyirlər.Həbs edilənlərin dəqiq sayı bilinməsə də, İranın keçmiş xarici işlər naziri, hazırda qadağan olunmuş “Azadlıq uğrunda hərəkat”a rəhbərlik edən İbrahim Yəzdinin də tutulanlar arasında olduğu haqda xəbərlər yayılıb.Məlumatlara görə, daha şiddətli toqquşmalar Tehranın mərkəzi İnqilab meydanında yaşanıb. Polis odlu silahla yanaşı, dəyənək və gözyaşardıcı qazdan da istifadə edib.Toqquşmalar Aşura mərasiminə qatılan müxalifət tərəfdarlarının İran rəhbərliyi və rejim əleyhinə şüarlar səsləndirməsi ilə başlayıb. Həmin gün həm də İranın nüfuzlu və islhatçı ruhanilərindən olan ayətullah Müntəzirinin yeddisi idi. Hökumət Müntəzirinin yeddi mərasimini keçirməyi yasaq etsə də, meydanlara çıxan müxalifət tərəfdarları həm də onu anıblar.Təhlükəsizlik qüvvələrinin müxalifət lideri Musəvinin yaxın qohumunu qətlə yetirdiyi haqda xəbərin yayılması etirazları daha da artırıb və Tehran əsl döyüş meydanına çevrilib.Nümayişlərin qarşısını almaq üçün səfərbər olunan hökumət qüvvələrinə sərt müqavimət göstərilib. Nümayişçılər bir neçə yerdə küçə barrikadaları qurub.Bəzi məlumatlara görə, paytaxt Tehranla yanaşı İranın İsfahan, Nəcəfabad, Şiraz, Qum kimi başqa şəhərlərində də etiraz aksiyaları keçirilib.Hadisələrdən dərhal sonra başqa bir müxalifət lideri Mehdi Kərrubi hökumət əleyhinə bəyanat yayıb. İnternet vasitəsilə yayıdığı bəyanatda Kərrubi “Heç şah zamanında da belə şey olmamışdı. Hətta o zaman da müqəddəs Aşura gününə sayğı vardı. Bu müqəddəs gündə müxalifətə ehtiramla yanaşılırdı” kimi qınayıcı ifadələr işlədib.