Bəyanatda iddia edilir ki, bir neçə vaxt əvvəl Amerikanın bir hərbi gəmisi Oman dənizində İran neftini daşıyan bir tankeri dayandırdıqdan sonra ondakı nefti başqa bir tankerə köçürməklə naməlum istiqamətə aparmağa çalışıb.
Bildirilir ki, SEPAH-ın regiondakı sürət qayıqları bundan xəbər tutan kimi Amerikanın hərbi gəmisi ilə üz-üzə duraraq, sözü gedən tankerin göyərtsəində əməliyyat keçirərək onu İran sahillərinə yöndəriblər.
Bəyanatda həmçinin iddia olunur ki, Amerikanın körfəzdəki hərbi qüvvələri bir neçə hərbi helikoper və hərbi gəmi ilə birlikdə SEPAH-ın sürət qayıqlarının ələ keçirdiyi sözü gedən tankerin izinə düşərək, onun İran sahillərinə aparılmasına mane olmağa çalışsalar da, buna nail ola bilməyiblər və SEPAH qayıqlarının qarşısından geri çəkilməyə məcbur olublar.
SEPAH-ın sürət qayıqları ilə Amerikanın hərbi gəmisi arasında qarşıdurmanın konkret nə zaman baş verdiyi açıqlanmasa da, hadisənin “son vaxtlar” baş verdiyi və sözü gedən tankerin hazırda İran sahillərində olduğu bildirilir.
SEPAH baş vermiş insidentdən çəkilmiş video görüntüləri də yayacağını bildirib.
Qeyd edək ki, SEPAH terror təşkilatının sürət qayıqları bundan əvvəl bir neçə dəfə körfəz sularında üzən Amerikanın hərbi gəmilərinə yaxınlaşsalar da, hər dəfə Amerika qüvvələrinin xəbərdarlıq atəşindən sonra onlardan uzaqlaşmağa məcbur ediliblər.
A.M
