Fars rejimi Güneydə repressiyaları şiddətləndirib İranda Azərbaycan Siyasi Məhbuslarını Müdafiə Assosiasiyası (ADAPP) bu ilin fevralında Güney Azərbaycanda baş vermiş hadisələrlə bağlı hesabat yayıb. Sənəddə bildirilir ki, fevralın 5-də Ramin, İbrahim və Məhəmməd Sadiqi Əsl qardaşları həbs olunub. İbrahim Sadiqi iki həftə saxlanıldıqdan sonra zaminə buraxılsa da, Məhəmməd və Ramin Sadiqi Əsl qardaşları hələ də "Ettelaat"ın təcridxanasındadır. Fevralın 11-də "Arman" Tələbə Birliyinin keçmiş üzvlərindən biri olan Vəhid Şıxbəyli 49 gün həbsdə saxlanıldıqdan sonra 50 milyon tümən girov müqabilində zaminə buraxılıb. Turqut Fevralın 20-də isə tələbə fəalı Mehdi Nuri 2 illik həbs cəzasını başa vuraraq azadlığa çıxıb. Fevralın 25-də Tehranın Şəhid Rəcai Universitetinin müəllimi Abdullah Abbasi Cavan 105 gün Evin həbsxanasında saxlanıldıqdan sonra zaminə buraxılıb. Əslən sulduzlu olan soydaşımız 70 milyon tümən girov qoyub. Sənəddə vurğulanır ki, yanvarın 19-da Ərdəbil İnqilab Məhkəməsində keçirilən qapalı iclasda milli fəallar Behruz Əlizadə, Rəhim Qulami, Vədud Səadəti, Hüseyn Hüseyni və Ərdəşir Kərimi Xiyavi 5 il həbsə məhkum ediliblər. Soydaşlarımız cəzalarını Kirman, Hormozqan, Bocnurd, Simnan və Həmədan həbsxanalarında çəkməlidirlər. Yanvarın 18-də Təbriz İnqilab Məhkəməsinin 1-ci şöbəsində keçirilən iclasda Təbriz Universitetinin tələbələri Səccad Radmehr, Fəraz Zehtab, Aydın Xacei, Əmir Mərdani və Ehsan Nəcəfinəsəb və İsfahan Universitetinin tələbəsi Məcid Makui bir il azadlıqdan məhrum ediliblər. Digər tələbə fəalları Mənsur Əminian və Maqsud Əhdi, eləcə də hərbi xidmətdə olan ordu zabiti Dariyuş Hatəmi isə bəraət alıblar. Yanvarın 28-də milli fəallar Həmid Valayi və Qulam Nəcəfi Təbriz İnqilab Məhkəməsinin qərarıyla bir il azadlıqdan məhrum olunublar. Soydaşlarımız bir illik həbs cəzalarının 3 ayını zindanda keçirməlidir. Bundan əlavə, fevralın 20-də Rəşt İnqilab Məhkəməsində milli fəal Vədud Əsədiyə qarşı irəli sürülmüş "dövlətçiliyə qarşı əks-təbliğat" ittihamıyla bağlı 3-cü məhkəmə iclası keçirilib. Eyni zamanda "Milli təhlükəsizliyi pozmaq və "casusluq" maddəsi üzrə təqsirli bilinən ərdəbilli fəal Əli Abbasi daha öncə saxlanıldığı Ərdəbil həbsxanasının 7-cı bölümündən çıxarılaraq, oğruların saxlanıldığı 4-cü korpusa köçürülüb. Onun Azərbaycan Respublikasına səfəri "casusluq"da ittiham olunmasında əsas dəlil kimi göstərilib. Hesabatda bildirilir ki, Urmiyanın Qızıl Xənəyə kəndinin 25 sakininə qarşı hökm oxunub. Urmiyanın Nazlı Bölgə Məhkəməsinin qərarıyla Süleyman İbrahimi, Məhəmməd Səmədzadə, Murtuz Cəfəri, Allahverdi Aslani, Məhəmməd Manafzadə, Əyyub Əzizpur, Əkbər Rüstəmi, Merac Əlipur, Səid Cəfərpur, Məcid Qulizadə və Ziyad Cəfərpur 2 il həbs, 1 il Minab şəhərinə sürgün və 74 şallaq zərbəsi, Behruz Məcidi 1 il həbs, 1 il Minab şəhərinə sürgün, Barzad və Miqdad Nizami Əfşarlar və Məhəmməd Əşrəfi isə 6 ay 2 gün həbs cəzası alıblar. Bununla yanaşı, Heydər Əlipur, Hüseyn Vahabzadə, Süleyman Əhmədi, Həbibulla Əhmədi və Məhəmməd Cəfəri 300 min tümən, Höccət Mükərrəm isə 200 min tümən cərimə ödəməyə məhkum ediliblər. Mehdi İsmaili, Əsgər Qarahacılı, Behzad Yaqubzadə və Cəfəriyə isə bəraət verilib. Bundan əlavə, "Ələvi" təriqətinin davamçılarından olan Mehdi Qasımzadə fevralın 28-də Urmiyanın Mərkəzi Həbsxanasına "Müharib" ittihamıyla edam olunub. Nəticədə ötən ilin oktyabrında Yəzd həbsxanasına köçürülən digər ələvilər - Səhəndəli Məhəmmədi, Bəxşəli Məhəmmədi aclıq aksiyasına başlayıblar. Yaxın günlərdə Yunis Ağayanın edam olunacağı gözlənilir. Fevralın 21-də Şahin Dej şəhərinin təhlükəsizlik orqanlarının əməkdaşları bir neçə mağazanı, o cümlədən yerli yazar və şairlərin yıışdığı "Azərbaycan" çayxanasını bağlayıb. Eyni zamanda Vəhid Əsgərinin baş yazarlığıyla Yəzd Universitetində 1 nömrəsi işıq üzü görən "İşılay" jurnalının 2-cı sayının nəşri universitet rəhbərliyinin əmrilə dayandırılıb. xalqcebhesi