Tramp: Ya İran razılaşacaq, ya da işi bitirəcəyəm

SON XƏBƏRLƏR

Tramp: Ya İran razılaşacaq, ya da işi bitirəcəyəm

2026.10.25, 12:40

Gunaz.tv

ABŞ Prezidenti Donald Tramp şənbə günü bildirib ki, İranla razılaşma əldə olunmasa, “işi bitirməyə” məcbur qalacaq. O, həmçinin İranın razılaşma əldə etməyə can atdığını iddia edib. Bu açıqlama ABŞ və İsrailin İrana qarşı hücumları yenidən başlada biləcəyi barədə xəbərlərin yayıldığı bir vaxta təsadüf edir.

Tramp oktyabrın 24-də Floridada ABŞ Konqresinə aralıq seçkilər çərçivəsində erkən səsvermədə iştirak etdikdən sonra jurnalistlərə açıqlamasında deyib: “Ya işi bitirməyə məcbur olacağam, ya da onlar razılaşacaqlar. Amma əmin deyiləm. Hər halda, biz qalib gəlirik”.

ABŞ liderindən İrana qarşı hücumların yenidən başlanmasına nə qədər yaxın olduqları soruşulduqda, o, bunun mümkün olduğunu bildirib. Tramp eyni zamanda, “böyük və gözəl bir razılaşma” əldə edilməsinin də mümkünlüyünü qeyd edib. Onun sözlərinə görə, İran razılaşmaq istəyir, lakin əsas məsələ bu razılaşmaya əməl edib-etməyəcəyidir.

Tramp 2025-ci ilin iyununda B-2 bombardmançı təyyarələri ilə İranın nüvə obyektlərinə endirilən zərbələrə toxunaraq bildirib ki, həmin vaxt məsələni yekunlaşdıra bilərdi. Lakin onun iddiasına görə, İran bir-iki il ərzində nüvə silahı istehsal etməyin yolunu tapa bilərdi. Tramp bu təhlükəni aradan qaldırmaq üçün müdaxiləni davam etdirdiyini deyib.

O, həmçinin ABŞ-ın İrana qarşı hücumları zamanı İranın 259 qırıcı təyyarəsini və 259 gəmisini məhv etdiyini iddia edib.

ABŞ mediasının məlumatına görə, ölkənin Milli Kəşfiyyat direktoru Cey Kleyton dövlət katibi Marko Rubionun ünvanına göndərdiyi məktubda İranın Yaxın Şərqdə və dünyanın digər bölgələrində ABŞ vətəndaşlarını və əməkdaşlarını hədəfə almaq cəhdlərini əhəmiyyətli dərəcədə artırdığı barədə xəbərdarlıq edib.

Tramp bu məlumatla bağlı suala cavabında İran rəhbərliyini sərt tənqid edib və 75 min etirazçının öldürüldüyünü iddia edib. O, İranı “terrorizmin ən böyük dövlət sponsoru” adlandıraraq, son 51 ildə çoxsaylı ABŞ vətəndaşının öldürüldüyünü də bildirib.

GunAz TV
R.G

GUNAZ.TV

SON XƏBƏRLƏR