Obamanın Türkiyəyə səfər planı Afinanı "dondurub" "Elefteros Tipos" qəzeti: "ABŞ və Türkiyə yenə müttəfiqdir" Amerika Birləşmiş Ştatlarının Dövlət Departamentinin sözçülərindən biri Robert Uood ABŞ-ın yeni prezidenti Barak Obamanın Türkiyəyə planlaşdırılan ziyarətinin mühüm önəm daşıdığını bildirib. Səfərin hazırlanması ilə məşğul olduqların açıqlayan sözçü "Türkiyə önəmli bir müttəfiqdir, Türkiyə ilə birgə görüləcək çox iş var"-deyə söyləyib. ABŞ Xarici İşlər Nazirliyində keçirdiyi gündəlik mətbuat konfransında bir jurnalistin Hillari Klinton və Barak Obamanın Türkiyəyə səfərlərini "ikili səfər" kimi dəyərləndirməsinə cavab verən Robert Uood "Biz prezident Obamanın Türkiyəyə getməyə qərar verməsinin çox vacib olduğunu düşünürük"-deyib. Onun fikrincə, Barak Obamanın Türkiyəyə getməsi çox önəmlidir. Mətbuat konfransında jurnalistlər Türkiyə baş nazirinin "əgər tələb olarsa, İran və ABŞ arasında vasitəçiliyə hazır olduğu"nu bəyanlaması xatırladıb. Jurnalistlər Vaşinqtonun Türkiyənin bu vasitəçiliyini, yoxsa, İranla birbaşa təması üstün tutacağını soruşublar. Mətbuat sözçüsü hələ vəziyyəti dəyərləndirdiklərini, hər hansı açıqlamayla spekulyasiyaya, çaşqınlığa yol vermək istəmədiyi deyib: "İran hökumətinə əlimizi uzatdıq. Hər bir məsələdə bu hökumətlə anlaşmağa ümid edirik. Amma bilirsiniz ki, bunun böyük bir qismi İranın masaya oturmaq istəyinə və bizim narahatçılıq duyduğumuz bir sıra sahələrdə davranışını dəyişdirmə cəhdinə söykənir". İraqdan çıxarılan ABŞ hərbi birliklərinin Türkiyə ərazisindən keçməsinə rəsmi Ankaranın müsbət yanaşması haqqında sualı cavablandıran mətbuat sözçüsü belə bir rəsmi açıqlama görmədiyini və oxşar sualları Pentaqona ünvanlamağı vacib sayıb. Yunan jurnalistlər Barak Obamanın Türkiyədən sonra Yunanıstana da gedib-getməyəcəyini öyrənməyə çalışıblar. Robert Uood Barak Obamanın gələcək səfərlərilə bağlı məlumat almaq üçün Ağ evə müraciət etməyi vacib sayıb. Dövlət katibi Hillari Klintonun Yunanıstana gedib-getməyəcəyilə bağlı sualı cavablandıran mətbuat sözçünü hansısa bir mərhələdə belə bir səfərin reallaşacağını söyləyib: "Bu səfərlərə görə hansısa nəticəyə gəlməyə çalışmayın. Yunanıstan ABŞ-ın önəmli bir müttəfiqidir. Yunanıstanın xarici işlər naziri Dora Bakoyannis ötən həftə Vaşinqtond idi. Yunanıstan hökuməti ilə də görüləcək çox işlərimiz var. Yerinizdə olsam, bunlardan nəticələr çıxarmazdım". Hillari Klintonun Ankara səfəri zamanı türk-yunan münasibətləri, Kıbrıs məsələsilə bağlı hansı müzakirələr apardığını soruşan jurnalistlərə cavabında mətbuat sözçüsü deyib: "Klinton türk hökuməti yetkililərilə önəmli görüşlər keçirdi. Türkiyə ilə birgə işlədiyimiz bir çox məsələ var. Hesab edirəm ki, Hillari Klinton bu görşlərdən çox müsbət duyğularla ayrıldı". Yunan qəzetçisinin yenidən verdiyi "Türk-yunan münasibətləri və Kıbrıs məsələsi müzakirəyə çıxarıldımı?"-sualına cavabında Robert Uood "Doğrusu, bir çox toplantılar vardı. Mən dəqiqliyi ilə xatırlamıram. Amma bir daha qeydlərimə baxaram"- deyib. Mətbuat sözçüsü Hillari Klintonun səfəri zamanı "erməni məsələsi"nin müzakirə olunduğunu, amma bunun detalları haqqında məlumat verə bilməyəcəyini açıqlayıb. Bu ərəfədə yunan mətbuatı ABŞ xarici işlər naziri Hillari Klintonun Ankaraya səfəri zamanı "Barak Obamanın gələn ay Türkiyəyə gələcəyini açıqlamasının" rəsmi Afinanı "dondurduğunu" yazıb. Qəzetlərdə prezident seçildikdən sonra heç 100 gün keçməmiş Barak Obamanın Afinadan yan keçərək Ankaraya getməsinin Yunanıstanda "soyuq duş" effekti yaratdığı vurğulanıb. "Elefteros Tipos" qəzeti "ABŞ və Türkiyə yenə müttəfiqdir" başlıqlı yazısında bildirir ki, Barak Obamanın Hillari Klintonun vasitəçiliyilə baş nazir Rəcəb Tayyib Ərdoğana göndərdiyi "Türkiyə səfəri" mesajı yunan diplomatiyasını şoka salıb. Afina hər hansı rəsmi açıqlama verməsə də baş verənlərin yunan diplomatiyasının tutqunluğuna gətirib çıxarması faktdır. Qəzet Hillari Klintonun Egey dənizindəki vəziyyətə görə Türkiyəyə təzyiq göstərmədiyini, üstəlik, Kıbrıs məsələsində "Türk tərəfinin izolyasiyası" ifadəsinə yer verdiyinə işarə vurub. Yunan diplomatik dairələri qəzetlərə verdikləri açıqlamalarda Barak Obamanın aprelin 6-7-də İstanbulda keçiriləcək Mədəniyyətlər İttifaqı toplantısı zamanı Türkiyəyə səfər edəcəyi ehtimalından danışıblar. Həmin toplantı Türkiyənin baş naziri Rəcəb Tayyib Ərdoğanın və İspaniyanın baş naziri Joze Luis Rodriqesin təşəbbüsüylə keçirilir. "Elefteros Tipos" qəzeti səfərin məqsədinin nə olursa-olsun, Barak Obamanın Ankaraya getməsinin, Afinanın bu səfər proqramında yer almamasının Birləşmiş Ştatların yeni rəhbərliyinin Türkiyə ilə əməkdaşlığa verdiyi önəmdən xəbər verdiyini bildirib. Onu da yazıb ki, Hillari Klinton xarici işlər naziri Əli Babacanla görüşlərində Orta Şərq, İraq, Kıbrıs, Əfqanıstan, Avropa Birliyi-Türkiyə münasibətləri enerji sahəsində işbirliyi, beynəlxalq terrorizmlə mübarizə kimi məsələləri müzakirə edib. Qəzet vurğulayır ki, ABŞ-ın hərbi birliklərini İraqdan Əfqanıstana keçirmək üçün "İncirlik" hərbi bazasından istifadə etmək tələbinə Türkiyə müsbət yanaşıb. "Ethnos" qəzeti isə ABŞ prezidentinin səfəri barədə "Obama Ankaranın dəyərini yüksəldib, Afinanı unudur" başlıqlı yazı dərc edib. Qəzet bildirir ki, Obamanın Türkiyəyə səfər edəcəyi barədə mesajı yunan diplomatiyasını çətin vəziyyətdə qoyub. "Vaşinqtondan soyuq duş" yarımbaşlığıyla şərhini davam etdirən yunan jurnalist Hillari Klintonun Ankaraya səfərinin Yunanıstan Xarici İşlər Nazirliyi tərəfindən açıqlanmayan səbəblərinin olduğunu bildirib: "Bu səfər ABŞ xarici işlər nazirinin yunan tərəfdarı olduğuna dair gözləntilərin "təcili enişə" keçməsinə gətirib çıxarıb". Qəzet Barak Obamanın aprel ayında Türkiyəyə səfər edəcəyi mesajını ABŞ və Türkiyənin strateji xarakter daşıyan işbirliyinin dəyərləndirilməsi kimi qiymətləndirib: "Bu proseslər rəsmi Afinanın indiyədək qarşı-qarşıya gəlməkdən qaçdığı Egeyin qarşı tərəfindəki rəqibin üstünlüyünü etiraf etməyə məcbur etdi. Baş verənlər Afinanı Türkiyənin çoğrafi vəziyyəti, "ilımlı İslamın" təsiri, bu ölkədə demokratiyanın balanslı işləməsi, bölgədəki güc olması, ABŞ-ın vazkeçilməz müttəfiqi olması uğurunun gətirdiyi gerçəkliyini qəbul etmək məcburiyətində buraxdı". Qəzet Obamanın səfərinin Türkiyəni çox razı saldığını, bir daha dünya liderinin gündəmində yer almayan Yunanıstanın isə narahatçılığına səbəb olduğunu vurğulayıb. "Elefteropiya" qəzeti "Ankaraya göz vurdu" başlıqlı xəbərində Hillari Klintonun və Barak Obamanın səfərlərinin ABŞ hökumətinin Rəcəb Tayyib Ərdoğan hökumətilə xüsusi şəkildə və çoxyönlü iş görmək üçün əlaqələr qurmaq niyyətini göstərdiyini yazıb. Yunanıstanın xarici işlər naziri Dora Bakoyannisin Vaşinqtona səfərinin nəticəsinin olmadığını, yalnız tanışlıq xarakteri daşıdığını bildirən "Elefteropiya" yunan nümayəndə heyətinin "söyləyəcək və satılacaq" bir şeyi olmadan Birləşmiş Şqtatlara getməsinə işarə vurub. "Ta Hea" qəzeti isə "Obama Türkiyəyə sərmayə qoyur" başlıqlı xəbərində Barak Obamanın seçildiyi qısa müddətdən sonra Türkiyəyə səfər edən ilk ABŞ prezidenti olacağını vurğulayıb. Eyni zamanda, qəzet dövlət katibi Hillari Klintonun səfərinin Türkiyənin önəminin təyini baxımından da mühüm əhəmiyyət daşıdığını göstərib. Göytürk